Hosèa.
6.
Antao, himpoly am’ Iehovà tika; Ie ty nandrimitse, naho ie ty hampijangañe antika, Ie ty namofoke, naho ie ty hampidiañe antika. 
Afake roe andro le hampiveloma’e, amy andro fahateloy ro hampitroara’e, himoneñan-tika am-pivazohoa’e eo. 
Le hahafohiñe tika, naho himane hahafohiñe Iehovà; Mionjoñe re manahake ty manjirik’àndro; le hivotrak’ amantika manahake o orañeo, i oram-pigadoñañey, naho i orañe aolo an-tane atoiy. 
Ry Efraime, ino ty hanoako ama’o? Ry Iehodà, ino ty hanoako azo? Hoe mika ty hasoa’o; mimeatse añe te maraindray manahake o misafononokeo. 
Aa le nihatsafako añamo mpitokio, nizamanako añamo fivolam-bavakoo; hoe fipelaran-kelatse ty fizakañ’ azo. 
Toe fiferenaiñañe ty paiako, fa tsy soroñe; naho ty fahafohinañe an’Andrianañahare te amo engan-koroañeo. 
Fe manahake i Dame ty nivaliha’ iareo amy fañinay; zay ty niolà’ iareo amako. 
Rova’ o mpikitro-draha ratio t’i Gilade, tsitsike lian-dio. 
Hoe firimbo-malaso mivoñoñe ondaty, ty fañohofa’ i fivorim-pisoroñey loza an-tevan-dala’ i Sekème eo; toe haloloañe ty anoe’ iereo; 
Naharendreke haleorañe añ’anjomba’ Israele ao raho; zoeñe e Efraime ao ty hatsimirirañe, naho naniva vatañe t’Israele. 
F’ie nifotoañeko san-kavokaran- drehe r’Iehodà, ie hampoliko ty fandrohizañe ondatikoo.