Iobe.
18.
Aa le hoe ty natoi’ i Bildade nte-Sohy : 
Pak’ ombia vaho hagado’o o volañeo? Mañaraharà heike, le hirehake zahay. 
Aa vaho akore t’ie atao biby? te kàboke am-pihaino’o eo? 
Ihe mandrimi-batañe ami’ty hasosora’o, haforintseñe ty ama’o hao ty tane toy? ke havik’ amy toe’ey ty vato? 
Eka, hakipeke ty jiro’ o tsereheñeo, vaho tsy haviake ty fibela’ i afo’ey. 
Haieñe ty hazavàñe an-kivoho’e ao, vaho hakipeke ty jiro’e ambone’e eo. 
Ho tomoreñe ty lian-kaozara’e naho hamotsak’ aze o kilili’eo. 
O fandia’eo ty hampijòñ’ aze an-karato ao, minday aze mb’an-tsikarakara mb’eo o lià’eo. 
Tsepahe’ ty fandrim-bikoviko ty tomi’e, mibitsok’ ama’e ty bitsoke 
Linembeke ho asa’e an-tane ao ty tsingere naho ty fandrik’ an-dalañe eo. 
Mañembañ’aze mb’atia mb’etia o mampangetraketrakeo, mañoridañ’ aze am-pandia’e. 
Te hampibotsek’ aze ty haemberañe, salahàñe’ ty hankàñe hikorovoha’e. 
Hatao’e tsipeake ty holi’e, habotse’ ty tañoloñoloñan-kavilasy o fangefange’eo. 
Hombotañe an-kiboho’e ao i niatoa’ey, le hasese aolo’ ty mpanjakam- pangetraketrahañe eo. 
Leo raik’ amo azeo tsy mimoneñe an-kiboho’e ao, famitsezam-ponde i akiba’ey. 
Maike o vaha’e ambane ao, vaho binira ambone ey ty tsampa’e 
Modo an-tane atoy ty fitiahiañe aze; tsy aman-tahinañe re an-koe añe. 
Aronje boak’an-kazavàñe ao re mb’an-kamoromoroñañe ao, vaho atao soike ami’ty voatse fimoneñañe toy. 
Ie tsy hanañ’anake ndra anan’anake am’ondati’eo, ho po-sehanga’e ty an-kijà’e ao. 
Hilatsà’ o mpanonjohy azeo i andro’ey, hambañe ami’ty firia-tsandri’ o niaoloo. 
Toe zay o akiban-tsereheñeo; ty toe’ o tsy mahafohiñe an’Andrianañahareo.