A Umana Kakailai.
68.
Kai nina i lue ra kakailai; a kakailai kai David. Boina ba God na tut, ma boina ba da korot varbabaiane kana umana ebar; Boina ba diat bula dia milikuane, diat a lop kan ra luaina matana. 
Da ra vuvu i kap vue ra mi, damana una korot vue diat; Da ra bulit na livur i polo ta ra iap, Damana ra umana tena varpiam diat a virua ta ra luaina mata i God. 
Boina ba ra umana tena takodo diat a ga; Boina ba diat a gugu mat ta ra luaina mata i God; Maia, diat a gugu ma diat a ga. 
Avat a kakailai tadav God, avat a kakailai na pite varpa tadav ra iangina; Avat a mal ra bo na nga ure nina i vutvut bolo ta ra bil; A iangina “Ra Luluai”; ma avat a gugu mat ta ra luaina matana. 
God ta kana pal tabu I da ra tutana ba na vamel ra nat na ling, Ma ia ra tena varkurai ba na mari ra umana ua na vavina. 
God i vaki ra kekene ta ra pal, I pala vue diat dia ki ra pal na banubat, ma i tavua kadia tabarikik. Ma ra pue ngangar na ki ta ra gunan i maramararang. 
God, ba u ga lue rap kaum tarai, Ba u ga bolo ta ra bil; Sela. 
A gunan i ga guria, A umana bakut dia ga bura ta ra luaina mata i God, Maia, Sinai akanama i ga dadadar ta ra luaina mata i God, a God kai Israel. 
U, God, u ga tul tar ra ngala na bata, Ma u ga valagar kaum gunan ba i ga talatalanguan. 
Kaum kor na tarai dia tar ki tana; Ta kaum varmari, God, u ga vanvaninare ra magit ure ra umana biaui. 
A Luluai i tul tar ra tinata, A ngala na kor na vaden dia varvarvai. 
A umana king kai ra lavur loko na tarai na vinarubu dia takap, dia takap; Ma ra vaden ba dia ki ka ra kuba i diat dia tibe ra tabarikik di rara pa ia. 
Ba ava va livuan ta ra umana kikil na sip, I da ra bebea i ra uka i bagabagele da ra silva, Ma ra ivuna i gobol da ra goled. 
Ba ra Dekdek Muka i ga korot varbaiane ra umana king tana, I ga da ra bata i pua aro Salmon. 
A luana Basan ia ra luana kai God; A luana Basan i manga tuluai urama. 
Avat a umana luana ba ava manga tuluai urama, ta ra ava ava matana varpin, Ure ra luana vang, nina God i ga pilak pa ia ba na ki tana? Maia, ra Luluai na ki tana pa na mutu. 
A umana kiki na vinavana kai God dia peal na kaia, Maia, a umana arip na marmar ma ta umana arip na marmar mulai. A Luluai i ki livuan ta diat, Sinai i ki ta ra pal tabu. 
U tar tutua urama, u tar ben vavilavilau ra kini na vilavilau; U tar alube pa ra vartabar tai ra tarai; Maia, ta diat bula ra umana tena varongongoi, upi ra Luluai God na ki pire diat. 
Da pite pa ra Luluai, nina i puak pa kada kinakap ta ra bungbung par, Maia, da pite pa God nina i valavalaun dat. Sela. 
God ia ra God na maramaravut pire dat. Ma i tale ra Luluai God ba na tul tar ta nga da pila kan ra minat i tana. 
Ma God na pamar ra lor i kana lavur ebar, Ma na kutu vue ra tagal a ulu i diat dia papait vatikene kadia varpiam. 
A Luluai i biti: Ina vatalil diat maro Basan, Ina vatalil diat mara ra marumian na ta; 
Upi una puk ra kaum ta ra gapu i kaum lavur ebar, Upi ra karamea i kaum lavur pap diat a vatur vake kadia tiniba tana. 
God, di tar gire kaum vinavana, Maia, ra vinavana kai kaugu God, kaugu King, ba i ruk ra pal tabu. 
A umana tena kakailai dia vana na lua, a umana tena ubuubu pagol dia murmur; Diat ma ra umana inip na vavina ba dia par ra kudu. 
Avat a pite pa God ta ra lavur kivung na tarai, Maia, avat ava tamana ma Israel, avat a pite pa ra Luluai. 
Beniamin ra ikilik akari kadia tena varkurai, A umana luluai Iuda ma kadia kivung, A umana luluai Sebulun, ma ra umana luluai Naptali. 
God, una vaarike ra dekdekim, God, una ongor, u ba u ga papalum maravut avet; 
Tago ure kaum gomgom na pal arama Ierusalem, A umana king diat a kap tabar u. 
Una bor bat ra umana kaina leing ta ra pupui, A kor na bulumakau ma ra umana nat na bulumakau kai ra tarai, Nina dia rua vakavakaina ra lavur pakana silva; Una korot varbabaiane ra lavur vuna tarai dia gugu ta ra vinarubu. 
A umana luluai diat a vana rikai maro Aigipto; Etiopia na tulue lolole pa ra limana upi God. 
Avat a umana vuna gunan ta ra rakarakan a gunagunan, avat a kakailai tadav God; Avat a kakailai na pite varpa tadav ra Luluai; Sela. 
Tadav nina i vutvut arama liu iat ra ul a bakut, nina ba amana iat i tana; Ea, i tata, ma i ngala tuna ra nilaina. 
Avat a mulaot ba God i dekdek; Kana bo na varmari i ki pire Israel, Ma i vaarike ra dekdekina arama ra ul a bakut. 
God, u ti enana tuna ba u arikai kan kaum pakana i tabu; Ra God kai Israel i tabar kana tarai ma ra niongor ma ra dekdek. Da pite pa God!