﻿लूका.
7.
याग यीशु लॉकुर से ई सप्पा मातगोळ अंद बुट्टुन, रा कफरनहूम नगर दा होदुन. 
अल यावारा सौ रोमी सिपाहीगोळ्द सूबेदार उन ऊंद दास जो आऊन प्रिय ईरोन, बिमारी देल सायोर मा ईरोन. 
आव यीशु उन चर्चा केळकु यहूदीगोळ्द हापाळ स्याणागोळी आऊन से ईद विनती माळली आऊन हात्‍ती कळुदुन कि बंदकु नान दास उक चंगा माळुल. 
आंदुर यीशु उन हात्‍ती बंदुर, अदिक आऊन से धोळ विनती माळकु अनली हतदुर, “आव ई लायक आन कि नी आऊन साटी ई सप्पा माळ सक्या, 
यतिकी आव नाम जाती से प्यार ईटतान, अदिक आवा नाम यहूदी लॉकुर्द सभागृह कटकु कोटान.” 
यीशु आंदुर सांगुळ होदुन, लेकीन याग आव मान्ना अन्द हात्‍ती पोहचुसदुन, रा सुबेदार आऊन हात्‍ती तान संगीगोळी ईद अनली कळुदुन, “हे प्रभु नी तान तान इक यक्कुल कष्ट कोळबाळ, यतिकी ना ई लायक हैलेच कि नी नान मान्ना अन्द छपर्या ताका बर सक्या. 
ईदा कारण ना तान तान इक ई लायक भी समसिदिल कि ना नीन हात्‍ती बराईन, लेकीन सिर्फ आग्या कोटबुळ रा नान सेवक चंगा आगेदान. 
ना भी वास्तव दा शासन इन हात्‍ती आईन, अदिक सिपाही नान हात्‍ती आर; अदिक याग ऊंद सिपाही इक अनतीन, ‘होग,’ रा आव होगतान; अदिक दुसरा से अनतीन, ‘बर,’ रा बरतान; अदिक तान यावारा दास उक अनतीन कि ‘अमुक क्याल्सा माळ,’ रा आव अदा माळतान.” 
ईद केळकु यीशु उक अचम्भा आत अदिक आव मार्रा तिर्गुसकु आ भीळ से जो आऊन हिंद बरोद, अंदुन, “ना नीम से अनतीन कि ना इस्त्राएल दा भी हिंग विश्वास नोळीदील.” 
अदिक जो कळुकु आगिदुर आ लॉकुर मान्या बंदकु आ दास उक चंगा नोळदुर. 
थ्वाळासा दिन इन बाद्दा यीशु नाईन हेसुर इन ऊंद नगर दा होदुन. अल आऊन चेलागोळ अदिक धोळ्द भीळ आऊन सांगुळ होगोद. 
याग यीशु नगर इन फाटक इन हात्‍ती पोहचुसदुन, रा लॉकुर ऊंद मुर्दा अक व्हार्या वोयोर; जो तान मोय इन ऊंदा पार ईरोन, अदिक आक रांड्या ईरोर; अदिक नगर इन हापाळ सा लॉकुर आकिन सांगुळ ईरोर. 
आकी नोळकु प्रभु उक दया बत्‍त, अदिक आव आकिन से अंदुन, “वर्लबाळ.” 
आग आव हात्‍ती बंदकु सकोली इक मुटदुन, अदिक सकोली नेगावाळेर रूकसेदुर. आग आव अंदुन, “हे जवान, ना नीन से अनतीन, येळ!” 
आग आ सोतकु पार यदकु कुरतुन, अदिक आ पार माताळली कुरतुन. बाक आव आ पार उक आऊन मोय इक सोप्स बुट्टुन. 
इदुर देल सप्पा मुंदुर मा अंज्क तुम्मेत, अदिक आंदुर परमेश्वर उन बळाई माळकु अनली हतदुर, “नाम न्याड्या दा ऊंद धोड्डेव भविष्यवक्ता बंदान, अदिक परमेश्वर तान लॉकुर मा कृपा दृष्टी माळ्यान.” 
अदिक आऊन बारा दा ईद मात सप्पा यहूदिया अदिक आसपास इन सप्पा प्रदेश दा फैलुसेत. 
बपतिस्मा कोळावाळा यूहन्ना अक आऊन चेलागोळ ई सप्पा मातगोळ्द समाचार कोट्टुर. 
आग यूहन्ना तान चेलागोळ दा टु येढ्ढ मुंदुर इक कारूकु प्रभु उन हात्‍ती ईद केळली कळुदुन, “येन बरावाळा नीना हुय, या नाव यावारा दुसरा अन्द हादी नोळेव?” 
आंदुर यीशु उन हात्‍ती बंदकु अंदुर, “यूहन्ना बपतिस्मा कोळावाळा नामी नीन हात्‍ती ईद केळली कळ्यान कि येन बरावाळा नी अच हुय, या नाव यावारा दुसरा अन्द हादी नोळेव?” 
अदा समय आव हापाळ सा लॉकुरी बिमारगोळ देल अदिक दुखगोळ अदिक दुष्टआत्मागोळ देल चंगा माळदुन; अदिक हापाळ सा कुढ्ढ मंळसागोळी कण्ण कोट्टुन; 
अदिक आव आंदुर से अंदुन, “जो येनारा नीव नोळीर अदिक केळीर, होगकु बपतिस्मा कोळावाळा यूहन्ना से अंदबुळी; कि कुढ्ढगोळ नोळतार, अदिक लंगळा नळुतार अदिक टेटतार, कोढ़ी लॉकुर शुद्ध माळकु आगतार, बयरागोळ केळतार, मुर्दागोळ जित्‍ता माळकु आगताव, अदिक कंगालगोळी खुशखबरी केळ्सकु आगतद. 
धन्य आर आंदुर जो नान बारा दा ठोकर तिनालुर.” 
याग बपतिस्मा कोळावाळा यूहन्ना अन्द कळुद लॉकुर होटोदुर रा यीशु यूहन्ना अन्द बारा दा लॉकुर से अनली कुरतुन, “नीव आळी दा येन नोळली होगीदिर? येन हवा देल हालुस्द सरकण्डागोळी?” 
रा बाक नीव येन नोळली होगीदिर? येन मुलायम कपळा हाग्द मंळसा अक? जो भळकीला कपळा हाकतार अदिक सुखविलास देल ईरतार, आंदुर राजभवनगोळ दा ईरतार. 
रा बाक येन नोळली होगीदिर? येन यावारा भविष्यवक्ता अक? हव, ना नीम से अनतीन, उलटा भविष्यवक्ता से भी धोड्डेव उक. 
ईव आवा यूहन्ना हुन, यार्द बारा दा लिख्सकु आद: “परमेश्वर अंदुन, ना तान स्वर्गदूत उक नीन मुंद-मुंद कळुतीन, जो नीन मुंद अपमान हादी सरका माळ्यान.” 
“ना नीम से अनतीन कि जो आर्तेर दा टु पैदा आग्यार, आंदुर दा टु यूहन्ना बपतिस्मा कोळावाळा से धोड्डेव यारू हैलेच. पर जो परमेश्वर उन राज्य दा स्याण से स्याणेव आन, आव आऊन से भी धोड्डेव आन.” 
अदिक सप्पा साधारण लॉकुर केळकु अदिक कर ताकोमावाळेर भी यूहन्ना अन्द बपतिस्मा ताकोमकु परमेश्वर उन हादी इक खरा मान्स कोंडुर. 
लेकीन फरीसीगोळ अदिक व्यवस्थापकगोळ यूहन्ना से बपतिस्मा ईला ताकोमकु तान संबंध दा परमेश्वर उन योजना अक अस्वीकार माळदुर. 
“इदुरसाटी ना ई पीढ़ी इन लॉकुर्द तुलना यार देल कोळाईन कि आंदुर यार घाई आर? 
इंदुर आ चिकोर घाई आर जो सात्‍तागोळ दा कुर्तकु ईरतार अदिक आबुर दाबुरी इक कारूकु अनतार, ‘नाव नीम साटी कोळ्ल मुर्सदेव, अदिक नीव कुणदीदिल; नाव विलाप इन हाळ हाळदेव, अदिक नीव वर्लीदिल!’ 
यतिकी यूहन्ना बपतिस्मा कोळावाळा ना रा रोट्टी तिंत बंदुन अदिक ना अंगुर इन रास्सा कुडुत बंदुन, अदिक नीव अनतीर, ‘आऊन दा दुष्टआत्मा आद.’ 
ना मंळसा अन पार तिंत-कुडुत बंदीन, अदिक नीव अनतीर, ‘नोळी, व्हाट्टा तुम्मावाळा अदिक कुडावाळा मंळसा, कर ताकोमावाळेर अदिक पापीगोळव संगी.’ 
जो लॉकुर परमेश्वर उन ग्यान स्वीकार माळतार आंदुर साबित माळतार कि अद ग्यान खरा आद.” 
बाक यावारा ऊंद फरीसी यीशु से विनती माळदुन कि आव आऊन सांगुळ ऊमली कुरूल, इदुरसाटी यीशु आ फरीसी इन मान्या होगकु ऊमली कुरतुन. 
आ नगर इन ऊंद पापी आर्त ईद जान्सकु कि आव फरीसी इन मान्या ऊमली कुरतान, संगमरमर इन बाटुल दा ईत्‍तर तंदुर, 
अदिक आऊन कालगोळ हात्‍ती, हिंद निदुरकु, वर्लतेला आऊन कालगोळी आसुगोळ देल नेनाकली अदिक तान ताल्ला अन्द चुट्टी देल सिटली हतदुर, अदिक आऊन कालगोळ्द घळी-घळी चुम्मा ताकोमकु अऊर मा अत्‍तर मलुसदुर. 
ईद नोळकु आ फरीसी याव यीशु उक कारदिदुन, तान मन दा सोचली कुरतुन, “अगर ईव भविष्यवक्ता ईरायदुन रा जान्सेगायदुन कि इक जो आऊक मुटेत्यार, आक यार अदिक ह्यांग आर्त आर, यतिकी आक रा पापीगीत आर.” 
यीशु आऊन उत्‍तर दा अंदुन, “हे शमौन, नानी नीन से येनारा अनोद आद.” आव माताळदुन, “हे गुरु, अन.” 
यीशु अंदुन, “यावारा महाजन उन येढ्ढ कर्जदार ईरोर, ऊंद अईद सौ चाँदी इन सिक्‍कागोळ्द अदिक दुसरा पचास सिक्‍का अन्द कर्जदार ईरोन. 
याग आंदुर्द हात्‍ती चुकुसली येनु ईतीदील, रा आव येढ्ढु मुंदुर इक माफ माळ बुट्टुन. इदुरसाटी आंदुर दा टु याव आऊन से यक्कुल प्यार ईट्यान?” 
शमौन उत्‍तर कोट्टुन, “नान समझ देल आव, यार्द आव यक्कुल बिट बुट्टुन.” आव आऊन से अंदुन, “नी बराबर विचार माळ्या.” 
अदिक आ आर्त इन दी तिर्गकु आव शमौन से अंदुन, “येन नी ई आर्त इक नोळीत्या? ना नीन मान्या बंदीन लेकीन नी नान काल तोळोर साटी नीर कोटीदील, पर इक नान काल आसुगोळ देल नेनाकदुर अदिक तान चुट्टीगोळ देल सिटदुर. 
नी नानी चुमसीदिल, पर यागी टु ना बंदीन आगी टु इक नान कालगोळ्द चुम्मा ताकोमोद बिटीदिल. 
नी नान ताल्ला मा याण्णा मलुसिदिल, पर इक नान कालगोळी ईत्‍तर मलुस्यार. 
इदुरसाटी ना नीन से अनतीन कि ईकीन पाप जो हापाळ ईरव, माफ आदव, यतिकी इक हापाळ प्यार माळदुर; पर यार्द थ्वाळा पाप माफ आग्याव, आव थ्वाळा अच प्यार माळतान.” 
अदिक यीशु आ आर्त इन से अंदुन, “नीन पाप माफ आदव.” 
आग जो लॉकुर यीशु उन सांगुळ ऊमली कुर्तकु ईरोर, आंदुर तान-तान मन दा विचार माळली हतदुर, “ईव याव हुन जो पापगोळी भी माफ माळतान?” 
बाक यीशु आ आर्त इन से अंदुन, “नीन विश्वास नीनी ऊळ्सबुटाद, शांती देल होटोग.” 
