﻿Luk.
4.
E Iesu i bukus ana Talngan Tabu. Ning i han mito na malum Jodan, a Talngan Tabu i nigoni uting na hanua bel. 
I kes tingia diat a bonot a pukakiar pa bel i hangan, pa e Satan i lari. Ning ka rop a pukakiarla ning, i murak. 
Pa e Satan i atai i mange, “Ning u a Nat e God, ur atai a hat ne sur ir hanot a bret.” 
E Iesu i kelesi mang, “Di ka tumus tari ting na Buk Tabu mange, ‘A tarai bel la laun ka ana utna na hangan.’” 
E Satan i ben pasi ana ning a pukna tisaot, pa ana tuka kamis ka, i asangan tar a hananuala rop ana rakrakan hanua tana. 
Pa i atongi tana mang, “Ar tabar u ana matatar inla rop pa ana rakrakai sur ur ningnigo anunala rop, anasa di ka saran tari tak, pa ar sarani tetek tik ning a mang suri. 
Ning ur lotu tetek iau, a ututnala rop ne anumi ka.” 
E Iesu i atongi tana mang, “Di ka tumus tari ting na Buk Tabu mange, ‘Ur lotu tetek a Leklek anuma God, pa ur longor ka tana.’” 
Pa e Satan i ben pasi usaot e Jerusalem, pa i atur tari sot ot na pukul a rumai a artabar. Pa i atongi tana mang, “Ning u a Nat e God, ur sirok purum mite, 
anasa di ka tumus tari ting na Buk Tabu mang, ‘Ir warwara tetek anuna angelola sur lar tai alar wakak u. 
Lar tong pas u ana kunla, sur gong u buh a ham ana ta hat.’” 
E Iesu i kelesi mang, “Di ka atong tari ting na Buk Tabu mang, ‘Gong u lar a Leklek anuma God.’” 
Ning e Satan ka lam tari, i han pas kaba kusuni. 
E Iesu i ulak utumo na papar Galili ana rakrakai ana Talngan Tabu, pa a warwara onoi i han sarara ana papar rop ning. 
Pa e Iesu i asaer a tarai ana nunla na rumai a lotula, pa la rop la atong leklek pasi. 
Ning e Iesu i hanot to e Nasaret, a hanua ning i itna tar ono, i kas uting na rumai lotu ana Pukakiar Sabat, arlar ot ana nuna toltol, pa i tur sur ir wawas. 
Pa di saran tar a buk anuna propet Aisaia teteki. I sapang a buk ning di ka in tari, pa i pastek pas a pukna ning di ka tumus tari onoi mange, 
“A inguna Leklek i kes hok, anasa ka aslang pas iau sur ar warawai ana wakak a warwara tana kapan a tarai. I sune iau sur ar warawai mange, dir paksen la ning di dot akes tar la, dir apalpalas ulak la ning a matanla i kut, pa dir alangolango la ning la kilang a mamahatla ning di tol tari onla, 
pa ar warwara ana rau a marmaris anuna Leklek, ning onone ka hanot.” 
I in ulak a buk ning, i sarani tetek a tena titol, pa i kes. A taraila rop tingui na rumai lotu la ngoson rakrakai i, 
pa i atai la mange, “A warwara ne mulo longori, di ka tolsot pasi anone.” 
La gas pasi, pa la kulkulan ana nuna wakak a warwara. Pa la atongi onoi mang, “A barsan ne a nat e Josep ka, gepi?” 
Pa i atai la mang, “Sakana mulor atong a ngas a warwarala ne hok: ‘Dokta, ur alangolango pas u ot! A ututnala ning mila longori mang u ka tol tari to e Kapernaum, i wakak ning ur toli otleng te na num a hanua.’” 
Pa e Iesu i atai la mang, “A atong momoli ta mulo, bel ta propet di sira gas pasi ting na hanua ngasna. 
A momolna ot mang a galis a lao la kes tumo e Israel ana rau ane Elaija, ning natol a rau pa diono na kalang belal kiar, pa a tnan munurak i kibas a hananuala rop. 
Ika e God bel i sune e Elaija tetek ta te Israel, tetek a lao ka ana hanua Sarefat tumo na papar Saidon. Esaning bel a hane Israel. 
Pa a galis a lepra la kes tumo e Israel ana rau anuna propet Elisa, ika e God bel i alangolango tik tagun la, e Naman ka a barsan misaot e Siria, ning bel a te Israel.” 
A taraila rop ning la kes ting na rumai lotu, la bukus ana balakut, ning la longor a warwarala ne. 
La kamtur, pa la lu sen e Iesu kusun a nunla hanua. La ben pasi saot na mangir ning la tol anunla hanua onoi, sur lar minggen purumi ting na ris a hat. 
Ika i han potor ana kunum a tarai, pa i han ana nuna tinan. 
Lamur e Iesu i han utumo e Kapernaum, ana papar Galili, pa i asaer la ana Pukakiar Sabat. 
La kulkulan ana nuna asasaer, anasa i asaer la lar arlar o esaning a warkurai kaning tana. 
Tingui na rumai lotu, ning a barsan kaning, a mot i solongi, i kukuk rakrakai mange, 
“Ai! U e Iesu a te Nasaret. Ur tol asa omila? U hanot sur ur alaulau mila? A tasman u ot, u a Tena Totoh ane God.” 
E Iesu i sairasi mange, “Gong u warwara! Purum kusun a barsan ning!” A mot i minggen purum tari namatanla rop, i purum kusuni, pa bel ta puka palaona i laulau. 
A tarai rop la kulkulan kol, pa la deke artalai la mang, “Esi na ngas a warwara ine? I tong a warkurai pa a rakrakai pa ana nuna warwara i kepsen sen a motla, pa la purum kakat.” 
Pa a warwara o e Iesu i han sarara ana hananuala rop ting na papar ning. 
E Iesu i purum kusun a rumai lotu, pa i han sur uting na rumai ane Saimon. Pa e anmuna e Saimon, a hane, i sasam ana laplapang, pa la nunung e Iesu sur ir nangani. 
Pa e Iesu i tur ting na ngasna, pa i kepsen a laplapang kusuni, pa a hane ning i langolango. Ano otning i kamtur, pa i tabar la ana utna na hangan. 
Ning ka rahmorom, a tarai la ben pas la ning la sasam ana urmatana tinsaman tetek e Iesu. Pa i suah naur a kuna onla taktakai, pa la langolango. 
Pa a motla otleng la purum kusun a galis, pa la kukuk mang, “U a Nat e God.” Ika e Iesu i sairas la, sur gong la warwara, anasa la tasmani ot mang i e Karisito. 
Ning ka kabakiar, e Iesu i han sur uting na hanua bel. A kunum a tarai la sereni. Ning la pasteteki, la tohi sur lar sairasi sur gong i han kusun la. 
Ika i keles la mang, “Ar warawai ana Wakak a Warwara ana matanitu ane God ana dingla na hananua masik otleng. Anasa ine a kamkamna ning i sune iau ute.” 
Pa i warawai amon ting na rumai lotula ana papar Judia. 
