﻿James.
4.
Ayìı ts'ıhɂǫ̀ ełets'ǫ̀ ààhch'e xè ełek'èch'a aahdı? Naxıdzeè yìı hołı̨ı̨ nàowoò naxık'alawo t'à ełets'ǫ̀ ààhch'e hǫt'e. 
T'asìı łǫ dahwhǫ hanìkò naxıghǫ̀t'à hǫı̨lı̨-le. Dǫ eyıì-le t'asìı gıts'ǫ sìı naxıdzeè t'à weahwhǫ hanìkò naxıghaelı̨ ha dìì, eyıt'à dǫ ełaahwhı xèht'e lanì. Ełets'ǫ̀ naxınì-le xè ełetawhıahdè. Nǫ̀htsı̨ weahkè-le ts'ıhɂǫ̀ t'asìı naxıghǫ̀t'à nıìle. 
Weahkè sǫnı kò t'asìı naxıghǫ̀t'à-le nı̨dè naxınì ekǫ-le t'à weahkè ts'ıhɂǫ̀ hǫt'e. T'asìı naxıghǫ̀t'ǫ nı̨dè sìgoèt'ı̨ı̨ zǫ ts'ǫ̀ wek'ehoahwhı ha dahwhǫ. 
Naxı̨ sìı Nǫ̀htsı̨ k'èch'a aaht'ı̨ hǫt'e. Dıı nèk'e gots'ǫ dǫ gıàgı̨ą ts'ı̨ı̨lı̨ nı̨dè Nǫ̀htsı̨ wedzats'ı̨ı̨hwhǫ hǫt'e, wek'èahsǫ-le nì? Amìı dıı nèk'e ts'ǫ nàowołı̨ı̨ k'ę̀ę̀ at'ı̨ı̨ sìı Nǫ̀htsı̨ ts'ǫ̀ xànıɂaà ade ha hǫt'e. 
Dıı hanì Nǫ̀htsı̨ Nı̨htł'è k'e dek'eèhtł'è, “Wets'ǫ Įnì Degaı godzeè yìı nàdè ayį̀į̀là, wets'ǫ Įnì Degaı deghàà wets'ǫ ts'ı̨ı̨lı̨ ha goı̨hwhǫ hǫt'e.” Dıı hanì dek'eèhtł'èe sìı ekìı ahodı dahwhǫ nì? 
Hanìkò edesǫnıwǫǫ̀ denahk'e gots'ǫ̀ ayehɂı̨ hǫt'e. Hanì ts'ıhɂǫ̀ Nǫ̀htsı̨ Nı̨htł'è dıı hadı: “Nǫ̀htsı̨ sìı dǫ xàhodì k'èch'a at'ı̨, hanìkò dǫ k'èeweèt'ı̨ı̨ elı̨ı̨ sìı ts'ǫ̀ wedzeè sǫnıwǫ hǫt'e,” dek'eèhtł'è. 
Eyıt'à Nǫ̀htsı̨ ghàdeahtè xè wek'èaht'e. Wehłı̨ı̨ ch'à edek'èahdì, hanì-ı̨dè naxıts'ǫǫ̀ naetła ha. 
Nǫ̀htsı̨ ts'ǫ̀ nıwà-le aahde, hanì-ı̨dè ededı̨ sı naxıts'ǫ̀ nıwà-le ade ha. Naxı̨ hołı̨ı̨-hoahtsı̨ı̨-dǫǫ̀ aaht'ee sìı naxıhołı̨į̀ wedę aahłe, eyıts'ǫ naxınì nàke laaht'ee sìı naxıdzeè degaı aahłe. 
Edek'eahłı̨ t'à naxıdzeè nànııtì xè hòtł'ò aahtse. Nàɂaahdlò nı̨dè dıì aahtse, naxınà nı̨dè dıì ts'ǫǫ̀dahwhǫ. 
Nǫ̀htsı̨ wenadąą̀ edek'eahłı̨ nı̨dè naxıts'àdı xè naxıxè sìghà hòɂǫ ayele ha hǫt'e. 
Sèot'ı̨ı̨, ełıızì jıı aahtsı̨-le. Amìı edèot'ı̨ ghǫ gode, hanì-le-ı̨dè yesınìyaehtıı sìı, Nǫ̀htsı̨ nàowoò k'èch'a gode xè yesınìyaehtı hǫt'e. Nǫ̀htsı̨ nàowoò wesınìyaahtı nı̨dè wenàowoò k'ę̀ę̀ aahda nıìle, wek'èch'a goahde hǫt'e. 
Nǫ̀htsı̨ zǫ gogha nàowo whehtsı̨ xè gosınìyaehtıı elı̨ hǫt'e, ededı̨ zǫ edaxàgole ha, hanì-le-ı̨dè godıhohtsı̨ ha. Hanìkò naxı̨ sìı naxèot'ı̨ gısınìyaahtı ha naxıghàhòt'ǫ nıìle. 
Seàhkw'ǫ; naxı̨ mǫ̀hdaa dıı haahdı, “Dıı dzęę̀ hanì-le-ı̨dè satsǫ eyıì-le kǫ̀ta gòlaa ts'ǫ̀ ats'ede ha. Įłè xo ekǫ nàts'edè gà ekǫ eghàlats'eeda ha, eyıts'ǫ sǫǫ̀mba łǫ ts'ehtsı̨ ha,” dahdı. 
Ayìıha hanì goahde? Satsǫ dàgode ha sìı wek'èahsǫ nıìle. Whaà-lea gots'ǫ̀ ɂàh gòhłè eyı tł'axǫǫ̀-ı̨dè dàwhìdì at'į̀, eyı laaht'e. 
Ehkw'ı goahde xè dıı haahdı welì, “Gots'ǫ̀ K'àowo hanıwǫ nı̨dè, ts'eedaa xè dıı hats'ele ha, hanì-le-ı̨dè eyı hats'ele ha,” haahdı welì. 
Hanìkò naxı̨ sìı xàdahoahdì lanì goahde. Hanì xàdahots'edìı sìı hołı̨ı̨ hots'ehtsı̨ hǫt'e. 
Amìı ehkw'ı eghàlaeda ha yek'èezǫ kò yek'ę̀ę̀ eghàlaeda-le nı̨dè hołı̨ı̨ hoehtsı̨ hǫt'e. 
