﻿Hebrew.
8.
Ayìı awèts'edıı sìı dıı awèts'edı: Yahtıı-wet'àaɂàa-deè deghàà degaı elı̨ gots'ǫ hǫt'e, eyı sìı yak'e Nǫ̀htsı̨ wexè enıìyah hòɂǫǫ gà nàgòts'ehnèe wheda, 
eyıts'ǫ Nǫ̀htsı̨ wets'ǫ degaı k'è gòɂǫǫ sìı ekǫ eghàlaeda hǫt'e. Eyı gòɂǫǫ sìı Nǫ̀htsı̨ wenı̨hbàa wedeèdlı̨ı̨ hǫt'e, eyı sìı Nǫ̀htsı̨ nàı̨ɂaà ayį̀į̀là, dǫ ayį̀į̀là nıìle. 
Yahtıı-wet'àaɂàa-deè hazǫǫ̀ sìı t'asìı Nǫ̀htsı̨ ghàgeɂà eyıts'ǫ t'asìı Nǫ̀htsı̨ ts'ǫ̀ gık'eehk'ǫ̀ gha gìhchì hǫt'e. Eyıt'à Zezì ededı̨ sı t'asìı Nǫ̀htsı̨ ghàɂà ha hǫt'e ı̨lè. 
Įłaà dıı nèk'e wheda nı̨dè yahtıı-wet'àaɂàa-deè elı̨ ha-le ı̨lè, hòt'a Moses wenàowoò k'ę̀ę̀ yahtıı Nǫ̀htsı̨ ts'ǫ̀ t'asìı gık'eehk'ǫ̀ gǫ̀hłı̨ ne t'à. 
Ededı̨ degaı k'è gòɂǫǫ goyìı eghàlageedaa sìı yak'e degaı k'è gòɂǫǫ xèht'eè lanì hǫt'e, eyıts'ǫ ekìı weɂı̨zhı̨į̀ lanì hǫt'e. Eyı ts'ıhɂǫ̀ Moses Nǫ̀htsı̨ gha nı̨hbàa gohtsı̨ ha nìhǫǫwo ekò Nǫ̀htsı̨ yets'ǫ̀ dıı hadı, “Shìhka dànì nets'ǫ̀ wègaat'ı̨į̀ adlàa sìı, hotıì wek'ę̀ę̀ anele ha,” yèhdı ı̨lè. 
Hanìkò Zezì la weghǫ̀t'ǫǫ sìı yahtıı-wet'àaɂàa-deè gılaà nahk'e wet'àaɂà hǫt'e. Nakenahòdlı̨ı̨ wegòò k'ę̀ę̀ dǫ gha eyıts'ǫ Nǫ̀htsı̨ gha tanı wheda. Eyı nakenahòdlı̨ı̨ wegòò sìı ı̨nę̀ę gots'ǫ nakenahòdlı̨ı̨ nahk'e elı̨ hǫt'e, eyıts'ǫ yatı denahk'e nezı̨į̀ whehtsı̨ k'e wehòèlı̨ hǫt'e. 
T'akwełǫ̀ǫ̀ gıxè nakenahòdlı̨ı̨ sìı t'asìı t'à wehoeɂa-le nı̨dè, Nǫ̀htsı̨ k'achı̨ nakenahołè ayele ha-le ı̨lè. 
Hanìkò Nǫ̀htsı̨ sìı dǫ ı̨łaà hołı̨ı̨ hogehtsı̨ gok'èezǫ t'à hadı, “Naxıgha K'àowo hadı: Įdaà whaà-le nı̨dè, Israel got'ı̨į̀ eyıts'ǫ Judah got'ı̨į̀ gıxè nakenahołèe wegòò ehtsı̨ ha. 
Įnę̀ę gıcho Egypt nèk'e gots'ǫ xàgeehwha ekò gıxè nakenawhehtsı̨ ı̨lè eyı xèht'eè ha nıìle. Gıxè nakenawhehtsı̨ı̨ sìı t'aats'ǫǫ̀ gık'ę̀ę̀ eda-le t'à, gıxè aht'ı̨-le ahjà. 
Įdaà nı̨dè dıı hanì Israel got'ı̨į̀ gıxè nakenahòdlı̨ı̨ wegòò ehtsı̨ ha. Senàowoò gınì yìı wheɂǫ ahłe ha, eyıts'ǫ gıdzeè k'e dek'eèhtł'è ahłe ha. Gınǫ̀htsı̨ ehłı̨ ha eyıts'ǫ ededı̨ sets'ǫ dǫ gı̨ı̨lı̨ ha. 
Dǫ edèot'ı̨ hoghàehtǫ ha-le eyıts'ǫ dǫ edechı hoghàehtǫ ha-le, ‘Gots'ǫ̀ K'àowo wek'èı̨zǫ aąde,’ yèhdı ha-le, dǫ nechà-le eyıts'ǫ dǫ nechàa sìı hazǫǫ̀ sek'ègeezǫ ha t'à. 
Hołı̨ı̨ k'ę̀ę̀ k'ehogı̨ı̨ɂaa sìı gıghǫ nahoehłe ha, eyıts'ǫ gıhołı̨į̀ wenahdì ha-le,” gòhdı dek'eèhtł'è. 
Eyı nakenahòdlı̨ı̨ “wegòò” yèhdı t'à Nǫ̀htsı̨ t'akwełǫ̀ǫ̀ nàowo whıhtsı̨ı̨ sìı wet'à-ats'et'ı̨-le ayį̀į̀là. Ayìı wet'à-ats'et'ı̨-le xè wezǫǫ̀ ajàa sìı whaà-le-t'ıì wedę adle ha. 
