﻿1 Korin.
5.
Dia̧ tua̧mó, beta̧ whi̧né ama alimané dokale sotei a̧ dokalepó dere fo wosalepó. Atéró ayané dokale sotei dokotere alata, mo nópu nokole alatóró ai dere ape. Ti Kótó tuȩ́ inire whi̧nékélé atei kaae mo sonaalei ala dumipó. 
Aita dowi ala du betepatei, diaao̧ kisipané wisi ala dapóló bopé faketu beterapó. Ai ala deremó, dia̧ dekȩné sukuturaalu, atétere whi̧ dia̧tamo touyóló betao̧sóró, ho̧kó falua̧sóró mo wisi ua̧pó. 
Ti ȩ dia̧tamo bitini kae betepatei, da̧ fea tua̧mó mo beta̧ kepetóró betereteiné ȩ dia̧tamo beterapó. Ti ȩ kaae betóo, dia̧ kae betóo epatei, ȩ aimó biture kaae, ai ala yale whi̧ ya̧lo mo só deró beterapó. 
Dia̧ fea da̧ tȩteróló kaae tare whi̧ Yesuné doimó touróló betóo, ya̧lo kepekélé diaao̧ kepetamo beta̧mó betóo, Tale Yesuné ama matere fotoko̧ su̧mó buóo epa, ti ai whi̧ a̧ Satan-né naase tua̧mó mulae. Atétepa, ti ama tó tiki doraalotei, Tale waaire be dȩmó, ama kepe bete tao saalo ai ape. 
Ti ai whi̧ ho̧kó faréni, ha̧le betepatei wisirapóló bopé faketere ala mo dorapó. Mo sawatamo o̧la yist-nétei flawa o bula doasi tópuratere ala diaao̧ kisipa inié? 
Dia̧ta, kisi flawa o kaae ai betere ape. Térapa, yist bunire kisi flawa o kaae alée fóló betaasepóló, upulé flawa omó bulótua yale moi yist sokóló tae falae. Ti noatepae, da̧né yale dowi alamó Kótóné da̧ kwia melaai yaletei, ha̧sókó faróló, sipsip hupu male Kótópaae ha̧le melóló sukunapó. Atéyale sekȩ́ta me kae mei, da̧ tȩteróló kaae tare whi̧ Keriso ai ape. 
Atéremó, Talepaae mo kée yóló o̧la deturaalu, take flawa omó bulale moi yist sokóló taae falae. Ai yist-ta, dowi tuȩ́ mutere alaró du betale kae kae sonaalei dowi alatamopó. Ai ala taaróló, yist bunire otóró deóló naalopó. Tétu, u dei tuȩ́ mulutei tó tikiné ha̧le siki̧li dere ala ini, Talené mo alatóró erótu betereteita, ti kale yist bunire o kaaepó. 
Take ya̧lo dia̧paae folosóró asȩmó, nópu nokole so whi̧tamo fulumu yao̧se yale fota, i haemó betó mole nópu nokole so whi̧ ó o̧la o̧la mo dekéró senée yóló ekȩle du betere so whi̧ ó me whi̧ dilikó̧ló o̧la o̧la su betere so whi̧ ó kapala kótópaae momatu betere so whi̧tamo fulumu yao̧se yóló inipó. Keriso so whi̧nétei ai dosa̧ayale alarapetamo du betepa, ti atétere so whi̧tamo fulumu yao̧se yóló yalepó. Ti i haemó betó mole mo so whi̧ tuȩ́ mutu ya̧lo i fo ua̧sóró, ti mé tikikómo dowi ala munipa, aipaae biti̧ fae fo ua̧é? 
Ya̧lo i dere asȩta, mepaae so whi̧né dia̧paae a̧ta naao Keriso nopó du bitutei, nópu nokole ala ó o̧la o̧la senée yóló ekȩle dere ala ó kapala kótópaae momatu betere ala ó whi̧né doi doróló eratere fo ó topo dotere wȩi mo dekéró nóló keyaa fole ala ó me whi̧ dilikó̧ló o̧la o̧la o̧lémi sere alakélé fea du betepa, ti ai so whi̧tamo fulumu dere ala momókó yao̧se. Tétu, beta̧mó o̧la nokole alakélé mo yao̧se. 
Keriso so whi̧ mei, belapaae ha̧le betere so whi̧né dere ala taleyóló só derae fo Talené da̧paae inipó. Ti taletere alata, Keriso so whi̧ dia̧sisi maaté yae erapó. 
Ti ha̧le belapaae betó mole mo so whi̧ taletere alata, Kótóné beta̧ enérapó. Térapa, “Dia̧ tua̧mó dowi ala ha̧le yó tare whi̧ dia̧tamo touyóló betao̧sóró kae beteró̧póló, ho̧kó falae,” ere fo diaao̧ kisipa yaasepóló i dere ape. 
