﻿2 Corınth.
8.
Sèot'ı̨ı̨, Macedonıa nèk'e kǫ̀ta gòlaa sìı dànì Nǫ̀htsı̨ edecheekeè gots'ǫ̀ sǫnıwǫǫ sìı wek'èahsǫ ha naxıts'ı̨ı̨hwhǫ. 
Sıì gıxè hoìla łǫ kò sıì sǫgı̨ı̨wǫ, eyıts'ǫ sıì etegeèt'ı̨ kò ededzeè t'à t'aats'ǫǫ̀ t'asìı dǫ ghàgele. 
Ehkw'ı anaxèehsı̨, t'asìı t'à dǫ ts'àgedı ha dìì-le sìı t'à dǫ ts'àgı̨ı̨dì, eyı wete ts'ǫ̀ dǫ ts'àgı̨ı̨dì. Ededı̨ xàè hagı̨ı̨wǫ t'à, 
goxè Nǫ̀htsı̨ wets'ǫ dǫ ts'àgedı ha goghǫnàdageetì. 
Haı̨hcho ts'ǫ̀ dǫ ts'àgedı ha ts'ı̨ı̨wǫ-le ı̨lè. T'akwełǫ̀ǫ̀ gots'ǫ̀ K'àowo ghàdegį̀ı̨la, eyı tł'axǫǫ̀ Nǫ̀htsı̨ wınì k'ę̀ę̀ goxı̨ sı goghàdegį̀ı̨la. 
Tıtus ededı̨ naxıta dǫ gha sǫǫ̀mba nàhtsį̀ yexèhoį̀hwho ı̨lè t'à, naxıdzeè sǫnıwǫ t'à dǫ ts'àahdıı sìı deghàà nàyehtsį̀ ha wèts'edı hǫt'e. 
T'asìı hazǫǫ̀ t'à deɂǫ̀ǫ̀ nezı̨į̀ eghàlaahda hǫt'e. Nǫ̀htsı̨ ghǫ naxınì nàtsoo t'à, yatı t'à, t'asìı k'èahsǫ t'à, dǫ ts'àahdı ghǫ hòtł'ò aahwhǫ t'à, eyıts'ǫ sıì goghǫnıahtǫ sı t'à. Hotıì eyı xèht'eè naxıdzeè sǫnıwǫ t'à dǫ ts'àahdıı sìı eyı denahk'e nezı̨į̀ aahłe gha edeahdzà. 
Eyı haahłe ha dehsı̨į̀-aehsı̨-le, hanìkò naxeèhdzà aht'ı̨. Dànì dǫ eyıì-le Nǫ̀htsı̨ wets'ǫ dǫ ghǫnegeètǫǫ sìı asį̀į̀ gıxèht'eè hòtł'ò gıghǫnıahtǫ gha naxeèhdzà aht'ı̨. 
Gots'ǫ̀ K'àowo Zezì-Krı gots'ǫ̀ sǫnıwǫǫ sìı wek'èahsǫ hǫt'e. Ededı̨ sìı ahxe elı̨ ı̨lè hanìkò naxıgha eteèt'ı̨į̀ adììdlà hǫt'e. Eteèt'ı̨į̀ adììdlà t'à naxıxè ahxe hòɂǫ agode ha. 
Ayìı naxıgha denahk'e nezı̨ı̨ sìı gha yatı naxıghàehɂà ha. Įdìı xok'e naxı̨ t'akwełǫ̀ǫ̀ Nǫ̀htsı̨ wets'ǫ dǫ sǫǫ̀mba t'à gıts'àahdı ı̨lè, eyı zǫ nıìle, naxı̨ t'akwełǫ̀ǫ̀ hanì eghàlaahda ha ghǫ hòtł'ò dahwhǫ ı̨lè. 
Eyı la dıì weghǫ naaht'è ts'ǫ̀ weghàlaahda. Hanì-ı̨dè naxınì nezı̨ı̨ k'ę̀ę̀ dahwhǫ ı̨lèe sìı wexèht'eè deghàà weghàlaahdà. Eyıt'à ayìı dàtłǫ naxıts'ǫ sìı weghàà dǫ ts'àahdı. 
Godzeè t'à t'asìı dǫ ghàts'eɂà nı̨dè Nǫ̀htsı̨ wegha nezı̨ hǫt'e. Ayìı dàtłǫ gots'ǫ weghàà t'asìı dǫ ghàts'eɂà ha goı̨hwhǫ hǫt'e, t'asìı gots'ǫ-le weghàà ats'et'ı̨ ha goı̨hwhǫ nıìle. 
Naxıgha t'asìı whìle agode ha eyıts'ǫ dǫ eyıì-le gıxè t'asìı łǫ agode ha ts'ı̨ı̨wǫ nıìle, hanìkò hazǫǫ̀ ełèht'eè t'asìı naxıts'ǫ ha ts'ı̨ı̨wǫ. 
Dıì t'asìı łǫ naxıts'ǫ sìı wet'à dǫ t'asìı gıts'ǫ-le ts'àahdı ha dìì-le. Hanì-ı̨dè ededı̨ t'asìı deɂǫ̀ǫ̀ gıts'ǫ nı̨dè naxıts'àgedıì agede ha. Hanì-ı̨dè hazǫǫ̀ ełèht'eè t'asìı gots'ǫ ha. 
Dıı hanì dek'eèhtł'è k'ę̀ę̀: “Amìı t'asìı łǫ nàwhehtsı̨ı̨ sìı sıì deɂǫ̀ǫ̀ t'asìı łǫ wets'ǫ-le, eyıts'ǫ amìı t'asìı łǫ-lea nàwhehtsı̨ı̨ sìı sıì t'asìı wets'ǫ-le nıìle,” dek'eèhtł'è. 
Dànì naxıxè hòɂǫ ha dehwhǫǫ sìı Nǫ̀htsı̨ Tıtus hanì nànıwoò ayį̀į̀là hǫt'e, eyıt'à Nǫ̀htsı̨ masì weehwhǫ. 
Tıtus naxıts'ǫ̀ wets'eèhɂàa sìı hayele ha zǫǫ̀-le, ededı̨ hanıwǫ t'à naxıts'àtła ha sıì wınà hǫt'e. 
Nǫ̀htsı̨ cheekeè ı̨łè wexè ats'ele ha. Eyı dǫ godı nezı̨ı̨ gha nezı̨į̀ eghàlaı̨dà t'à Nǫ̀htsı̨ wecheekeè hazǫǫ̀ gıghǫ sìghà agedı hǫt'e. 
Eyı zǫǫ̀-le, sǫǫ̀mba dǫ degaı ts'ǫ̀ ts'ewa gha goxè ade ha Nǫ̀htsı̨ wecheekeè eyı dǫ gį̀į̀hchì hǫt'e. Eyı sǫǫ̀mba gıghàts'ewa ha sìı, wet'à Nǫ̀htsı̨ ghàsǫhoedı eyıts'ǫ sıì gıts'àts'edı ha ts'ı̨ı̨wǫǫ sìı gık'èezǫ gha ats'et'ı̨. 
Eyı sǫǫ̀mba haàtłǫǫ k'ets'elee sìı weghǫ yatı łǫ ha ts'ı̨ı̨wǫ-le. 
Eyıt'à ehkw'ı weghàlats'eeda ha ts'ı̨ı̨wǫ. Nǫ̀htsı̨ wenadąą̀ zǫǫ̀-le hanìkò dǫ hazǫǫ̀ gınadąą̀ ehkw'ı k'ehots'eɂa ha ts'ı̨ı̨wǫ hǫt'e. 
Eyıts'ǫ k'achı̨ dǫ ı̨łè eyı dǫ nàke gıxè ats'ele ha. Ededı̨ sìı goxè eghàlaı̨dà ı̨lè t'à wınì nàtsoo xè dànì la ghǫ hǫhtìı sìı wek'èts'eezǫ hǫt'e. Ehkw'ı eghàlaahda ha naxı̨ı̨hwhǫ t'à denahk'e goxè eghàlaeda ha nıwǫ hǫt'e. 
Tıtus ededı̨ sexè eghàlaeda hǫt'e, eyıts'ǫ setł'axǫǫ̀ naxıta eghàlaeda hǫt'e. Eyıts'ǫ wexè dǫ nàke sìı Nǫ̀htsı̨ cheekeè hazǫǫ̀ gha k'ehogeɂa t'à Zezì-Krı weghàsǫhoedıì adlà hǫt'e. 
Eyıt'à eyı dǫ taı gıghǫnıahtǫǫ sìı gık'èezǫǫ̀ agıahłe, eyıts'ǫ ayìı ghǫ naxıghǫ xàhots'edìı sìı wek'ę̀ę̀ ehkw'ı eghàlaahda. Hanì-ı̨dè Nǫ̀htsı̨ wecheekeè hazǫǫ̀ gık'èezǫ ha. 
