﻿Salmos.
129.
Oguataa rupi ikuai va'e oporaei aguã. Xekunumi guive mbovykue rei e'ỹ xembojexavaia — Israel kuery aipo te'i — 
Xekunumi guive xembojexavaia okuapy teĩ xere nda'ipo'akaai. 
Xekupe rupi xekaraĩmbaa ma, yvy karaĩa py rami xemboperepa vy. 
Ha'e rami teĩ Senhor heko porã va'e vy ojayapa heko vai va'e xejokuaague. 
Sião tetã re opu'ã va'e ha'e javi toxĩmba, tojavapa guive. 
Oo áry mba'emo rogue henhoĩ vy ipoty e'ỹ re ipirupa va'e rami avi tokanhymba. 
Ha'e nunga mba'everã ndovarei ramo avave rei opo py nomono'õai, neĩ ojyva áry ndojokuaai heruvy guive. 
Ha'e kuerya rupi oaxa va'e kuery aipo te'i eme: “ Senhor topena porã pendere! Senhor rery rupi ore rogueroayvu porã!” te'i eme. 
