﻿Galatıa.
4.
Dıı haehsı̨į̀ aehsı̨: Dǫ ı̨łaà chekoa elı̨ et'ıì, wetà ełaı̨wo tł'axǫǫ̀ wetà wets'ǫ dèè hazǫǫ̀ wets'ǫ̀ ade ha kò, wetà wecheekeè xèht'eè elı̨ hǫt'e. 
Wetà yegha dzę whezı gots'ǫ̀ dǫ gıxoehdı xè gıts'ǫ̀ k'agedè hǫt'e. 
Eyı xèht'eè goxı̨ sı ı̨łaà chekoa ts'ı̨ı̨lı̨ ekò dıı nèk'e ts'ǫ nàowo wetł'a ts'eèhkw'e ı̨lè. 
Hanìkò Nǫ̀htsı̨ wegha deghàà nèhòkw'o ekò Edeza gots'ǫ̀ ayį̀į̀là, ts'èko ts'ǫ dǫ elı̨, eyıts'ǫ Moses wenàowoò tł'a wheda ı̨lè. 
Dǫ hazǫǫ̀ eyı nàowo tł'a geèhkw'ee sìı edaxàgole gha gots'ǫ̀ ajà, hanì-ı̨dè xàè Nǫ̀htsı̨ weza ts'ı̨ı̨lı̨ gha goghàhòt'à ha t'à ajà. 
Weza ats'ı̨ı̨t'e t'à Nǫ̀htsı̨ Edeza wets'ǫ Įnì Degaı godzeè yìı ayį̀į̀là. Yedàyeh Nezı̨ı̨ ededı̨ sìı godzeè yìı “Abà, Setà,” hadı. 
Eyıt'à dǫ k'àowo tł'a geèhkw'e laaht'e-le aahjà, hanìkò Nǫ̀htsı̨ weza aaht'e. Weza aaht'e t'à Nǫ̀htsı̨ t'asìı hazǫǫ̀ edeza gha ts'atà yehłaa sìı naxıghàyele ha hǫt'e. 
Įnę̀ę Nǫ̀htsı̨ k'èahsǫ-le ekò xàè nǫ̀htsı̨ agı̨ı̨t'e-le sìı naxıts'ǫ̀ k'agedè ı̨lè. 
Hanìkò dıì sìı Nǫ̀htsı̨ k'èahsǫ, hanì-le-ı̨dè Nǫ̀htsı̨ naxık'èezǫ t'à dànìghǫ nàowo wet'à nàgotso-le xè etehoòt'ı̨ı̨ sìı ts'ǫ̀ anaahde ha dahwhǫ? K'achı̨ eyı xèht'eè nàowo tł'a dahkw'e ha dahwhǫ nì? 
Eyı nàowo gha dzędeè k'èahdì, ı̨łè sa gha dzędeè hoahtsı̨, eyıts'ǫ ı̨łè xo gha dzędeè hoahtsı̨! 
Naxıta k'ètł'ǫ̀ eghàlaıhdà sǫnı dehwhǫ t'à sıì naxıghǫ nànıhwho hǫt'e. 
Sèot'ı̨ı̨, naxıghǫnàdaehtì, sı̨ naxıxèht'eè ahjà t'à sexèht'eè aahde. Naxı̨ sìı sets'ǫ̀ ekǫ-le eghàlaahdà-le ı̨lè. 
Eyawhıhłı̨ ts'ıhɂǫ̀ t'akwełǫ̀ǫ̀ godı nezı̨ı̨ t'à naxıts'ǫ̀ gohde ı̨lè, wek'èahsǫ hǫt'e. 
Eyaehłı̨ t'à naxıgha dìì ı̨lè hanìkò dǫ wet'àaɂà-le seahwhǫ-le ı̨lè, hojıı sets'ǫ̀ k'ehoahɂa-le ı̨lè. Į̀le, Nǫ̀htsı̨ weyak'eet'ı̨į̀ aht'e lanì sets'ǫ̀ naahɂa ı̨lè, Zezì-Krı ededı̨ at'ı̨ lanì sets'ǫ̀ nezı̨į̀ k'ehoahɂa ı̨lè. 
Ekò sıì naxınà ı̨lè, dıì naxıxè dàgòjà? Ayìı dànaxèehsı̨ı̨ sìı segha haahłe ha ı̨lè, naxıdaà kò, xàahdlà gà seghàahwha naxèehsı̨ nı̨dè segha haahłe ha ı̨lè. Naxıxè hagǫ̀ht'e ı̨lè wek'èehsǫ. 
Naxıts'ǫ̀ ehkw'ı gohde t'à naxıts'ǫ̀ xànııhɂa seahwhǫ nì? 
Eyı dǫ eyıì-le sìı gınì nàtso xè edets'ǫ̀ naxıghǫgeehnè ha gı̨ı̨wǫ t'à aget'ı̨, hanìkò naxıgha sìghà ha aget'ı̨ nıìle. Gok'èch'a aweahde naxegı̨ı̨hwhǫ, hanì-ı̨dè gıghǫ hòtł'ò aahwhǫǫ̀ aahde ha gı̨ı̨wǫ. 
T'asìı gha goınì nàtsoo sìı nezı̨ hǫt'e, hanìkò t'asìı nezı̨ı̨ zǫ gha nı̨dè nezı̨ hǫt'e. Naxıxè whıhda nı̨dè zǫ naxınì nàtso welè-le, t'aats'ǫǫ̀ hats'ı̨ı̨t'e nı̨dè nezı̨. 
Sèot'ı̨ı̨, ts'èko chekoa nìhtè lanì naxıgha daıhɂà, Zezì-Krı deghàà naxıdzeè yìı nàdè ade gots'ǫ̀ daıhɂa hǫt'e. 
Sıì naxıghǫ nànıhwho t'à, dıì naxıxè whıhda xè eładı̨į̀ naxıts'ǫ̀ gohde ha dehwhǫ! 
Naxı̨ Moses wenàowoò k'ę̀ę̀ aahda ha dahwhǫǫ sìı eyı nàowo dàhodıì-ahodıı sìı asį̀į̀ deghàà wenıahdì? 
Abraham weza nàke gòı̨lè dek'eèhtł'è. Weza ı̨łè ts'èko yegha eghàlaedaa gots'ǫ wegǫ̀hłı̨ hǫt'e, eyıts'ǫ ı̨łè t'aa ts'èko edets'ǫ̀ k'àowo gots'ǫ hǫt'e. 
Ts'èko yegha eghàlaedaa gots'ǫ weza ne sìı dıı nèè gots'ǫ dǫ k'ę̀ę̀ wegǫ̀hłı̨ hǫt'e, ekò weza ı̨łè ts'èko edets'ǫ̀ k'àowo gots'ǫ ne sìı Nǫ̀htsı̨ Abraham xè yatı whehtsı̨ k'ę̀ę̀ wegǫ̀hłı̨ hǫt'e. 
Weghǫ nànıts'ewo ha nı̨dè eyı ts'èko nàke sìı nakenahòdlı̨ı̨ nàke lagı̨ı̨t'e. Nakenahòdlı̨ı̨ ı̨łè sìı Shìh Sınaı gòyeh gots'ǫ hǫt'e, eyı sìı ts'èko Hagar wìyeh lanì hǫt'e, eyı ts'èko weza sìı t'aats'ǫǫ̀ k'àowo tł'a geèhkw'e hǫt'e. 
Ts'èko Hagar sìı Arabıa nèk'e Shìh Sınaı lanì hǫt'e, eyıts'ǫ weza hazǫǫ̀ xè k'àowo tł'a geèhkw'e t'à dıı nèk'e kǫ̀godeè Jerusalem xèht'eè lanì. 
Hanìkò kǫ̀godeè Jerusalem ı̨dòo gots'ǫ hǫt'e sìı wegha k'àowo whìle, eyı gomǫ lanì hǫt'e. 
Eyıt'à dıı hanì dek'eèhtł'è: “Ts'èko wezaa gǫ̀hłı̨-le sìı wınà welè! Chekoa t'à eyaı̨lè whìle sìı wınà t'à hòtł'ò yaìzeh, chekoa łǫ wets'ǫ ha t'à. Ts'èko eteèt'ı̨ı̨ elı̨ı̨ sìı ts'èko wedǫǫ̀ gǫ̀hłı̨ nahk'e chekoa łǫ wets'ǫ ha,” dek'eèhtł'è. 
Sèot'ı̨ı̨, naxı̨ sìı Abraham weza Isaac laaht'e, wexèht'eè Nǫ̀htsı̨ weyatıì t'à naxıgǫ̀hłı̨ hǫt'e. 
Ekò k'e sìı Abraham weza dıı nèk'e ts'ǫ dǫ k'ę̀ę̀ wegǫ̀hłı̨ı̨ sìı weza Yedàyeh Nezı̨ı̨ dahxà wegǫ̀hłı̨ı̨ sìı dayį̀ı̨hɂa ı̨lè. Dıì ı̨łaà goxè hagǫ̀ht'e. 
Hanìkò Nǫ̀htsı̨ Nı̨htł'è k'e dıı hanì dek'eèhtł'è, “Ts'èko, edets'ǫ̀ k'àowo-le sìı weza xè nawı̨ı̨hɂà. T'asìı seza gıghàehłe ha sìı eyı ts'èko weza ts'ǫ̀ ade ha-le, ts'èko edets'ǫ̀ k'àowo sìı weza ts'ǫ̀ ade ha,” dek'eèhtł'è. 
Eyıt'à sèot'ı̨ı̨, eyı ts'èko k'àowo tł'a whedaa sìı weza lats'ı̨ı̨t'e nıìle, hanìkò ts'èko edets'ǫ̀ k'àowo sìı weza lats'ı̨ı̨t'e. 
