﻿लूका.
10.
ई मातगोळ्द बाद्दा प्रभु यीशु मात्‍त बहात्‍तर मंळसागोळी नियुक्त माळदुन, अदिक याता-याता नगर अदिक जागा अक आव होगली ईरोन, अल आंदरी येढ्ढ-येढ्ढ माळकु तान मुंद कळुदुन. 
यीशु आंदुर से अंदुन, हण्ण केई हापाळ आव, पर क्याल्सा माळावाळेर मजदुर गोर्त आर; इदुरसाटी फसल इन स्वामी से विनती माळी कि आव तान फसल कडोर साटी मजदूर कळु बुळुल. 
होगी; ना नीमी म्यांडागोळ घाई लांडग्यागोळ न्याड्या कळुतीन. 
इदुरसाटी तान सांगुळ ना चीला, ना झ्वारा, ना केरूगोळ हुडी; अदिक ना हादी मा यारदारा से नमस्कार माळी. 
यातारा मान्या होगी, पयले अनी, “ई मान्ना मा कल्याण आगुल.” 
अगर अल यावारा कल्याण इन लायक ईतीदान, रा नीम कल्याण आऊन मा ईत्‍तीत, ईलारा नीम हात्‍ती वापस बंदीत. 
अदा मान्या ईरी, अदिक जो येनारा आंदुर से सिक्‍कीत, अदा तिनी-कुडी, यतिकी मजदूर उक तान मजदूरी सिक पायजे; मान्या-मान्या टेटबाळेतीर. 
या नगर दा नीव होगी, अदिक अलेर लॉकुर याग नीम स्वागत माळ्यार रा जो येनारा नीम मुंद ईटकु आदीत अदा तिनी. 
अलेर बिमारगोळी चंगा माळी अदिक आंदुर से अनी, “परमेश्वर उन राज्य हात्‍ती होट बंदाद.” 
लेकीन या नगर दा होदिर, अदिक अलेर लॉकुर नीमी ग्रहण माळतीदील, रा आंदुर्द गलीगोळ दा होगकु अनी, 
“नीम विरोध दा नाव नीम नगर इन धुळा अक भी जो नाम कालगोळ मा हत्याद झाळ्स कोळतेव; फिर भी ईद जान्स कोमी कि परमेश्वर उन राज्य नीम हात्‍ती होट बंदाद.” 
ना नीम से अनतीन कि आ दिन परमेश्वर न्याय माळ्यान आ दिशी सदोम इन दशा आ नगर से हापाळ गुणा सहन माळा लायक ईत्‍तीत. 
“हाय खुराजीन! हाय बैतसैदा! जो सामर्थ्य ईनव क्याल्सा नीम दा माळकु आदव, अगर अव सूर अदिक सैदा दा माळकु आगायदव रा बॉरा होदुकु अदिक राख दा कुर्तकु आंदुर यागुटु मन तिर्गुसायदुर. 
लेकीन न्याय इन दिन सूर अदिक सैदा अन्द दशा नीम से यक्कुल सहन माळा लायक ईत्‍तीत. 
अदिक हे कफरनहूम, येन नी स्वर्ग ताका म्याकुच नेगुकु आद्या? नी पाताल लोक ताका ल्यालमा होद्या.” 
यीशु तान चेलागोळ से अंदुन, “जो नीम केळतान, आव नान केळतान; अदिक जो नीमी तुच्छ जान्सतान, आव नानी तुच्छ जान्सतान; अदिक जो नानी तुच्छ जान्सतान, आव नान कळावाळेर इक तुच्छ जान्सतान.” 
आंदुर बहात्‍तर चेलागोळ खुशी माळतेला बंदुर अदिक अनली हतदुर, “हे प्रभु, नीन हेसुर देल दुष्टआत्मा भी नाम आग्या मान्सताव.” 
यीशु आंदुर से अंदुन, “ना शैतान उक बिजली इन घाई स्वर्ग टु बिळ्स नोळीन. 
केळी, कि ना नीमी हाव अदिक पुरा सामर्थ्य मा अधिकार कोटीन; अदिक नीमी येनु हानि आगतीदील. 
फिर भी ईदुर देल खुश आगबाळी कि आत्मा नीम वश दा आद, लेकीन इदुर देल खुश आगी कि नीम हेसुर स्वर्ग दा लिख्सकु आद.” 
आ समय यीशु पवित्र आत्मा दा आगकु खुशी देल तुम्मेदुन, अदिक अंदुन, हे आप्पा, स्वर्ग अदिक पृथ्वी नव प्रभु, ना नीन धन्यवाद माळतीन कि नी ई मातगोळी आंदुर से जो ग्यानी आर अदिक कल्त माळकु लॉकुर से होचकोमकु ईट्द, अदिक चिकोरगोळ मा प्रगट माळ्द. हव, हे आप्पा, यतिकी नीनी ईदा वळ्लीद हत्‍त. 
नान आप्प नानी सप्पा येनारा सोप्स बुट्टुन; अदिक याऊ जान्सालुन कि पार याव हुन सिर्फ आप्प, “अदिक आप्प याव हुन ईद भी याऊ जान्सालुन सिर्फ पार अदिक आव यार मा पार अदरी प्रगट माळोद चाहासतान.” 
आग चेलागोळ दी तिर्गकु आबना दा अंदुन, “धन्य आव अव कण्णगोळ, जो ई मातगोळ जो नीव नोळतीर अव नोळताव. 
यतिकी ना नीम से अनतीन कि हापाळ सा भविष्यवक्तागोळ अदिक राजागोळ चाहासदुर कि जो मातगोळ नीव नोळतीर आंदुर नोळुल पर नोळीदील, अदिक जो मातगोळ नीव केळतीर आंदुर केळुल पर केळीदील.” 
अदिक ऊंद व्यवस्थापक येद्दुन अदिक ईद अनतेला यीशु उन परीक्षा माळली कुरतुन, “हे गुरु, अनन्त जीवन सिकोद साटी ना येन माळाईन?” 
यीशु आऊन से अंदुन, “मूसा अन्द व्यवस्था दा येन लिख्सकु आद? नी ह्यांग वाचुसत्या?” 
आव उत्‍तर कोट्टुन, “मूसा अन्द व्यवस्था अनतद, ‘नी प्रभु तान परमेश्वर से तान सप्पा मन अदिक तान सप्पा जीव अदिक तान सप्पा शक्ति अदिक तान सप्पा बुद्धी इन सांगुळ प्यार ईट अदिक तान मान्ना हातळोर से तान घाई प्यार ईट.’” 
यीशु आऊन से अंदुन, “नी बराबर उत्‍तर कोट्ट, ईदा माळ रा नी जित्‍ता ईत्या.” 
लेकीन आव तान तान इक न्यायी ठहरूसोद इच्छा देल यीशु से केळदुन, “रा नान मान्ना हातळोर याव हुन?” 
यीशु उत्‍तर कोट्टुन, “ऊंद मंळसा यरूशलेम टु यरीहो अक होगोन कि डाकूगोळ आऊक घेर्सकु आऊन कपळा ईळ्स बुटुर, अदिक बडु माळकु आऊक सायोर साटी बिटकु होटोदुर. 
अदिक हिंग आत कि अदा हादी देल ऊंद याजक होगोन, लेकीन आऊक नोळकु आव अनदेखा माळदुन अदिक होटोदुन. 
ईदा रीति देल ऊंद लेवी भी आ जागा मा बंदुन, आव भी आऊक अनदेखा माळकु होटोदुन. 
लेकीन ऊंद सामरी जाती नव यात्री अल टु होगोन, अदिक आऊक नोळकु आऊन मा तरस तिंदुन. 
आव आऊन हात्‍ती बंदकु आऊन जखमगोळ मा याण्णा अदिक अंगुर इन रास्सा हाक्‍कु पट्टी कटदुन, अदिक तान सवारी मा येर्सकु आऊक सरई दा ओतुन, अदिक आऊन स्यावा टहल माळदुन. 
दुसरा दिन आव येढ्ढ बेळ्ली इन सिक्‍का तेगुकु सरई इन मालिक उक कोट्टुन, अदिक अंदुन, ‘ईऊन स्यावा टहल माळेत, अदिक जो येनारा अपमान दी टु हत्‍तीत, अद ना वापस बंदुर मा नीनी तुम कोळाईन.’” 
ईग यीशु “नीन विचार देल ई मुरू दा टु आ मंळसा अन्द जो डाकूगोळ्द कय दा सिक्‍केगीदुन, याव मान्ना हातळोर आदुन?” 
आव अंदुन, “आवा याव आऊन मा दया माळदुन.” यीशु आऊन से अंदुन, “होग, नी भी हिंग अच माळ.” 
याग आंदुर होगोर रा यीशु ऊंद ऊर दा होदुन, अदिक मार्था हेसुर इनोर ऊंद आर्त यीशु उन तान मान्या स्वागत माळदुर. 
मरियम हेसुर इनोर आकिन ऊंद आकतींग ईरोर. आक प्रभु उन कालगोळ दी कुर्तकु आऊन वचन केळतोगोर. 
लेकीन मार्था स्यावा माळ्त-माळ्त व्याकुल आगेदुर, अदिक आऊन हात्‍ती बंदकु अनली हतदुर, “हे प्रभु, येन नीनी येनु अच चिन्ता हैलेच कि नान आकतींग नानी स्यावा माळोद साटी आबना अच बिट बुटार? इदुरसाटी आकिन से अन कि नान सहायता माळुल.” 
प्रभु आक इक उत्‍तर कोट्टुन, “मार्था, हे मार्था; नी हापाळ मातगोळ्द साटी चिन्ता माळत्या अदिक व्याकुल आगत्या. 
लेकीन ऊंद मात जरूरी आद, अदिक आ वळ्लीद भाग इक मरियम चुनुस कोंडार जो आकिन से कस्तकु आगतीदील.” 
