Yontu.
41.
Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 
Leleŋ nɩɩlʋ ntɛ́ wei ɩ pɑɑsəɣənɑ ɑcɑmɑɑ tɔ. Mpi tɔ, Tɑcɑɑ ləsəɣɩ-ɩ wɑhɑlɑ tɑɑ kɛ́ kʋyɑkʋ ɩsɑɣɑʋ wule kɛ́. 
Ɩsɔ kentiɣi pʋntʋ weesuɣu tɔɔ kɛ́, nɑ ɩ́ cɑɣɑnɑ lɑŋhʋlʋmlɛ kɛ tɛtʋ tɔɔ. Ɩsɔ ɩɩ yeki nɑ yʋlʋ ɩnɩ ɩ́ hoti ɩ kolontunɑɑ səkpɑŋ tɑɑ. 
Tɑcɑɑ pɑɑsəɣənɑ-ɩ ɩ wʋsɑsɩ wɑɑtʋ kɛ́, nɑ ɩ fɛkɩ-ɩ. 
Mɑ kʋyɔɣɔtʋtʋ ntɛ́ sɩ: Mɑ pəntənɑ Tɑcɑɑ, ɩlɛ nyənɩ mɑ pətɔɔtəlɛ nɑ ń wɑɑsɩ-m. 
Mɑ kolontunɑɑ pɔɔsəɣənɑ nɑ mʋsʋŋ sɩ: Pəlee kɛ́ n kɑ́ sɩ nɑ pɑ́ sɔɔ nyɑ́ tɔɔ? 
Ye pɑ tɑɑ nɔɣɔlʋ kɔmɑ mɑ wiiluɣu pɔpɔtʋ tɔm kɛ́ ɩ yɔɣɔtəɣɩ sɩ ɩ hiki timpi ɩ kɑ cɑɣɑnɑ-m tɔ. 
Mpɑ pɑɑ cɑɑ-m tɔ pɑ kotiɣi kɛ́ nɑ pɑ́ wɛlətəɣɩ mɑ ɩsɑɣɑtʋ tɔm sɩ: 
Kʋtɔŋ ɩsɑɣɑʋ hɩɩsənɑ-ɩ, ɩ kɑɑ kʋlɩ. 
Hɑlɩ mɑ tɑɑpɑlʋ kʋpɑŋ wei mɑ́ nɑ-ɩ tə nɩɩkɑɣɑ təmɑ tɔm nɑ tə́ tɔkɩ mɑ mʋtʋ tɔ ɩ kʋlɑ mɑ tɔɔ. 
Hɑɩ, Tɑcɑɑ nyənɩ mɑ pətɔɔtəlɛ, nɑ ń kʋsɩ-m nɑ mɑ́ lɛɛtɩ-wɛ. 
Mpi pɩɩ hʋlɩ sɩ n sɔɔlɑ-m tɔɣɔlɛ wɑɑtʋ wei mɑ kolontunɑɑ kɑ́ yele koou sɩ mpɛ pɑ kəlɑ-m tɔ. 
N pɑɑsənɑ-m mɑ tɑmpɑnɑ təŋʋɣʋ tɔɔ, nɑ ń sɩɩ-m nyɑ́ ɩsɛntɑɑ kɛ tɑm tɔɔ. 
Tɑcɑɑ Ɩsɔ wei nyɑ́ n kɛ́ Ɩsɛɣɛlɩ nyə́mɑ Ɩsɔ tɔɣɔlɛ teeli tʋ. Ɩsɔ ɩ́ kɔnɑ mpʋ.