Razan-tSaontsy.
4.
Tsanoño ry anake, ty fanoroan-drae, itsendreño hahazoa’ areo hilala; 
fa nanolorako fiohan-tsoa: aa le ko apo’ areo ty Fañòhako 
Zaho anadahin-draeko, nitrotrotrotro, bako tokañe ampahaisahan-dreneko, 
le nanareñe ahy ty hoe: ampifaharo an-tro’o ao o entakoo; tambozoro o lilikoo hiveloma’o 
Manaña hihitse; mitohà hilala: ko mañaliño, vaho ko miamboho amo volam-bavakoo; 
Ko apo’o, le harova’e; ikokò, le hambena’e. 
Hihitse ty lohà’e, aa le manàña hihitse, eka, mangalà hilala amy ze hene famoria’o. 
Onjono re le honjone’e rehe; hiasia’e te fihine’o. 
Hampihamine’e voñe vinanditse an-doha’o, ho tolora’e sabaka fanjàka. 
Mitsanoña ahy, anake, vaho iantofo o entakoo, hañamaroañe ty taon-kavelo’o. 
Fa nitalifirako mb’an-dalan-kihitse; naho nitehafeko mb’amo lalan-kavantañañeo. 
Ie mitsontike, tsy ho sebañeñe o lia’oo; ihe milay, tsy hitsikapy. 
Vontitiro ty anatse le ko apo’o, ambeno amy t’ie ro havelo’o. 
Ko mitsile mb’añ’oloñolo’ o lo-tserekeo vaho ko andenà’o ty lala’ o tsivokatseo. 
Ihankaño, ko miary eo, iholiaro vaho mihelaña. 
Ie tsy miroro hey naho tsy mandilatse; tinavañ’ am’iereo ty firotse ampara’ te mitsikapy. 
Fihina’ iereo ty lintsen-karatiañe vaho genohe’ iereo ty divain-kasiahañe. 
Manahake ty hazavà’ i manjirik’ àndroy ty lala’ o vantañeo, ie mihamazava erike ampara’ te mipisañe. 
Hoe fimoromoroñañe ty lala’ o lo-tserekeo, ie tsy maharendreke te mahatsikapy. 
O anake, tsendreño o fivolakoo; anokilaño sofy o lañonakoo. 
Ko enga’o hihake amo maso’oo; f’ie ahajao an-tro’o ao. 
Amy t’ie haveloñe amo maharendrekeo, toe fijanganañe ho an-tsandri’iareo iaby. 
Ambeno am-pilozohañe ty tro’o, fa boak’ama’e o fanganahanan-dranon-kaveloñeo. 
Asioro ama’o ty vava mengoke, vaho ihankaño o soñy mikelokeo. 
Ampañenteo mahity o maso’oo, vaho ampivantaño mañaolo o holi-maso’oo. 
Jilovo ty fombàn-tombo’o, le hijadoñe soa o lia’oo. 
Ko mivio mb’an-kavana ndra mb’ankavia; fa ampandifiho ty raty o tombo’oo.