Sabo.
132.
Ty nifantà’e am’ Iehovà, ty nititiha’e amy Tsitongerè’ Iakobey: 
Toe tsy hizilik’ an-kibohon- trañoko ao raho ndra hijoñe am-pandreako nivelareñe ho ahiko ao: 
Tsy homeiko roro o masokoo, tsy hidrodreke o voho-masokoo, 
ampara’ te ­hahatreavako toetse t’Iehovà, akiba ho a i Tsitongerè’ Iakobey. 
Jinanji’ay e Efrata zay, tendrek’ an-kodobo’ i alay : 
Antao hionjoñe mb’an-Kivoho’e ao; antao hitalaho am-pitongoàm-pandia’e eo. 
Miongaha ry Iehovà, miheova mb’am-pitofà’o mb’eo, Ihe naho i vatam-pañinan-kaozara’oy. 
Ho lafihen-kavantañañe o mpisoro’oo, hipoñak’ an-kaehake o noro’oo. 
Ty amy Davide mpitoro’oy, ko ampitolihe’o añe ty lahara’ i noriza’oy. 
Nifanta mahity amy Davide t’Iehovà, vaho tsy hafote’e, ty hoe: Hampiambesareko ami’ty fiambesam-panjakà’o eo ty boak’ am-pañova’o ao; 
lehe ambe’ o ana’oo i fañinakoy naho ty taroko anareko iareo, le hiambesatse amy ­fiambesam-panjaka’oy nainai’e o ana’ iareoo. 
Toe jinobo’ Iehovà ty Tsiône, i fañiria’e ho fimoneña’ey: 
Etoy ty fitofako nainai’e tsy modo; atoa ty himoneñako, fa fisalalàko— 
Hogogoeko ty riha’e, ho eneñeko mahakama o mahàtra’eo. 
Hampisikineko fandrombahañe o mpisoro’eo, hisabo an-drebeke o noro’eo. 
Ao ty hampitiriako ty tsifa’ i Davide; ao ty nañajariako failo’ i norizakoy. 
Haombeko hasalarañe o rafelahi’eo, fe hipelapelatse añambone’e eo ty sabaka’e.