Yontu.
48.
Kolee yontu ntɔ. 
Tɑcɑɑ kɛ́ sɔsɔ kɛ́, ɩ mʋnɑ sɑmtʋ tənɑ kɛ ɩ ɩcɑtɛ tɑɑ kɛ́ ɩ pʋɣʋ nɑŋŋ nyəŋkʋ tɔɔ. 
Siyɔŋ pʋɣʋ ŋkʋ kʋ tewɑɣɑ nɑ kʋ hɛɛsəɣɩ tɛtʋ tənɑ yəlɑɑ lɑŋɑ. Kʋ wɛnnɑ ilim ntɔɣɔŋ tɔɔ kɛ́, kʋ tɑɑ kɛ́ wulɑʋ sɔsɔ ɩcɑtɛ wɛɛ. 
Tɑcɑɑ wɛ tə tɑɑ kɛ́ nɑ ɩ́ kentiɣi tə tɔɔ nɑ pə́ kəlɩ tə koluŋɑ toŋ nyəŋkɑ. 
Awulɑɑ kotɑɑ nɑ pɑ́ kʋlɩ Siyɔŋ tɔɔ. 
Pɑ nɑwɑ ɩcɑtɛ ɩlɛnɑ sɔɣɔntʋ ɑnɑɑm kpɑ-wɛ nɑ pɑ́ tʋ cɑsəlɛ. 
Ḿpʋɣʋ sɔɣɔntʋ tutɑ-wɛ nɑ pɑ́ niki tənɛ ɩnəɣɩ seluɣu ɩsɩɩ lʋlʋɣʋ wʋsɑsɩ tutuɣu ɑlʋ tɔ. 
Yɑɑ ɩsɩɩ ilim təlɩɩlɛ heelim yɔkʋɣʋ kpɩɩləŋ sɔsɔɔŋ tɔ. 
Nti tɩɩ nɩɩwɑ kʋnɩɩ tɔ, tə nɑ-tɩ nɑ tɑ́ ɩsəpəle kɛ Tɑcɑɑ pə tənɑ pə tʋ Ɩsɔ ɩcɑtɛ tɑɑ. 
Hɑɩ, Tɑcɑɑ tə hʋʋ nyɑ́ kʋpɑntʋ tɔm kɛ nyɑ́ təsɛɛlɛ tɑɑ. 
Ɩsɔ nyɑ́ sɑmtʋ nɩɩkɩ tɛtʋ tənɑsɩ tɑɑ kɛ́. Siɣisuɣu kɛ n təŋəɣɩ nɑ ń hʋləɣənɑ nyɑ́ toŋ. 
Pɑ yɔɔləɣɩ Siyɔŋ pulɑɣɑ tɑɑ kɛ́, nɑ Yutɑ ɑcɑlɛɛ nɑ́ɑ́ wɛ ɑŋmɑɑlɑ tɑɑ kɛ́ nyɑ́ tɑmpɑnɑ hʋʋlɛ tɔɔ. 
Ɩ́ tɔ nɑ ɩ́ cɔɔ Siyɔŋ ɩcɑtɛ tɑɑ nɑ ɩ́ kɑlɑ ɩ tətɑŋlɛ kutuluŋ. 
Ɩ́ pɑɑsənɑ tə koloosi nɑ sɩ toŋ nɑ ɩ́ kɑ́ kɛɛsɩ mə piyɑ sɩ: 
Ɩsɔ kɛlɛ tɑ́ Ɩsɔ kɛ́ tɑm tɔɔ. Ɩnɩ ɩ́ kɑ́ tiikiɣinɑ-tʋɣʋ hɑlənɑ tɑ́ səm.