Sabo.
49.
Ty ambane naho ty ambone, ty mpañaleale miharo ami’ty rarake. 
Hivolan-kihitse ty vavako, vaho ho ereñeren-troko ty hilala. 
Hatokilako mb’am- pandrazañan-drehake ty sofiko. ho ventareko an-dokanga ty tafatòñoko, 
Ino ty hahahembañ’ ahiko an-tsan-kankàñe, ie miarikoboñe ahy ty hatsivokara’ o mpañonjo-tomitse amakoo, 
o mpiato amo fanaña’eoo, vaho mirengevok’ ami’ty habei’ o vara’eo? 
Leo ondaty raike, ndra manao akore, tsy hahavoavily ty ain-dongo’e, ndra hibanabana jebañe aman’Añahare ho aze— 
Loho sarotse ty vilin’ ai’e, tsy mete tsy hadoke kitro katroke: 
—t’ie ho veloñe nainai’e, tsy hahaoniñ’ i koboñey, 
ie oni’e te mihomake o mahihitseo; songa mikenkañe ty minè naho i dagola, vaho apo’e amo ila’eo ty vara’e. 
Ty fitsakorean-tro’ iareo t’ie tsy ho modo o akiba’eo, naho ty fimoneña’ iareo mb’an-tariratse iaby kitro añ’afe’e, ie atao’e amy añara’ey i tane’ey. 
Toe tsy mahatan-ty asi’e ondatio; le manahake o bibio t’ie mate. 
Zay ty fombà’ o sèretseo, naho o mandimbe iareoo, ze miantoke ty enta’ iareoo. Selà 
Hoe añondry iereo tinendry ho mb’an-kibory ao, ho mpiara’iareo ty havilasy; ho fehe’ o vañoñeo te maraindray; ho a’ i tsikeokeokey ty vinta’ iareo hihomak’ ao, tsy hanaña’ iareo akiba ka. 
Fe ho jebañen’ Añahare ami’ty haozara’ o kiborio ty fiaiko, le ho rambese’e. Selà 
Ko hemban-­drehe naho mihamaro ty vara’ ondaty, naho mitombo ty enge’ i anjomba’ey; 
F’ie mihomake, tsy eo ty hendese’e. tsy hañorik’ aze higodañe ao ty enge’e. 
Eka! nitata’e ty fiai’e te niveloñe: Nitsiririeñe t’ie niraorao. 
Homb’am-pimoneñan-droae’e ao re; tsy ho isa’e ka ty hazavàñe. 
T’indaty iasiañe, mete tsy maharendreke t’ie, manahake o bibio, hihomake.