﻿2 Tımothy.
4.
Nǫ̀htsı̨ wenadąą̀ eyıts'ǫ Zezì-Krı wenadąą̀ nets'ǫ̀ eehtł'è. Zezì ededı̨ sìı dǫ geedaa eyıts'ǫ dǫ ełaı̨dèe gosınìyaehtı ha. Gots'ǫ̀ wègoèht'į̀ ha eyıts'ǫ wenàowoò k'ę̀ę̀ hòɂǫǫ̀ ayele ha. Wedahxà dıı yatı neghàıhɂǫ hǫt'e: 
Nǫ̀htsı̨ yatıì t'à dǫ ts'ǫ̀ goı̨de ha t'aats'ǫǫ̀ sınìwheęda. Nàowo ehkw'ıı k'ę̀ę̀ aahda, hołı̨ı̨ hòahtsı̨-le, eyıts'ǫ eyı gha naxınì nàtsoò aahłe, gìı̨dı. T'aats'ǫǫ̀ dǫ xè ts'èwhı̨į̀ neewǫ eyıts'ǫ hotıì nezı̨į̀ hoghàgı̨ı̨htǫ. 
Įdaà nı̨dè dǫ sìı nàowo ehkw'ıı ka-egeèhkw'ǫ ha-le agode ha. Dàgı̨ı̨wǫǫ sìı zǫ k'ę̀ę̀ hoghàgoetǫ gı̨ı̨wǫ ha. Ayìı geèhkw'ǫ hagı̨ı̨wǫǫ sìı t'à hoghàgeetǫ gha hoghàehtǫǫ-dǫǫ̀ łǫ edegha nègele ha. 
Nàowo ehkw'ıı ka-egeèhkw'ǫ-le agede ha, ekìı godı dǫ yèhtsı̨ zǫ ka-egeèhkw'ǫ ha. 
Hanìkò nı̨ sìı t'asìı hazǫǫ̀ gha nınì ehkw'ı anehwhǫ, negha hoìla kò wexè ts'èwhı̨į̀ ı̨da. Godı nezı̨ı̨ k'eneɂa gha nekayaetı ne t'à, la neghǫ̀t'ǫǫ sìı t'aats'ǫǫ̀ wek'ę̀ę̀ hòtł'ò eghàlaı̨da. 
Sı̨ hòt'a selǫ nèhòkw'ı ha nìhǫǫwo, Nǫ̀htsı̨ gha sezhį̀į̀ k'ehǫǫwo lanì. Dıı nèk'e gots'ǫǫ̀ asedle ha nìhǫǫwo. 
Ehdageedè t'à dǫ nàtła k'etı̨mǫehdaa laht'e. Nezı̨į̀ k'etı̨mǫehda t'à nǫǫde ts'ǫ̀ gıghǫèhnǫ, eyıt'à nǫǫde ts'ǫ̀ Nǫ̀htsı̨ gha ı̨łaà sınì nàtso hǫt'e. 
Ehkw'ı gha sııtà xè hoehnǫ ts'ıhɂǫ̀ t'asìı sǫǫ̀mbaekwo t'à hòèlı̨ı̨ nǫǫde dzęę̀ k'e seghǫ̀t'à ha. Gots'ǫ̀ K'àowo ededı̨ zǫ ehkw'ı dǫ sınìyaehtı hǫt'e eyıts'ǫ ayìı dehnǫǫ sìı seghàyııɂà ha. Sı̨ zǫ hasele ha nıìle, hanìkò dǫ hazǫǫ̀ wègoèht'į̀ gha kànegı̨ı̨ɂaa sìı ededı̨ sı hagole ha hǫt'e. 
Įwhąą̀ sets'ǫ̀ anede gha hòtł'ò edı̨į̀hdzà. 
Demas dıı nèk'e t'asìı whelaa ghǫneètǫ t'à sets'ǫǫ̀ ajà xè kǫ̀ta Thessalonıca ts'ǫ̀ ajà. Crescens Galatıa nèk'e ts'ǫ̀ ajà, eyıts'ǫ Tıtus Dalmatıa nèk'e ts'ǫ̀ ajà. 
Luke ededı̨ zǫ segà wheda. Mark wekàątła gà edexè awı̨ı̨le, Nǫ̀htsı̨ wılaà ghàlaehda ekò nezı̨į̀ sets'àı̨dì ı̨lè t'à. 
Tychıcus kǫ̀ta Ephesus ts'ǫ̀ awèhłà. 
Jǫ ts'ǫ̀ nìı̨tła nı̨dè, kǫ̀ta Troas ekǫ Carpus wegà seɂeè aèhchì ahłàa sìı edexè anele nǫǫ̀. Senı̨htł'è eyıts'ǫ enı̨htł'è ewò t'à hòèlı̨ı̨ eyı t'aa wedę awı̨ı̨de sǫ̀ǫ̀. 
Alexander satsǫ̀-eghàlaedaa-dǫǫ̀ sets'ǫ̀ hoìla deè hòèhtsı̨. Gots'ǫ̀ K'àowo eyı k'èxa hoìla yeghàhòɂà ha. 
Nı̨ sı wech'à edexonehdı, godı nezı̨ı̨ t'à dǫ hoghàts'eehtǫǫ sìı sıì wek'èch'a hǫt'e t'à. 
T'akwełǫ̀ǫ̀ seghǫ nàyaetı ekò dǫ wı̨ı̨zìı sek'edaedı-le ı̨lè, hazǫǫ̀ sets'ǫǫ̀ nageèhde ı̨lè. Eyı k'èxa Nǫ̀htsı̨ t'asagǫ̀ǫ̀là-le nı̨dè dehwhǫ. 
Hanìkò gots'ǫ̀ K'àowo sexè at'ı̨ t'à, sınì nàtsoò asį̀į̀là. Hanì ts'ıhɂǫ̀ godı nezı̨ı̨ deghàà dǫ ts'ǫ̀ gohde ha, eyıts'ǫ dǫ hazǫǫ̀ Israel got'ı̨į̀ agı̨ı̨t'e-le sìı geèhkw'ǫ ha welì. Ekìıyeè k'e goìjìıcho wewà ch'à Nǫ̀htsı̨ edaxàsį̀ı̨htı̨ ı̨lè. 
Nàowołı̨ı̨ hazǫǫ̀ sek'alawo ch'à gots'ǫ̀ K'àowo edaxàsehtè ha, eyıts'ǫ yak'e wenàowoò k'ę̀ę̀ hòɂǫǫ sìı ts'ǫ̀ asele ha. Welǫ whìle ts'ǫ̀ weghàsǫhoedı welè. Amen. 
Prıscılla eyıts'ǫ Aquıla, eyıts'ǫ Onesıphorus wekǫ̀ dǫ hazǫǫ̀ nàdèe sìı segha “Naxıxè sìghà welè” gìı̨dı. 
Erastus kǫ̀ta Corınth aìda, eyıts'ǫ kǫ̀ta Mıletus ekǫ Trophımus eyaelı̨ t'à sexè ajà-le. 
Xok'e agode kwe jǫ sets'ǫ̀ anede ha wı̨ı̨hdzà. Eubulus yatı nezı̨ı̨ nedanìı̨ɂǫ, eyıts'ǫ Pudens, Lınus, Claudıa, eyıts'ǫ gòet'ı̨ hazǫǫ̀, “Nexè sìghà welè,” nègedı. 
Gots'ǫ̀ K'àowo nets'ǫ ı̨nì xè at'ı̨ welè. Nǫ̀htsı̨ nets'ǫ̀ sǫnıwǫ welè.
