﻿Hebrew.
9.
T'akwełǫ̀ǫ̀ nakenahòdlı̨ı̨ sìı dànì Nǫ̀htsı̨ ts'ǫ̀ yats'ehtı ha, eyıts'ǫ dıı nèk'e dànì Nǫ̀htsı̨ gha degaı k'è gòɂǫǫ hołè ha, eyı hazǫǫ̀ gha nàowo dek'eèhtł'è ı̨lè hǫt'e. 
Eyıt'à Nǫ̀htsı̨ gha nı̨hbàa nàgı̨ı̨hgè ı̨lè. Goyìı nàke k'è gòɂǫǫ, t'akwełǫ̀ǫ̀ goyats'eedèe sìı k'aàk'ǫ ı̨łè nàı̨ɂa, ladà eyıts'ǫ łèt'è degaı ladà k'e wheɂǫ. Eyı sìı Degaı K'è gòyeh. 
Eyıts'ǫ enìı̨t'ı weɂı̨į̀ nàke k'è gòɂǫǫ sìı Denahk'e Degaı K'è gòyeh. 
Goyìı sǫǫ̀mbaekwo-ladà wek'e Nǫ̀htsı̨ ts'ǫ̀ dzèh-łekǫǫ dèk'ǫ̀ǫ sìı wheɂǫ, eyıts'ǫ Nǫ̀htsı̨ dǫ xè nakenawhehtsı̨ı̨ gha sǫǫ̀mbaekwo-ladzè eyı whehtǫ. Eyı ladzè weyìı sǫǫ̀mbaekwo-tǫą whehtǫ, weyìı yak'e gots'ǫ łèt'è “manna,” wìyeh whela. Eyıts'ǫ Aaron wegeè wek'e ı̨t'ǫ̀ą xàłaı̨kı̨ ı̨lèe sìı, eyıts'ǫ kwe nàke wek'e Nǫ̀htsı̨ nàowodeè hoònǫ whehtsı̨ dek'eèhtł'èe sìı eyı sı ladzè yìı whela. 
Eyı sǫǫ̀mba ladzè wegodoo sìı Nǫ̀htsı̨ weyak'eet'ı̨į̀ hòèlı̨ı̨ nàke weghǫhk'eè nàgewo. Dǫ gıhołı̨į̀ k'èxa eyı ladzè weka edoò agehɂı̨ı̨ sìı wegodoo yak'eet'ı̨į̀ gı̨ı̨ts'ǫǫ̀ ełèedì. Hanìkò dıì sìı eyı hazǫǫ̀ wek'ayats'ehtı ha dìì. 
T'asìı hazǫǫ̀ hanì sınìhogį̀ı̨ɂǫ tł'axǫǫ̀ yahtıı ets'ǫdaa gòɂǫǫ goyìı edılaà ghàlageeda ha, dzę taàt'eè goyageedè. 
Hanìkò yahtıı-wet'àaɂàa-deè ededı̨ zǫ enìı̨t'ı weɂı̨į̀ denahk'e degaı k'è gòɂǫǫ sìı goyaetła hǫt'e, ı̨łè xo ı̨łàà ekǫ goyaetła. Edoò wedę goyaetła hǫı̨lı̨ nıìle; eyı sìı edehołı̨į̀ k'èxa eyıts'ǫ dǫ hołı̨ı̨ hogehtsı̨ kò gık'èezǫ-le sìı k'èxa Nǫ̀htsı̨ ts'ǫ̀ edoò ladzè weka ayehɂı̨. 
Hanıı nàowo wet'à Yedàyeh Nezı̨ı̨ dıı wek'èts'eezǫǫ̀ agǫ̀ǫ̀là: Nǫ̀htsı̨ gha nı̨hbàa ı̨łaà nàı̨hɂa et'ıì Denahk'e Degaı K'è gòɂǫǫ sìı gots'ǫ̀ eneètǫ hǫt'e. 
Eyı hazǫǫ̀ dıì weghàà nànıts'edè gha adlà hǫt'e. T'asìı hazǫǫ̀ Nǫ̀htsı̨ ghàgele eyıts'ǫ t'asìı Nǫ̀htsı̨ ts'ǫ̀ gık'eehk'ǫ̀ǫ sìı wet'à dǫ gınì deghàà degaı ade ha nıìle. 
Eyı nàowo t'à gıat'į̀ı̨ sìı t'asìı weghǫ shèts'ezhee, t'asìı ts'edǫ eyıts'ǫ edenàowoò k'ę̀ę̀ edek'enagehtse hanıı zǫ t'à agıat'į̀ ı̨lè. Nǫ̀htsı̨ nàowogòò goxè whehtsı̨ gots'ǫ̀ edezhį̀į̀ gha eyıts'ǫ edılà t'à hanì zǫ eghàlageeda ha dìì-le ı̨lè. 
Zezì-Krı yahtıı-wet'àaɂàa-deè k'ę̀ę̀ nììtła ekò nàowo denahk'e nezı̨ı̨ goxè hòɂǫǫ̀ ayį̀į̀là. Denahk'e degaı nı̨hbàa yìı gogha eghàlaı̨dà. Eyı nı̨hbàa dǫlà t'à hòèlı̨-le eyıts'ǫ dıı nèk'e gots'ǫ nıìle. 
Sahzǫǫ̀ eyıts'ǫ ejıezaa wedoò t'à goyaı̨za nıìle, hanìkò edı̨į̀ Denahk'e Degaı K'è gòɂǫǫ sìı xàè ededoò t'à goyaı̨za hǫt'e. Įłàà zǫ hanì gogha eghàlaı̨da hǫt'e eyıts'ǫ ededoò t'à welǫ whìle ts'ǫ̀ gohołı̨į̀ ch'à edaxàgole gha ajà hǫt'e. 
Moses wenàowoò k'ę̀ę̀ sahzǫǫ̀ eyıts'ǫ ejıezǫǫ̀ gıdoò eyıts'ǫ ejıezaa gots'ǫ łèbè dǫ gızhį̀į̀ degaı adlà-le sìı k'e agehɂı̨. Eyı haget'ı̨ t'à ehkw'ı agììdlà xè gızhį̀į̀ t'à degaı lanì agììdlà. 
Zezì wedoò eyı nahk'e godzeè k'enaı̨htso hodeè hǫt'e. Zezì t'asìı wejıı wek'e wheɂǫ-le sìı Yedàyeh Nezı̨ı̨ wedahxà Nǫ̀htsı̨ ghàdìtı̨ t'à, t'asìı wet'àaɂà-le k'alats'ı̨ı̨dè ch'à godzeè k'enaı̨htso hǫt'e, hanì-ı̨dè Nǫ̀htsı̨ edaa sìı k'ǫǫ̀t'a wegha eghàlats'eeda ha dìì-le. 
Eyı ts'ıhɂǫ̀ Zezì-Krı nakenahòdlı̨ı̨ wegòò k'ę̀ę̀ dǫ eyıts'ǫ Nǫ̀htsı̨ gogha tanı wheda hǫt'e. Įłaà nakenahòdlı̨ı̨ wezǫą tł'a geèhkw'e ekò dǫ gıhołı̨į̀ k'èxa ełaı̨wo t'à nàgeekwa ch'à agǫ̀ǫ̀là. Eyıt'à dǫ gıkayaetıı sìı Nǫ̀htsı̨ dǫ xè yatı whehtsı̨ k'ę̀ę̀ welǫ whìle ts'ǫ̀ geeda ha. 
Dǫ ełaàwı tł'axǫǫ̀ t'asìı wets'ǫ sìı weyatıì k'ę̀ę̀ adle gha enı̨htł'è whehtsı̨ nı̨dè, eyı dǫ ełaı̨wo hotıì wek'èedzǫ nı̨dè zǫ weyatıì k'ę̀ę̀ eghàlageeda hǫt'e. 
Dǫ ı̨łaà eda et'ıì weyatıì dek'eèhtł'è wek'ę̀ę̀ eghàlageeda nıìle, dǫ hotıì ełaı̨wo nı̨dè zǫ wenı̨htł'è k'ę̀ę̀ eghàlageeda hǫt'e. 
Nakenahòdlı̨ı̨ t'akwełǫ̀ǫ̀ hòèlı̨ı̨ sìı eyı kò t'asìı ełaı̨woo wedoò wedę nı̨dè ayìı dek'eèhtł'èe sìı wek'ę̀ę̀ agode ha dìì ı̨lè. 
Moses nàowo hazǫǫ̀ dǫ ts'ǫ̀ yek'eyaı̨htı tł'axǫǫ̀, ejıezaa wedoò, tı xè yìhchı gà sahzǫ̀ą weghàà dek'o eyıts'ǫ hyssop wekw'ıhchı̨į̀ t'à Nǫ̀htsı̨ wenı̨htł'è eyıts'ǫ dǫ hazǫǫ̀ gok'e ayį̀į̀là. 
Eyı xè dıı hadı, “Nǫ̀htsı̨ dıı nakenahòdlı̨ı̨ wek'èahdì ha naxèhdıı sìı, dıı edoò wegha hǫt'e,” gòhdı ı̨lè. 
Eyı xèht'eè Nǫ̀htsı̨ gha nı̨hbàa nàı̨ɂaa k'e eyıts'ǫ weyìı t'asìı hazǫǫ̀ whelaa t'à-aget'ı̨ı̨ sìı k'e edoò ayį̀į̀là. 
Moses wenàowoò k'ę̀ę̀ ha nı̨dè tıts'aàdìı wedoò t'à t'asìı hazǫǫ̀ degaı adle ha hǫt'e, eyıts'ǫ edoò xàı̨tł'ı lenǫsıı dǫ gıhołı̨į̀ gıghǫ nahoezhe ha dìì hǫt'e. 
Yak'e k'ę̀ę̀ t'asìı hòèlı̨ı̨ sìı tıts'aàdìı wedoò t'à degaı adle ha hǫt'e, hanìkò xàè yak'e gots'ǫ ne sìı eyı wenahk'e t'asìı deè t'à degaı adle ha hǫt'e. 
Zezì-Krı sìı nı̨hbàa dǫlà t'à hòèlı̨ı̨ k'è goyaı̨za nıìle, eyı nı̨hbàa sìı yak'e degaı k'è gòɂǫǫ k'ę̀ę̀ hòèlı̨ı̨ hǫt'e. Zezì xàè yak'e goyaı̨za hǫt'e, dıì Nǫ̀htsı̨ nadąą̀ gogha nàwo hǫt'e. 
Dıı nèk'e yahtıı-wet'àaɂàa-deè Denahk'e Degaı K'è gòɂǫǫ sìı xo taàt'eè xàè ededoò xè goyaetła-le hǫt'e, hanìkò Zezì ı̨łàà zǫ yak'e goyaı̨za hǫt'e, k'achı̨ ełaàwı gha Nǫ̀htsı̨ ghàdìtè ha nıìle. 
Hanì-le nı̨dè Zezì dıı nèè hòèlı̨ gots'ǫ gǫtłǫǫ̀ daı̨ɂa ha ı̨lè. Hanìkò dıì nǫǫde dzęę̀ ts'ǫ̀ nìhǫǫwoo sìı ı̨łàà zǫ nììtła hǫt'e, welǫ whìle ts'ǫ̀ gohołı̨į̀ whìle ayele gha Nǫ̀htsı̨ ghàdìtı̨. 
Dǫ ı̨łàà zǫ ełaàwı ha hǫt'e, eyı tł'axǫǫ̀-ı̨dè Nǫ̀htsı̨ nadąą̀ wesınìyaetı ha. 
Eyı lanì Zezì-Krı ı̨łàà zǫ dǫ łǫ gıhołı̨į̀ k'èxa ełaàwìgwo, eyıts'ǫ k'achı̨ nàke t'à nììtła ha. Dǫ-hołı̨į̀ k'èxa k'achı̨ daı̨ɂa gha nììtła ha-le, hanìkò dǫ gıdanaèhɂı̨ı̨ sìı edaxàgole gha ade ha. 
