Yontu.
76.
Asɑfɩ yontu nti pɑ yookinɑ cəmʋɣʋ nɑ tə́ wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 
Ɩsɔ hʋlɑ ɩ təɣɩ Yutɑ, ɩ hətɛ yɑɑ Ɩsɛɣɛlɩ tɑɑ. 
Ɩ cokəle wɛ Sɑlɛm kɛ́, nɑ ɩ təcɑɣɑlɛ kɛ Siyɔŋ tɑɑ. 
Tənɑɣɑ ɩ pɛlɑ yoou wontu: Ɩsɩɩ nyəmɑ́ nɑ kpɑləŋ nɑ lɑɣɑlɛɛ nɑ wontu lɛntɩ. 
Hɑɩ, Ɩsɔ, sɔsɔɔntʋ ntɛ́ yɑɑ? N kəlɑ tɑm tɔɔ pɔɔŋ tənɑ. 
Yoolɑɑ tɑɑ yoolɑɑ mpɛ pə cɑɑmɑ-wɛɣɛ, pɑ toowɑ tom kɑntəkɑɣɑ nyəm, pɑ tɑ pəsɩ nɑ pɑ́ yoo nɑ pɑ́ fiti. 
Yɑkɔpʋ Ɩsɔ, wɑɑtʋ wei n nyɑɑsɑ-wɛ tɔ, pə yeɣetɑ pɑ kpɑɣɑnəŋ nɑ ɩ cɑɣɑlɑɑ kɛ́. 
Hɑɩ, n kɛ́ sɔsɔ kɛ́, n mʋɣɩ pɑ́ɑ́nɑ́ nɑ ɑwe kpətənɑ-ŋ? 
Hɑtoo ɩsɔtɑɑ kɛ́ n yɔɣɔtɑ nyɑ́ hʋʋlɛ tɔm, nɑ sɔɣɔntʋ kpɑ tɛtʋ nɑ tə́ cɑɣɑ təpɑmm. 
Wɑɑtʋ ɩnəɣɩ n kʋlɑɑ sɩ n hʋʋkənɑ nɑ ń wɑɑsɩ ɑtɛ kʋnyɔntɔɣɔlɑɑ. 
Ye nyɑ́ tɑɑ huuwɑ, yʋlʋ tʋɣʋ-ŋ teeli kɛ́, pɑɑ ɩ wɛ pɑ́ɑ́nɑ́ sɔsɔɔnɑ tɑɑ. 
Ɩ́ sɩɩ mə Ɩsɔ Tɑcɑɑ kɛ nɔɔsɩ nɑ ɩ́ lɑ́-sɩ. Mpɑ pɑ cɔɔnɑ Ɩsɔ Sɔsɔ ɩnɩ tɔ, pɑ́ kɔnɑ-ɩ kʋcɔɔŋ. 
Ɩsɔ ləsəɣɩ ɑwulumpiyɑ kɑlɑmpɑɑnɩ kɛ́ ɩlɛnɑ pə́ tisi-wɛ təfɛ. Atɛ ɑwulɑɑ seliɣinɑ-ɩ kɛ́.