﻿Salmos.
56.
Jogueroporaei va'e pe “Apykaxu yvyra mombyrygua rupi ikuai” he'ia py oporaeia rami oporaei aguã Davi ombopara va'ekue Gate tetã py filisteu kuery ojopy ramo (1 Samuel 21.10-15). Xeruete, xemboaxy ke, mba'eta avakue xejukaxe okuapy. Ára pukukue re xemoingo axy xerero'a vy. 
Xere opu'ã va'e xejukaxe okuapy. Heta ete ikuai xere opu'ã va'e onhemboyvatevexe vy. 
Akyjea aendu vy ajerovia 'rã ndere. 
Nhanderuete re ajerovia, ijayvua arovy'a guive. Nhanderuete re ajerovia vy ndakyjei 'rã mba'eve gui. Mba'e 'rã tu imarã va'e ojapo kuaa xere? 
Ára pukukue re ha'e kuery omombe'u 'rã xeayvukue ramigua. Onhembopy'aa ma xere ojapo vai aguã anho. 
Nhomboatypa okuapy nhemi rupi, oma'ẽ mbegue 'rã aikoa re oikuaa pota vy, xemomba aguã oarõ vy. 
Embopaga ha'e kuery ojapo vaiague re. Xeruete, eitypa yvy regua kuery ndepoxya py. 
Reipapa ma ajexavaia rupi aikoague. Xerexay voi remboyrupa nde'yryru py. Xerekokue ha'e javi e'ỹ teve ipara ndekuaxia re? 
Ndevy ajapukaia ára guive xerovaigua kuery ojepe'apa 'rã. Aikuaa porã Nhanderuete xereve oikoa. 
Nhanderuete re ajerovia, ijayvua arovy'a guive. Senhor re ajerovia, ijayvua arovy'a guive. 
Nhanderuete re ajerovia aguã amoĩ vy ndakyjei 'rã mba'eve gui. Mba'e 'rã tu avakue ojapo kuaa xere? 
Xeruete, ndevy anhemboayvuague ajapo ete 'rã, roguerovy'a ete 'rã guive. 
Mba'eta manoa gui xerekovea reraa jepe, xepy guive reraa jepe ha'a aguã gui, Xeruete renonde aiko aguã hexakã nhomoingovea rupi. 
