﻿यूहन्ना.
10.
“ना नीम से खरा खरा अनतीन कि जो यावारा दरवाजा टु म्यांडाशाला दा प्रवेश माळालुन, लेकीन दुसरा दी टु येरतान, आव काल्ळ अदिक डाकू हुन. 
लेकीन जो दरवाजा टु बुळ्क प्रवेश माळतान आव म्यांडागोळ्द चरवाहा हुन. 
आऊन साटी चौकीदार दरवाजा खोल्स बुळतान, अदिक म्यांडा आऊन आवाज केळताव, अदिक आव तान म्यांडागोळी हेसुर ताकोम ताकोमकु कारूतान अदिक व्हार्या वोयतान. 
याग आव तान सप्पा म्यांडागोळी व्हार्या तेगु कोमतान, रा अऊर मुंद मुंद नळुतान, अदिक म्यांडागोळ आऊन हिंद हिंद आगेगताव, यतिकी अव आऊन आवाज अरूताव. 
लेकीन अव दुसरा अन हिंद होगतीदील, लेकीन आऊन से दुर ओळेव, यतिकी अव दुसरा अन आवाज अरालव.” 
यीशु आंदुर से ईद उदाहरण अंदुन, लेकीन आंदुर समसीदील कि ईव याता मातगोळ हु जो आव नाम से अनतान. 
आग यीशु आंदुर से मात्‍त अंदुन, “ना नीम से खरा खरा अनतीन, म्यांडागोळ दरवाजा ना हुईन. 
यास नान से पयले बंदुर आंदुर सप्पा काल्ळुर अदिक डाकू उर, लेकीन म्यांडागोळ आंदुर्द केळीदील. 
दरवाजा ना हुईन; अगर यावारा नान द्वारा बुळ्क प्रवेश माळ्यान, रा उद्धार सिक्‍कीत, अदिक बुळ्क व्हार्या होग्त बर्त ईत्‍तान अदिक चारा सिक्‍कीत. 
काल्ळ यातोदारा क्याल्सा अन साटी ईला लेकीन सिर्फ चोरी माळली अदिक घात माळली अदिक नाश माळली इक बरतान; ना इदुरसाटी बंदीन कि आंदरी जीवन सिक्‍कुल, अदिक हापाळ जीवन सिक्‍कुल.” 
“वळ्लेव चरवाहा ना हुईन; वळ्लेव चरवाहा म्यांडागोळ साटी तान जीव कोळतान. 
मजदूर जो ना चरवाहा आन अदिक ना म्यांडागोळ मालिक आन, लांडग्या अक बर्त नोळ म्यांडागोळी बिटकु वोळेगतान; अदिक लांडग्या अवरी हुडुतद अदिक तितर बितर माळ बुळतद. 
आव इदुरसाटी वोळेगतान कि आव मजदूर हुन, अदिक आऊक म्यांडागोळ चिंता हैलेच. 
वळ्लेव चरवाहा ना हुईन; ना तान म्यांडागोळी जान्सतीन, अदिक नान म्यांडागोळ नानी जान्सताव. 
ह्यांग आप्प नानी जान्सतान अदिक ना आप्प उक जान्सतीन अदिक ना म्यांडागोळ साटी तान जीव कोळतीन. 
नान अदिक भी म्यांडागोळ आव, जो ई म्यांडाशाला अन आल्लच. नानी अवरी भी तरोद जरूरी आद. अव नान आवाज केळेव, आग ऊंद अच झुण्ड अदिक ऊंद अच चरवाहा ईत्‍तान. 
आप्प इदुरसाटी नान से प्यार ईटतान कि ना तान जीव कोळतीन कि अदरी मात्‍त ताकोम कोमाईन. 
याऊ अदरी नान से कसालुन, लेकीन ना अदरी खुद अच कोळतीन. नानी आऊंद कोळोद भी अधिकार आद, अदिक अदरी बाक ताकोम कोमोद भी अधिकार आद: ईद आग्या नान आप्प उन देल नानी सिक्याद.” 
ई मातगोळ कारण यहूदीगोळ दा मात्‍त फूट बिदोत. 
आंदुर से हापाळ सा लॉकुर अनली कुरतुर, “आऊन दा दुष्टआत्मा आद, अदिक आव येर्र आन; आऊंद येती केळतीर?” 
अन्य लॉकुर अंदुर, “ई मातगोळ ईत्‍ता मंळसा नव आल्लच यारदा दुष्टआत्मा आद. येन दुष्टआत्मा कुढ्ढगोळ कण्णगोळी खोल्स सकतद?” 
यरूशलेम दा स्थापना हाब्ब मनुस्कु आगोद; अदिक सोळ इन दिन ईरव. 
यीशु मंदिर दा सुलैमान उन छपर्या दा टेटाळोन. 
आग यहूदीगोळ आऊक बंदकु घेर्सदुर अदिक केळदुर, “नी नाम मन इक यागासताका दुविधा दा ईट्या? अगर नी मसीह हुय रा नाम से साफ साफ अंद बुळ.” 
यीशु आंदरी उत्‍तर कोट्टुन, “ना नीम से अंद बुटीन पर नीव विश्वास अच माळालीर. जो क्याल्सा ना तान आप्प उन हेसुर देल माळतीन अव अच नान गवाह हु, 
लेकीन नीव इदुरसाटी विश्वास माळालीर यतिकी नीव नान म्यांडागोळ दा टु आल्लच. 
नान म्यांडागोळ नान आवाज केळताव; ना अवरी जान्सतीन, अदिक अव नान हिंद हिंद नळुताव; 
अदिक ना अवरी अनन्त जीवन कोळतीन. अव यागलु नाश आगतीदील, अदिक याऊ अवरी नान कय दा टु कसु सकालुन. 
नान आप्प, याव अवरी नानी कोटान, सप्पा से धोड्डेव आन अदिक याऊ अवरी आप्प उन कय देल कसु सकालुन. 
ना अदिक नान आप्प ऊंद आयेव.” 
यहूदीगोळ आऊन मा पथराव माळोर साटी मात्‍त कल्लगोळी नेगदुर. 
इदुर मा यीशु आंदुर से अंदुन, “ना नीमी तान आप्प उन दी टु हापाळ सा भला क्याल्सा तोर्सदीन; अऊर दा टु याता क्याल्सा अन साटी नीव नान मा पथराव माळतीर?” 
यहूदीगोळ आऊक उत्‍तर कोट्टुर, “भला क्याल्सा अन साटी नाव नीन मा पथराव माळालेव लेकीन परमेश्वर उन अपमान माळोद कारण; अदिक इदुरसाटी कि नी मंळसा आगकु भी तान तान इक परमेश्वर माळत्या.” 
यीशु आंदरी उत्‍तर कोट्टुन, “येन नीम व्यवस्था दा लिख्सकु हैलेच, ‘ना अंदीन, नीव मय हुईर?’ 
अगर आव आंदरी मय अंदुन यार हात्‍ती परमेश्वर उन वचन पोहचुस्त अदिक शास्त्र अन मात ख्वाटा आग सकालव. 
रा यारी आप्प पवित्र ठहरूस्कु दुनिया दा कळुदुन, नीव आऊन से अनतीर, ‘नी अपमान माळत्या,’ इदुरसाटी कि ना अंदीन, ‘ना परमेश्वर उन पार हुईन?’ 
अगर ना तान आप्प उन क्याल्सा माळालीन, रा नान विश्वास माळबाळी. 
लेकीन अगर ना माळतीन, रा चाहे नान विश्वास भी माळबाळी, लेकीन आ क्याल्सागोळ्द रा विश्वास माळी, ताकी नीव जान्सी अदिक समसी कि आप्प नान दा आन अदिक ना आप्प दा आईन.” 
आग आंदुर मात्‍त आऊक हुडोद कोशिश माळदुर लेकीन आव आंदुर कय दा टु होटबुटुन. 
बाक आव यरदन इन आप्पाटी आ जागा मा ओळेदुन, यल यूहन्ना पयले बपतिस्मा कोळतोगोन, अदिक अल्या ईत्‍तुन. 
हापाळ सा लॉकुर आऊन हात्‍ती बंदकु अनतोगोर, “यूहन्ना रा यातोदु चमत्कार तोरसीदील, लेकीन जो येनारा यूहन्ना ईऊंद बारा दा अंदिदुन, अद सप्पा सही ईरोद.” 
अदिक अल हापाळ सा लॉकुर यीशु मा विश्वास माळदुर. 
