﻿Gárada joun ja Adímurejabalin Hebréo.
1.
Lídan meja dan le sügǘjalibei, adímurejati meja Búngiu joun binádu wagǘbürigu sarágu weíyaasu lúma lídan sarágu luwúyeri, jádaangiñe profétagu, 
guetó, lídoun buri lagúmujoún dan le, adímurejaali woun lídaangiñe Liraǘ. Lídaangiñe Liraǘ le, ladǘgei uboú, áni rúlaali sun cátei lun. 
Arúfuda lumúti Liraǘ Búngiu luweírigun Lúguchi luoúgua, ligía méme Búngiubei, ligía ágüdajabalin sun cátei láu lerérun le gabáfubei. Lárigiñe lachíbuni wafígoun, ába lañúurun lueígiñe loúnwenren lála Búngiu, le Súnti Gabáfu, siélu. 
Ñǘbinjali Liraǘ Búngiu lun weírigubei lan jaweí ánjeligu, resíbijali ában ubáraü íñugutimaati jaweí queísi lalágaante queísi Liraǘ Búngiu. 
Maríñagunti Búngiu ni ában weíyaasu lun ni ában ánjeli. Niraǘ amǘrü, rúnaali ubáraü le bun ugúñe, maríñagun ligía luágu ni ában ánjeli. Áuba Búguchi, amǘrüme nisáani. 
Ánjeinti dán meja le loúnajaabalin Liraǘ le ábanrügüti uboúagun, aríñagati. Judúgua jamá sun náni ánjeligu lun. 
Laríñaga jawágu ánjeligu. Adǘgatina lun ítara jamá náni ánjeligu camá garábali, adǘga áu lun ítara jamá camá wátu geméti, oúnagüleigu jagía ja esériwidubadina. 
Ánjeinti lun Liraǘ aríñagati Búngiu ítara. Búngiu, lúntibei súnwandan bañúurun luágu bála lun barúeijan, láu ában úaraguni bagúmadija. 
Jínsiñeti le richáguabei bun, iyéreeguti le wuríbabei bun, ligía níchugunbei, áu le Bubúngiute, gíbetima ugúndani bídoun sügǘ jáu bíbirigu. 
Áriñagati gíñe. Amǘrü le Abúremein, lídan lagúmeseja, adǘga bumúti uboú, láu bújabu badǘgei siélu. 
Lagúmuchuba siélu lúma uboú, ánjein amǘrü, beréderuba lun sun dan. Liábiba siélu lúma uboú lun laweíyadun quei anáanguni, 
babáruchagubaña quei ában daǘguaü, jasáansirúaba quei anáanguni. Ánjein amǘrü, ában mémebadibu, magúmuchunbei bibágari. 
Maríñagunti Búngiu ni ában weíyaasu lun ni ában ánjeli. Ñurúba lueígiñe noúnwenren darí lun nagáñeiragüdünibu jawágu báganiñu, ru náñame bújaburugun. 
Sun ánjeligu, espíritugu esériwidutiña lun Búngiu jagía, oúnajoútiña lun jíderaguniña ja lúnbaña jerésibiruni asálbaruni lídaangiñe jafígoun. 
