A Umana Kakailai.
96.
Avat a kaile ra kalamana kakailai tadav ra Luluai, Avat par ta ra rakarakan a gunagunan, avat a kakailai tadav ra Luluai. 
Avat a kakailai tadav ra Luluai, avat a pite pa ra iangina; Avat a vaarike kana valavalaun a bungbung par. 
Avat a varvai ure kana minamar pire ra umana Tematana, Ma ure kana lavur enana papalum pire ra lavur vuna tarai par. 
Tago ra Luluai i ngala, ma i kat ba da manga pite pa ia; I topa ia ba da ru ia ma ra umana enana god pata. 
Tago ra lavur god kai ra tarai par a umana magit vakuku diat, Ma ga ra Luluai i ga pait ra bala na bakut. 
A variru ma ra minamar i tur ta ra luaina matana. A dekdek ma ra minong i ki ta kana pal tabu. 
Avat a lavur apik na tarai, Avat a tul tar ra variru ma ra varkurai tai ra Luluai; 
Avat a tul tar ia tai ra Luluai ra variru ba na topa ra iangina; Avat a kap ra tinabar, ma avat a olo ta kana gunan. 
Avat a lotu tadav ra Luluai ma ra gomgom na minong; Avat par ta ra rakarakan a gunagunan, avat a dadadar ta ra luaina matana. 
Avat a biti livuan ta ra lavur Tematana: Ra Luluai i ki na king; I tar vaki bulu ra rakarakan a gunagunan ma pa na takari; Na kure ra tarai ma ra takodo na varkurai. 
Boina ba ra bala na bakut na gugu ma ra rakarakan a gunagunan na ga; A ta na roro, ma ra lavur mangana i kor tana; 
A pupui na kukula ma ra gugu, ma ra lavur magit i ki tana; Io, a lavur davadavai ta ra lokalokor diat a kakailai na gugu; 
Ta ra luaina mata i ra Luluai, tago i vut; Tago i vut upi na kure ra rakarakan a gunagunan; Na kure ra rakarakan a gunagunan ma ra takodo na varkurai, Ma ra lavur vuna tarai ma ra dovotina.