﻿Colosse.
3.
Zezì-Krı wexè naàhdà aahjà ts'ıhɂǫ̀, ı̨dòo yak'e Zezì-Krı, Nǫ̀htsı̨-Gotà gà nàgòts'ehnèe wheda t'à yak'e ghǫ naxıdzeè nàtsoò aahwhǫ. 
Eyıt'à ı̨dòo gots'ǫ ne sìı ghǫ naxıdzeè nàtsoò aahwhǫ, dıı nèk'e t'asìı whelaa ghǫ naxıdzeè nàtsoò aahwhǫ-le. 
Ełaahdèe lanì ı̨lè, eyıt'à dıì aahdaa sìı Zezì-Krı wexè Nǫ̀htsı̨ nezı̨į̀ naxık'èdì. 
Eyıt'à Zezì-Krı wets'ıhɂǫ̀ aahda, eyıts'ǫ K'àowocho enıìyah k'ę̀ę̀ wègoèht'į̀ nı̨dè naxı̨ sı wexè naxègaat'ı̨ ha hǫt'e. 
Eyıt'à dıı nèk'e gots'ǫ hołı̨ı̨ nàowoò naxıts'ǫ̀ k'àowo-le aahłe. Dıı hołı̨ı̨ nàowoò hǫt'e: gozhį̀į̀ t'à hołı̨ı̨ k'alats'edèe, gonìłı̨ı̨, hołı̨ı̨ ghats'eewı, eyıts'ǫ t'asìı ghǫ ets'edì-le. T'asìı gha ets'edì-le sìı gogha nǫ̀htsı̨ elı̨į̀ at'į̀ hǫt'e. 
Dǫ eyı hanıı hołı̨ı̨ k'alagedè ts'ıhɂǫ̀ Nǫ̀htsı̨ nàgoehkwa ha hǫt'e. 
Įnę̀ę sìı eyı hanıı hołı̨ı̨ nàowoò k'ę̀ę̀ aahda ı̨lè. 
Hanìkò dıı hazǫǫ̀ wedę aahłe: ts'ìch'ee, goınì nàìtłoo, hołı̨ı̨ k'ę̀ę̀ k'ehots'eɂaa, dǫ k'adats'edèe, eyıts'ǫ whàdagots'etsǫ̀ǫ, eyı hazǫǫ̀ wedę aahłe. 
Naxınìłı̨ı̨ k'ę̀ę̀ aahda-le aahjà t'à ełets'ǫ̀ hoahts'ì-le. Naxıgoht'ǫǫ̀ wezǫą yìı xàahde lanì hǫt'e. 
Goht'ǫ gòò yìı aahde laahjà, Nǫ̀htsı̨ gòèhtsı̨ı̨ sìı deghàà wek'èahsǫǫ̀ aahjà, eyıts'ǫ wexèht'eè aahdaà aahjà. 
Zezì-Krı wegha ts'eeda nı̨dè hazǫǫ̀ ełèts'ı̨ı̨ht'e hǫt'e. Israel got'ı̨į̀, Greece got'ı̨į̀ ełexègı̨ı̨ht'ee, nàgoet'àa, nàgoet'à-le, nàowo eładı̨ı̨ k'ę̀ę̀ geedaa dǫǫ̀, dǫ edets'ǫ̀ k'agedè-le, edets'ǫ̀ k'agedèe, hazǫǫ̀ ełexègı̨ı̨ht'e. Zezì-Krı ededı̨ zǫ gogha K'àowo elı̨, eyıts'ǫ goxı̨ hazǫǫ̀ godzeè yìı eda. 
Eyıt'à Nǫ̀htsı̨ naxììchì, wets'ǫ dǫ degaı aahłı̨ xè naxıghǫneètǫ t'à, dǫ eteahɂı̨, dǫ ts'ǫ̀ naxıdzeè nezı̨ı̨ laaht'e, k'èeweèt'ı̨ k'ę̀ę̀ aahda, eyıts'ǫ dǫ xè ts'èwhı̨į̀ hòwhahɂǫ. 
Gots'eèdı kò ełınì nezı̨ı̨ aaht'ı̨, eyıts'ǫ ełek'èch'a hòahtsı̨ nı̨dè ełeghǫ nahoahłe. Gots'ǫ̀ K'àowo naxıghǫ nahoı̨la lanì ełeghǫ nahoahłe. 
Eyı nàowo nezı̨ı̨ hazǫǫ̀ k'ę̀ę̀ aahda, eyı wedaats'ǫ̀ ełeghǫnıahtǫ, hanì-ı̨dè eyı nàowo nezı̨ı̨ hazǫǫ̀ sìı nàowodeè ı̨łè zǫ k'ę̀ę̀ aahda ha. 
Zezì-Krı wexè ts'èwhı̨į̀ hòɂǫǫ sìı wek'ę̀ę̀ aahda welì. Zezì-Krı wezhį̀į̀ aahłı̨ı̨ sìı ts'èwhı̨į̀ aahda ha naxììchì, eyı weghǫ Nǫ̀htsı̨ ts'ǫ̀ masì dahwhǫ. 
Zezì-Krı weyatıì hazǫǫ̀ naxıdzeè yìı t'aats'ǫǫ̀ wet'à goahsǫ aahda, eyıts'ǫ wet'à hoghàłaahtǫ xè nezı̨į̀ ełek'èahdì. Naxıdzeè t'à Nǫ̀htsı̨ masì weahwhǫ eyıts'ǫ shı̨ xàɂaa t'à wegha aahjı̨. 
Ayìı dàahdıı, eyıts'ǫ ayìı ghàlaahdaa sìı hazǫǫ̀ gots'ǫ̀ K'àowo Zezì wedahxà aaht'ı̨. Eyıts'ǫ Zezì wıızì t'à Nǫ̀htsı̨-Gotà masì wèahdı. 
Ts'èko yàahłı̨ı̨ sìı naxıdǫǫ̀ k'èaht'e, gots'ǫ̀ K'àowo wexè hanì aahda. 
Dǫzhìı yàahłı̨ı̨ sìı naxıts'èkeè gıghǫnıahtǫ, eyıts'ǫ yatı nàtsoo t'à tsį̀gıahɂa-le. 
Chekoa yàahłı̨ı̨ sìı naxıtà eyıts'ǫ naxımǫ gık'èaht'e, eyı sìı gots'ǫ̀ K'àowo yeghǫ sìghà anıwǫ hǫt'e. 
Gotà yàahłı̨ı̨ sìı naxıza gınì tsį̀ahwhı-le, haaht'ı̨ nı̨dè ahxe whìle gı̨ı̨wǫǫ̀ agede ha. 
Dǫ gıcheekeè yàahłı̨ı̨ sìı dıı nèk'e naxıts'ǫ̀ k'aodèe gı̨ı̨lı̨ı̨ sìı gık'èaht'e. Gınadąą̀ zǫ nezı̨į̀ k'ehoahɂa-le, ekìı naxıghǫ nezı̨į̀ agı̨ı̨wǫ gha aaht'ı̨-le. Hanìkò gots'ǫ̀ K'àowo ts'ǫ̀ nezı̨į̀ kànıahɂa xè naxıdzeè t'à nezı̨į̀ eghàlaahda. 
Ayìı ghàlaahdaa sìı hotıì naxıdzeè t'à nezı̨į̀ weghàlaahda, dǫ gha zǫ aaht'ı̨-le, hanìkò gots'ǫ̀ K'àowo wegha eghàlaahda lanì aaht'ı̨. 
Eyı wek'èxa gots'ǫ̀ K'àowo naxıda t'asìı whehłaa sìı naxıghàɂà ha wek'èahsǫ t'à hanì eghàlaahda welì. Gots'ǫ̀ K'àowo Zezì-Krı wegha eghàlaahda aaht'ı̨ hǫt'e. 
Amìı ekǫ-le eghàlaedaa sìı wek'èxa hoìla weghǫ̀t'à ha. Nǫ̀htsı̨ sìı wegha dǫ denahk'e nezı̨ı̨ gǫ̀hłı̨ nıìle, hazǫǫ̀ ełèht'eè gosınìyaehtı ha hǫt'e. 
