Sabo.
80.
Tsekafo añatrefa’ i Efraime naho i Beniamine naho i Menase ty haozara’o vaho mb’etoa hañimba anay ! 
Ry Andrianañahare, Ampolio zahay naho ampireandreaño laharañe, soa te ho tra-drombake zahay. 
O ry Iehovà Andrianañahare’ i Màroy, pak’ombia ty mbe hiviñera’o ty halali’ ondati’oo? 
Nazotso’o mofon-dranom-pihaino, naho nampigenohe’o ranomaso am-pitovy telo. 
Ampanivetivè’o ondaty mañohok’anaio; vaho vereverè’ o rafelahi’aio. 
Ry Andrianañahare’ i Màroy. Ampolio zahay, ampireandreaño ty lahara’o, soa t’ie ho tra-drombake. 
Nitsongoe’o boak’e Mitsraime ty vahe; rinoa’o o kilakila‘ndatio naho naketsa’o. 
Nihatsafe’o ty tane aolo’e eo, naho nampandaleke o vaha’eo, vaho nanitsife’o i taney. 
Nikopahe’ i alo’ey o vohitseo; naho o tsampa’eo o mendoraveñe ra’elahio. 
Nandrevake mb’amy riakey o ra’eo, naho pak’amy sakay añe o tora’eo. 
Aa vaho akore ty nandrotsaha’o o fahe’eo, hitimpona’ ze miary eo, 
Troatroae’ ty lambon’ ala, vaho abotse’ ze misitsitse an-kivoke ey. 
Ry Andrianañahare’ i màroy, Ehe, Mibaliha, mijilova boak’ an-dikerañe ao naho vazoho vaho tiliho ty vahe toy, 
Eka! i tora’e naketsam-pitàn-kavana’oy, i ana-dahy nampaozare’o ho Azoy, 
finorototo’ ty afo, finira, mihomake ami’ty fitrevohan-dahara’o. 
Anampezo fitàñe indatim-pitàn-kavana’oy, i ana’ ondaty nampifatrare’o ho Azoy. 
Vaho tsy hiambohoa’ay; Ehe sotraho, hikanjia’ay ty tahina’o. 
Ry Iehovà Andrianañahare’ i Màroy; Ampolio zahay, ampireandreaño ama’ay ty lahara’o, vaho ho tra-drombake.