A Umana Kakailai.
29.
A kakailai kai David. Avat a umana natu i God, avat a tul tar tai ra Luluai, Avat a tul tar tai ra Luluai ra variru ma ra dekdek. 
Avat a tul tar tai ra Luluai ra variru ba na topa ra iangina; Avat a lotu tadav ra Luluai ma ra gomgom na minong. 
A nilai ra Luluai i ki taun ra polo; Ra God na minamar i pangpagur, Ra Luluai, i ki taun ra ngala na polo. 
A nilai ra Luluai i dekdek tuna, A nilai ra Luluai i mamar mat. 
A nilai ra Luluai i bubur ra umana tagatagal; Maia pa, ra Luluai i bubur gigi ra umana tagatagal Lebanon. 
I vapil dir da ra nat na bulumakau; Lebanon ma Sirion da ra nat na bulumakau i leing. 
A nilai ra Luluai i tulue ra umana kulameme. 
A nilai ra Luluai i vadadar ra bil, Ra Luluai i vadadar ra bil Kades. 
A umana me dia kakava ta ra nilai ra Luluai, A nilai ra Luluai i rama vue ra lavur mapina davai ta ra pupui. Ma ra lavur mangana par ta ra kubana dia biti: Variru! 
Ra Luluai i ga ki na king ta ra lovon ta, Maia pa, ra Luluai i ki na king pa na mutu. 
Ra Luluai na tul tar ra dekdek ta ra taraina; Ra Luluai na vadoane ra taraina ma ra malmal.