﻿Ephesus.
4.
Gots'ǫ̀ K'àowo wegha sedaàtǫ hǫt'e, gots'ǫ̀ K'àowo naxıkayaı̨htıı sìı hotıì nezı̨į̀ wek'ę̀ę̀ aahda ha naxeehwhǫ hǫt'e. 
Hotıì k'èeweèt'ı̨ k'ę̀ę̀ aahda, dǫ ts'ǫ̀ naxıdzeè nezı̨ welè, eyıts'ǫ ełeghǫnıahtǫ xè ełexè ts'èwhı̨į̀ aahda. 
Yedàyeh Nezı̨ı̨ wedahxà dǫ ı̨łè laaht'e gha hòtł'ò eghàlaahda, eyıts'ǫ t'aats'ǫǫ̀ ełexè ts'èwhı̨į̀ aahda. 
Goxı̨ gogha ehkw'ı-ahodıı sìı gots'ǫ̀ K'àowo wezhį̀į̀ ı̨łè zǫ lats'ı̨ı̨t'e, eyıts'ǫ Yedàyeh Nezı̨ı̨ ı̨łè zǫ gǫ̀hłı̨. Naxıkayaetı ekò edaxàahdèe ı̨łè zǫ gha naxıkayaetı ı̨lè. 
Eyıts'ǫ gots'ǫ̀ K'àowo ı̨łè zǫ gǫ̀hłı̨, gogha ehkw'ı-ahodı ı̨łè zǫ gǫ̀hłı̨, eyıts'ǫ t'asìı ı̨łè zǫ gha gok'ètaìdzı̨ hǫt'e. 
Nǫ̀htsı̨ ı̨łè zǫ gǫ̀hłı̨, ededı̨ dǫ hazǫǫ̀ gha Gotà elı̨. Ededı̨ sìı dǫ hazǫǫ̀ gha K'àowo elı̨, eyıts'ǫ t'asìı hazǫǫ̀ t'à godzeè yìı eghàlaeda hǫt'e. 
Hanìkò goxı̨ hazǫǫ̀ gotaàt'eè Zezì dàı̨hcho ts'ǫ̀ goghàyeɂà ha nıwǫ k'ę̀ę̀ wesǫnıwǫ goghǫ̀t'ǫ hǫt'e. 
Eyı ts'ıhɂǫ̀ dıı hanì dek'eèhtł'è, “Įdòo dagǫǫwà ajà ekò dǫ gıdanìı̨laa sìı edexè agǫ̀ǫ̀là, eyıts'ǫ t'asìı nezı̨ı̨ dǫ ghàı̨la,” dek'eèhtł'è. 
(“Įdòo ajà,” dek'eèhtł'èe sìı t'akwełǫ̀ǫ̀ ı̨zhıì dèè goyìı togoòtł'òo sìı ts'ǫ̀ ajà t'à ahodı hǫt'e. 
Ededı̨ ı̨zhıì dèè goyìı ajàa sìı ededı̨ et'ıì ı̨dòo yat'a hazǫǫ̀ weɂǫ̀ǫ̀ dagǫǫwà ts'ǫ̀ ajà hǫt'e, dèè eyıts'ǫ yat'a hazǫǫ̀ hòèlı̨ı̨ sìı yìı wehòhɂǫ gha ajà.) 
Ededı̨ sìı dǫ mǫ̀hdaa wecheekeèdeè gı̨ı̨lı̨ ha goghàhòı̨ɂǫ hǫt'e, mǫ̀hdaa nakwenàoɂǫǫ gı̨ı̨lı̨ ha, mǫ̀hdaa godı nezı̨ı̨ k'egeɂaa gı̨ı̨lı̨ ha, mǫ̀hdaa Nǫ̀htsı̨ wets'ǫ dǫ k'ègedìı gı̨ı̨lı̨ ha, eyıts'ǫ mǫ̀hdaa dǫ hoghàgogeehtǫǫ gı̨ı̨lı̨ ha agǫ̀ǫ̀là. 
Hanì-ı̨dè Nǫ̀htsı̨ wets'ǫ dǫ dànì Nǫ̀htsı̨ gha eghàlageeda ha sìı gık'èezǫǫ̀ agede ha, eyıts'ǫ hazǫǫ̀ ełexè Nǫ̀htsı̨ gha goınì ı̨łè zǫ lats'ede gots'ǫ̀, eyıts'ǫ Nǫ̀htsı̨ weza deghàà wek'èts'eezǫ ats'ede gots'ǫ̀, Nǫ̀htsı̨ wets'ǫ dǫ hazǫǫ̀ ełexè nàgetsoò agede ha. Hanì-ı̨dè dànì Zezì-Krı wexè hòɂǫǫ sìı wexèht'eè goxè hòɂǫ ats'ede ha. 
Hanì-ı̨dè k'achı̨ bebìa lats'ı̨ı̨t'e ha-le, taatı̨į̀ t'à goxè k'etaetı̨ lanì ha-le. Dǫ goghǫyageeɂà t'à gogı̨ı̨zǫǫ sìı ładı̨į̀ hoghàgogeehtǫ nı̨dè goxè ts'ıɂǫ̀-hogeeɂà ha-le. 
Hanìkò ełeghǫnets'eètǫ t'à ehkw'ı ełets'ǫ̀ gots'ede ha. Goxı̨ Nǫ̀htsı̨ wets'ǫ dǫ ats'ı̨ı̨t'ee sìı Zezì wezhį̀į̀ lats'ı̨ı̨t'e, eyıts'ǫ Zezì ededı̨ gokwì elı̨ lanì hǫt'e. T'asìı hazǫǫ̀ t'à Zezì-Krı wexè nàts'etsoò ats'ede ha hǫt'e. 
Ededı̨ wet'à wezhį̀į̀ hǫt'ıì eyıts'ǫ t'asìı hazǫǫ̀ wek'e whelaa sìı yàłııtǫ̀, eyıts'ǫ wet'à goxı̨ wezhį̀į̀ ats'ı̨ı̨t'ee sìı wegha goılaà ghàlats'eeda t'à eyıts'ǫ ełeghǫnets'eètǫ t'à wezhį̀į̀ nàtsoò ats'ehɂı̨ hǫt'e. 
Eyıt'à gots'ǫ̀ K'àowo wedahxà yatı nàtsoo t'à dıı hanaxèehsı̨: Dǫ Nǫ̀htsı̨ k'ègeezǫ-le sìı k'achı̨ gık'ę̀ę̀ aahda-le, gınìłı̨ı̨ k'ę̀ę̀ geeda ne t'à. 
Gınì t'à gıxè togoòtł'ò lanì t'à Nǫ̀htsı̨ ts'ǫǫ̀hk'e t'asìı nıgeedì-le xè gık'ę̀ę̀ eda-le. Ededzeè t'à egeèhkw'ǫ ha gı̨ı̨wǫ-le xè gıkwì nàtsoo t'à Nǫ̀htsı̨ nàowoò k'ègeezǫ-le hǫt'e. 
T'asìı wı̨ı̨zìı ghǫ į̀į̀zhagı̨ı̨lı̨-le agejà, t'aa gı̨ı̨wǫ ts'ǫ̀ hołı̨ı̨ k'ę̀ę̀ k'ehogeɂa, eyıts'ǫ t'asìı wejıı hazǫǫ̀ k'alagedè xè ı̨łaà denahk'e hołı̨ı̨ hogehtsı̨ ha gı̨ı̨wǫ. 
Hanìkò naxı̨ sìı Zezì-Krı weghǫ hanì hoghànaxeètǫ nıìle. 
Hotıì weghǫ aàhkw'ǫ xè weghǫ hoghànaxeètǫ ı̨lè, eyıts'ǫ Zezì-Krı wet'à nàowo ehkw'ıı k'èhoahsǫ aahjà hǫt'e. 
Įnę̀ę dànì naxınìłı̨ı̨ k'ę̀ę̀ aahda ı̨lèe sìı wek'ę̀ę̀ aahda-le gha hoghànaxeètǫ ı̨lè. Hołı̨ı̨ gha hòtł'ò kànıahɂaa sìı wet'à naxınì wedıhołè hǫt'e. 
Hanìkò naxınì ładı̨į̀ ajàa k'ę̀ę̀ aahda ha hoghànaxeètǫ ı̨lè, 
eyıts'ǫ dǫgòò lanì aahda ha hoghànaxeètǫ ı̨lè. Nǫ̀htsı̨ k'ę̀ę̀ hotıì ehkw'ı aahda xè degaı aaht'e ha naxıhòèlı̨ hǫt'e. 
Eyıt'à naxı̨ hazǫǫ̀ hots'ets'ìı k'ę̀ę̀ goahde-le eyıts'ǫ naxèot'ı̨ ts'ǫ̀ ehkw'ı goahde, Zezì-Krı wezhį̀į̀ ı̨łè zǫ gots'ǫ ats'ı̨ı̨t'e t'à. 
“Ààhch'e nı̨dè hołı̨ı̨ hoahtsı̨-le,” dek'eèhtł'è. Sa nàɂàa ts'ǫ̀ ààhch'e-le, 
hanì-ı̨dè wehłı̨ı̨ naxıdaèht'è ha nıìle. 
Dǫ eeɂį̀ ı̨lèe sìı k'achı̨ eeɂį̀ welè-le, hanìkò eghàlaeda ha hǫt'e. Edılà t'à t'asìı wet'àaɂàa hohtsı̨ ha hǫt'e, hanì-ı̨dè dǫ t'asìı gıgha whìle sìı yet'à gots'àdı ha. 
Yatıjıı t'à goahde-le, hanìkò yatı wet'à dǫ gınì nàtsoò ade ha sìı t'à goahde, hanì-ı̨dè dǫ egeèhkw'ǫǫ sìı wet'à nezı̨į̀ edexègeedì xè gıt'àhoehwhı ha. 
Eyıts'ǫ Nǫ̀htsı̨ wets'ǫ Įnì Degaı sìı wedzeè nànııtì aweahłe-le. Ededı̨ sìı weghàà Nǫ̀htsı̨ wets'ǫ dǫ aaht'e eyıts'ǫ nǫǫde dzęę̀ k'e edaxànaxeetè gha naxık'èhoedzǫ hǫt'e. 
T'asìı hazǫǫ̀ t'à ełek'èch'a aaht'ee sìı wedę aahłe. Ełets'ǫ̀ naxınì nàìtłoo, ełets'ǫ̀ ààhch'ee, ełetawhıahdèe, ełek'adaahdèe, eyıts'ǫ hołı̨ı̨ hazǫǫ̀ k'ę̀ę̀ k'ehoahɂaa sìı wedę aahłe. 
Ełets'ǫ̀ naxıdzeè eteèɂı̨ welè, Zezì-Krı wet'ǫ̀ǫ̀ Nǫ̀htsı̨ naxıghǫ nahoı̨la k'ę̀ę̀ ełeghǫ nahoahłe. 
