﻿रोमियों.
16.
ना नीम से फीबे अन साटी जो नाम आकतींग अदिक किंख्रिया अन मंडली नोर सेविका आर, विनती माळतीन 
कि नीम, ह्यांग कि परमेश्वर उन लॉकुरी पायजे, आकी प्रभु दा ग्रहण माळी; अदिक यातोदारा मात दा आकी नाम जरवत आद, आकिन मदत माळी, यतिकी आक भी हापाळ मुंदुर्द बल्‍की नान भी मदत माळावळ्त ईतार. 
प्रिस्का अदिक अक्विला अक जो मसीह यीशु दा नान सहकर्मी आर, नमस्कार. 
आंदुर नान जीव इन साटी तांद अच जीवन जोखिम दा हाक बुटीदुर; अदिक सिर्फ ना अच ईला, बल्‍की गैरयहूदीगोळ्द सप्पा मंडलीगोळ भी आंदुर्द धन्यवाद माळतद. 
आ मंडली अक भी नमस्कार जो आंदुर मान्या आद. नान प्रिय इपैनितुस उक, जो मसीह अन साटी आसिया प्रांत इन पयला फल आद, नमस्कार. 
मरियम इक, याक नीम साटी हापाळ मयनत माळदुर, नमस्कार. 
अन्द्रुनीकुस अदिक यूनियास उक जो नान घरजनी नोर आर, अदिक नान सांगुळ कैद आगीदुर अदिक प्रेरितगोळ दा हेसुर वाळेर आर, अदिक नान से पयले मसीह आगीदुर, नमस्कार. 
अम्पलियातुस उक, जो प्रभु दा नान प्रिय संगी आन, नमस्कार. 
उरबानुस उक, जो मसीह दा नाम सहकर्मी आन, अदिक नान प्रिय इस्तखुस उक नमस्कार. 
अपुल्लोस उक जो मसीह दा सही होट्टुन, नमस्कार. अरिस्तुबुलुस उन घराना इक नमस्कार. 
नान रिश्तेदार हेरोदियोन यहूदी संगी इक नमस्कार. नरकिस्सुस उन घराना इन जो लॉकुर प्रभु दा आर, आंदरी नमस्कार. 
त्रूफेना अदिक त्रूफोसा अक जो प्रभु दा मेहनत माळतार, नमस्कार. प्रिय पिरसिस उक, याव प्रभु दा हापाळ मेहनत माळदुन नमस्कार. 
रूफुस उक जो प्रभु दा निवळुस्कु आन अदिक आऊन मोय इक, जो नान भी मोय उर, येढ्ढु मुंदरी नमस्कार. 
असुंक्रितुस, फिलगोन, हिर्मेस, पत्रुबास, हिर्मास अदिक आंदुर सांगुळ इन वार्टुर अदिक आकतींगेरी नमस्कार. 
फिलुलुगुस, यूलिया, नेर्युस अदिक आकिन आकतींग, अदिक उलुम्पास अदिक आंदुर सांगुळ इन सप्पा परमेश्वर उन लॉकुरी नमस्कार. 
आपस दा पवित्र चुम्बन देल नमस्कार माळी. नीमी मसीह अन सप्पा मंडलीगोळ दी टु नमस्कार. 
ईग हे वार्टुरा अदिक आकतींगेरा, ना नीम से विनती माळतीन, कि जो लॉकुर आ शिक्षा अन विपरीत, जो नीमी सिक्याद, फूट हाक्‍कोद अदिक ठोकर तिनसोद कारण बन्सतार, आंदरी अर्त कोमी अदिक आंदुर से दुर ईरी. 
यतिकी हिंग लॉकुर नाम प्रभु मसीह नोर आल्लच, लेकीन तान व्हाट्टा अन स्यावा माळतार; अदिक चिकना चुपळा मातगोळ देल सीधा साधा मन इन लॉकुरी बयकुस बुळतार. 
नीम आग्या मानसोद चर्चा सप्पा लॉकुर दा फैलुसेत, इदुरसाटी ना नीम बारा दा आनन्द माळतीन, लेकीन ना ईद चाहासतीन कि नीव भलाई इन साटी बुद्धिमान लेकीन बुराई इन साटी भोला बन्सकु ईरी. 
शांती इन परमेश्वर शैतान उक नीम कालगोळ देल राटनेरी मेटसुस बुट्टान. नाम प्रभु यीशु मसीह अन अनुग्रह नीम मा आगतेला ईरूल. 
नान सहकर्मी तीमुथियुस उन, अदिक नान घराना इन लूकियुस, यासोन अदिक सोसिपत्रुस ई नान यहूदी संगीगोळ्द नीमी नमस्कार. 
ना चिट्ठी लिखसावाळा तिरतियुस उन, प्रभु दा नीमी नमस्कार. 
(२४) गयुस जो नान अदिक मंडली अन पाहुनचार माळावाळा आन, आऊन नीमी नमस्कार. इरास्तुस जो नगर इन भंडारी आन, अदिक वार्ट क्वारतुस उन नीमी नमस्कार. 
आ परमेश्वर उन महिमा आगुल नीम विश्वास ईग जो नीमी नान खुशखबरी मतलब यीशु मसीह अन संदेश इन प्रचार इन अनुसार स्थिर माळ सकतद, परमेश्वर उन ई रहस्य पुर्ण सत्य युगयुग टु होचकु ईरोद, 
लेकीन ईग प्रगट आगकु सनातन परमेश्वर उन आग्या देल भविष्यवक्तागोळ्द किताबगोळ द्वारा सप्पा जातीगोळी हेळकु आग्याद कि आंदुर विश्वास देल आग्या मानसावाळेर आगेगुल, 
आवा सिर्फ ऊंद बुद्धिमान परमेश्वर उन यीशु मसीह अन द्वारा हमेशा हमेशा महिमा आगतेला ईरूल. आमीन.
