﻿2 Corınth.
7.
Seàgı̨ą, Nǫ̀htsı̨ hanì goxè yatı whehtsı̨ t'à, t'asìı hazǫǫ̀ hołı̨ı̨ ne sìı wedę ats'ııle. Gozhį̀į̀ eyıts'ǫ goınì t'à hołı̨ı̨ hots'ehtsı̨ı̨ sìı k'alats'ııdè-le. Nǫ̀htsı̨ gots'ǫ̀ wek'èch'a sǫ̀ǫ̀ ts'ı̨ı̨wǫ t'à hotıì degaı k'ę̀ę̀ ts'ııdà. 
Naxıdzeè yìı gogha gòɂǫǫ̀ aahłe. Dǫ wı̨ı̨zìı k'èch'a hots'èhtsı̨ whìle, dǫ wı̨ı̨zìı ekǫ-le eghàlaı̨dà ats'ı̨ı̨là whìle, eyıts'ǫ dǫ t'à edegha sìghà k'ehots'ı̨ı̨ɂa whìle. 
Eyı hanì naxıts'ǫ̀ gohdee sìı naxısınìyaehtıì aehsı̨-le. Godzeè t'à naxıghǫnets'eètǫǫ sìı naxıts'ǫ̀ haehsı̨ ı̨lè, eyıt'à naxıxè ts'eeda eyıts'ǫ naxıxè ełaàts'ede gha ts'eèhkw'e hǫt'e. 
Sıì naxıghǫ ehkw'ı aahwhǫ hǫt'e eyıts'ǫ naxıghǫ xàhohdì. Naxıts'ıhɂǫ̀ sınì nàtsoò ajà. Gogha hoìla łǫ kò sıì sınà hǫt'e. 
Macedonıa nèk'e nèts'ı̨ı̨de ekò, goxè ts'èwhı̨į̀ gòı̨ɂà-le. T'aats'ǫǫ̀ goxè hoìla k'ehokw'o t'à godzeè dejı̨ ı̨lè. 
Hanìkò dǫ gıxè hoìlaa sìı Nǫ̀htsı̨ gıdzeè t'à nàtsoò agohɂį̀ hǫt'e. Tıtus gots'ǫ̀ nììtła t'à Nǫ̀htsı̨ godzeè nàtsoò ayį̀į̀là hǫt'e. 
Ededı̨ gots'àèhtła zǫ t'à godzeè nàtsoò ajà nıìle, naxı̨ sı wedzeè nàtsoò awèahłà t'à godzeè nàtsoò adlà hǫt'e. Naxıdzeè t'à seahɂį̀ ha dahwhǫ, dànì ts'ǫǫ̀dahwhǫ, eyıts'ǫ dànì sıì seghǫ nànıahdèe sìı ghǫ goxè goado. Eyıt'à sıì denahk'e sınà hǫt'e. 
Naxıts'ǫ̀ ııhtł'èe t'à naxıdzeè etseè ahłà sǫnı kò wek'eehłı̨-le. T'akwełǫ̀ǫ̀ wek'eehłı̨ ı̨lè, naxıts'ǫ̀ eehtł'è t'à naxıdzeè etseè ahłà t'à, hanìkò whaà-lea ts'ǫ̀ zǫ naxıdzeè etse hǫt'e. 
Eyıt'à dıì sınà hǫt'e. Naxıdzeè etse t'à sınà nıìle, hanìkò naxıdzeè etse t'à edek'eahłı̨ xè naxınì ładı̨į̀ aahłà t'à sınà hǫt'e. Nǫ̀htsı̨ hanì edek'eahłı̨ naxı̨ı̨hwhǫ hǫt'e, eyıt'à goxı̨ dànaxèts'edıı t'à naxınì tsį̀ts'ı̨ı̨hwho nıìle. 
Nǫ̀htsı̨ wınì k'ę̀ę̀ godzeè etse nı̨dè edek'ets'ı̨ı̨lı̨, eyı wet'à edaxàgotè hǫt'e. Hanì godzeè etse nı̨dè ı̨daà t'asìı wı̨ı̨zìı k'ets'ı̨ı̨lı̨ ha-le. Hanìkò dǫ gınàowoò k'ę̀ę̀ godzeè etsee sìı wet'à ełaàts'ede ha hǫt'e. 
Nǫ̀htsı̨ wınì k'ę̀ę̀ naxıdzeè etse t'à eładı̨į̀ aahjàa sìı wedaànıahdè. Dıì wet'à Nǫ̀htsı̨ gha naxınì nàtsoò ajà, hołı̨ı̨ nàowoò wedę ha dahwhǫǫ̀ aahjà, dǫ hołı̨ı̨ hogehtsı̨ nı̨dè naxık'èch'a hǫt'e, wet'à dajıahdeè laahjà, eyı ts'ıhɂǫ̀ seahɂį̀ ha dahwhǫ, wet'à sedaànıahdè aahjà, t'asìı hazǫǫ̀ ekǫ-le sìı ı̨whąą̀ wesınìyaetı ha dahwhǫ. Eyı hazǫǫ̀ hołı̨ı̨ k'ę̀ę̀ k'ehokw'oo sìı naxı̨ naxıxè agot'ı̨ nıìle naxık'èedzǫǫ̀ aahłà hǫt'e. 
Naxıts'ǫ̀ ııhtł'è ekò, dǫ ekǫ-le hòèhtsı̨ı̨ hanì-le-ı̨dè dǫ wets'ǫ̀ ekǫ-le eghàlaeda ts'ıhɂǫ̀ naxıts'ǫ̀ ııhtł'è nıìle. Hanìkò Nǫ̀htsı̨ wenadąą̀ dànì naxıdzeè t'à goghǫnıahtǫǫ sìı wek'èahsǫ ha dehwhǫ t'à, naxıts'ǫ̀ ııhtł'è hǫt'e. 
Eyı hazǫǫ̀ wet'à sıì godzeè t'à nàts'etsoò ats'ejà. Eyı xè Tıtus sıì wınà awèahłà wek'èts'eezǫ t'à, denahk'e goınà hǫt'e. 
Wets'ǫ̀ naxıghǫ xàdahohdì ı̨lè, eyıts'ǫ naxıghǫ į̀į̀zhaehłı̨-le asèahłà. T'asìı hazǫǫ̀ naxıts'ǫ̀ hats'edıı sìı ehkw'ı zǫ hǫt'e, eyı xèht'eè Tıtus ts'ǫ̀ naxıghǫ xàdahots'edìı sìı eyı sı ehkw'ı hǫt'e wek'èhoedzǫǫ̀ ajà. 
Dànì hazǫǫ̀ wek'èaht'e yenadì nı̨dè denahk'e ededzeè t'à naxıghǫneètǫ hǫt'e. Dànaxèhdı ha sǫnı dahwhǫ t'à wets'àahjı̨ kò nezı̨į̀ wets'ǫ̀ naahɂa ı̨lè, eyıts'ǫ t'asìı hazǫǫ̀ t'à wek'èaht'e ı̨lè. 
T'asìı hazǫǫ̀ ehkw'ı weghàlaahda ha hotıì wek'èehsǫ t'à sınà hǫt'e. 
