Sabo.
115.
Tsy zahay ry Iehovà, tsy zahay fa i tahina’oy, ro anolorañe engeñe, ty amy fiferenaiña’o naho ty figahiña’o. 
Ino ty atao’ o kilakila ‘ndatio ty hoe: Aia t’i Andrianañahare’ iareo? 
Andindiñe ao t’i Andrianañaharentika; anoe’e iaby ze satrin’ arofo’e. 
Volamena naho vola-foty ty fitalahoa’ iareo, satam-pità’ ondaty. 
Amam-bava iereo, fe tsy mivolañe, ama-maso, f’ie tsy mahatrea; 
aman-tsofy, f’ie tsy mahatsanoñe; aman’ oroñe, f’ie tsy mahaàntsoñe; 
aman-taña, f’ie tsy maharambe, aman-tomboke, f’ie tsy mahalia; tsy mahalefe fiñeoñeoñañe o feo’eo. 
Ho hambañe ama’e ty mamboatse aze, Eka! ze hene mpiato ama’e. 
Ry Israele, atokiso Iehovà! Ie ty mpañimba naho kalan-defo’ iareo. 
Ry tarira’ i Aharone, atokiso Iehovà! Ie ty mpañimba naho kalan-defo’ iareo. 
Ry mañeveñe am’ Iehovà, atokiso Iehovà! Ie ty mpañimba naho kalan-defo’ iareo. 
Fa nitiahi’ Iehovà tika, ho tahie’e; ho soae’e ty anjomba’ Israele, ho soae’e ty anjomba’ i Aharone, 
ho tahie’e o mañeveñe am’ Iehovào, ndra ty kede ndra ty bey. 
Hampivangongoe’ Iehovà nahareo, inahareo naho o tiri’ areoo, 
hampanintsiña’ Iehovà, Andrianamboatse i likerañey naho ty tane toy. 
O andikerañeo! a Iehovà o likerañeo, fe natolo’e amo ana’ i Dameo ty tane toy. 
Tsy mandrenge Ià o vilasio, ndra ia ia mizotso mb’am-bangìñe ao; 
Fe hañandriañe Ià tika henane zao ho nainai’e nainai’e. Treño t’Ià !