﻿2 Corınth.
10.
Dǫ mǫ̀hdaa seghǫ dıı hagedı, “Paul gogà wheda nı̨dè ts'èwhı̨ą gots'ǫ̀ gode hanìkò gogà wheda-le nı̨dè yatı nàtsoo t'à gots'ǫ̀ gode,” sègedı. Zezì-Krı dànì wedzeè nezı̨ı̨ xè ts'èwhı̨į̀ anıwǫ k'ę̀ę̀ naxıghǫnàdaehtì. 
Naxıts'àwhıhtła nı̨dè dǫ mǫ̀hdaa dıı nèk'e dǫ k'ę̀ę̀ k'ehots'eɂa gogı̨ı̨hwhǫǫ sìı yatı nàtsoo t'à gıts'ǫ̀ gohde ha sǫnı. Hanìkò hanì naxıts'ǫ̀ gohde ha-le gha naxıghǫnàdaehtì. 
Dıı nèk'e dǫ gıta nàts'edè kò, gık'ę̀ę̀ ełets'egǫ nıìle. 
Goxı̨ wet'à ełets'egǫǫ sìı dıı nèk'e dǫ gıt'à ełegegǫǫ sìı xèht'eè nıìle. Į̀le, ełèht'eè nıìle! Nǫ̀htsı̨ wets'ǫ wet'à ełets'egǫǫ nàtsoò agohɂı̨ı̨ sìı wet'à wehłı̨ı̨ wenàowoò nàtsoo sìı hazǫǫ̀ wedıhots'ehtsı̨ hǫt'e. 
Nǫ̀htsı̨ k'èch'a xàyaetıı hazǫǫ̀ eyıts'ǫ t'asìı hazǫǫ̀ Nǫ̀htsı̨ ch'à agohɂı̨ı̨ sìı wedıhots'ehtsı̨ eyıts'ǫ nànıhowo hazǫǫ̀ ts'ìhchı gà Zezì-Krı k'èı̨t'e ats'ehɂı̨ hǫt'e. 
Deghàà Nǫ̀htsı̨ k'èaht'eè aahjà nı̨dè naxıta gots'ǫ dǫ mǫ̀hdaa Nǫ̀htsı̨ k'èch'a k'ehogeɂaa sìı nàgeekwa agets'ele ha hǫt'e. 
T'asìı wègaat'ı̨ı̨ sìı zǫ ghàahda. Zezì-Krı wets'ǫ aht'e dǫ hotıì hadeewǫ nı̨dè goxı̨ sı wexèht'eè Zezì-Krı wets'ǫ ats'ı̨ı̨t'e yedaànıwo welì. 
Gots'ǫ̀ K'àowo wedahxà nàahtsoò anaxets'ehɂı̨ hǫt'e, nàahtso-le anaxets'ehɂı̨ nıìle. Eyı ghǫ yaazea xàdahohdì gohde kò weghǫ į̀į̀zhaehłı̨ nıìle. 
Dıı nı̨htł'è naxıts'ǫ̀ eehtł'èe sìı wet'à naxıdzeè dejı̨ ha ahłà nıìle. 
Dǫ mǫ̀hdaa hagedı, “Paul gots'ǫ̀ eetł'è nı̨dè yatıì nàtsoo t'à gots'ǫ̀ gode, hanìkò goxè wheda nı̨dè t'asìı elı̨-le lanì wègaat'ı̨ eyıts'ǫ weyatıì gogha t'asìı nıìle,” gedı. 
Eyı dǫ hagedıı sìı enı̨htł'è t'à dàts'edıı sìı wexèht'eè ats'ı̨ı̨t'e, gınıedì welì. Naxıta eghàlats'eeda nı̨dè naxıts'ǫ̀ ts'ı̨ı̨tł'è k'ę̀ę̀ k'ehots'eɂa ha. 
Dǫ edeghǫ xàdahogedìı sìı gıxèts'ı̨ht'e ts'edı ha honàedı nıìle. Ededı̨ edeghàà dǫ edegeetsı̨ eyıts'ǫ edenàowoò ghàà edesınìyagehtı t'à gogı̨ı̨zǫ-le hǫt'e. 
Hanìkò goxı̨ sìı deɂǫ̀ǫ̀ xàdahots'edì ha nıìle, Nǫ̀htsı̨ la goghàı̨ɂǫǫ sìı eyı zǫ ghǫ xàdahots'edì ha hǫt'e. Nǫ̀htsı̨ la goghàı̨ɂǫ t'à naxı̨ kò naxıta eghàlats'eeda hǫt'e. 
Edeghǫ deɂǫ̀ǫ̀ xàdahots'edì ha nıìle. Naxıts'ǫ̀ ats'ejà-le nı̨dè ekìı gots'ede ha ı̨lè, hanìkò Zezì-Krı wegodıì nezı̨ı̨ xè naxıts'ǫ̀ ats'ejà ı̨lè. 
Eyıts'ǫ dǫ eyıì-le naxıta eghàlagı̨ı̨dà ghǫ xàdahots'edì nı̨dè deɂǫ̀ǫ̀ ats'edı nıìle. K'èdaà naxınì nàtsoò ade ha ts'ı̨ı̨wǫ, hanì-ı̨dè naxıta eghàlats'eedaa sìı denahk'e nechà ade ha. 
Hanì-ı̨dè dǫ eyıì-le naxınèè ɂǫ̀ǫ-ts'ǫ̀ nàgedèe sìı godı nezı̨ı̨ t'à gıts'ǫ̀ gots'ede ha dìì-le. Eyıì-le nèk'e Nǫ̀htsı̨ dahxà dǫ eghàlagı̨ı̨dàa sìı goxı̨ wek'e eghàlats'ı̨ı̨dà lanì wet'à edeghǫ xàdahots'edì ha ts'ı̨ı̨wǫ-le. 
Hanìkò, “Amìı xàdahodì ha nıwǫǫ sìı Nǫ̀htsı̨ ghǫ xàdahodì welè,” dek'eèhtł'è. 
Eyıt'à amìı edeghǫ xàdahodìı sìı dǫ nezı̨ı̨ gha wııtà nıìle, hanìkò amìı Nǫ̀htsı̨ yeghǫ xàdahodìı sìı dǫ nezı̨ı̨ gha wııtà hǫt'e. 
