﻿ZENESIS.
1.
MIZMIZ 1 Agraretge Agudide kotor a gesep daratagemda, 
able gesep ge irdireder orwaikak a lukak. Able muimui karem ge gair lu narimlare kupkupi detrapeder abi tumge, a Agudira sasrim atatmirer tumem able nige. 
Agud eudim etkaret, “Bi obakaeret”, ege bi bakaerti 
Agudira serer barki nalu e dasmeri. 
E eudim bi detakemuda kupkupilam, a able bi nei itkiri Gerger a kupkupi nei itkiri Ki. Ki a idim ge kikem gerger irdireder. 
Agud ga etkaret, “Kes obatreret eipuge ko ni wanakesmuda neis utebem” - ege akaida. 
Agudide able kes ikaida arem ni detakemuda seplelam. 
E able kes nei itkiri Mi. Ki a idim ga 2 gerger irdireder. 
Agud eudim etkaret, “Able ni pe milam sepge egmedi (wataba) okokise waetami ya wayakai ged wedaketi.” - a ege akaida. 
E able ged nei itkiri Gesep a able ni ge netat utebge etami, e nei itkiri Gur. A Agudira serer barki nalu e dasmeri. 
Agud ga etkaret, “Gesep turum weud gair tonar lunege; luneg wi no kep waeslare a able lu yaba kep wadaragri muige yaba ageg” - a ege bakerda. 
Able gesep turum eudi gair tonar lunege a Agudira serer barki nalu e dasmeri. 
Ki a idim ga 3 gerger irdireder. 
Agud eudim etkaret, “Mige bi obakaertare ko kepu wanakwaelei gerger a ki, a ko waetomeretlare kerker, gerger a urut; 
wi zorom obazimurwa mige ko bi waiswelare gesepem” - a ege bakerda. 
Agudide neis au bi dararsiri - lim ko abra sasrim wadike gergerge a meb ko abra sasrim wadike kige. 
E wer gako dararsirda. Agudide able bi idagi mige ko gesep bi waiswerlare, 
sasrim yaba wadaragri gergerem a kiem, a ko kepu wanakweilei bi a kupkupi. Agudira serer barki nalu e dasmeri. 
Ki a idim ga 4 gerger irdireder. 
Agud ga etkaret, “Ni turum weud gair tonar large a able mikes turum weud mi eburge.” 
Agudide daratagemda gair tonar au gur ebur gair tonar ebur pe able gurge waurder a gair tonar mi ebur. Agudira serer barki nalu e dasmeri. 
Agudide yabi gair werkabem nakerda a able ni ebur daratagerda ko nosik yaba waeprao gurge a ni wadamiare. 
Ki a idim ga 5 gerger irdireder. 
Agud ga etkaret, “Gesepide gair tonar gesep ebur waeprao: uteb a ad ebur, aule a kebile” - a ege akaida. 
Agudide eudim yabi gair darasirda, a abra serer barki nalu e dasmeri. 
A Agudide eudim detauti, “Pe irdi mi le dararsirei; wi wadaralei merbi kaise a merbi orwaiorwai. Yaba yako sasrim wadarake large, mi eburge a gair gesep eburge, uteb ebur a ad ebur aule a kebile. 
Agudide eudim le daratagmi yabi nakaida ko abi kaise wadaralei. E yabi kimyar a koskir daratagmi, 
werkabem nakaida, a detauti, “Mitkar omaskir ko waba wanagri wayakai waba nosik ya waurder kemerkemer gesepge a gesep sir wadamilare. Ka wabi dikweida able sasrimge ko waba wanake large, ni eburge, a gair ad gesep eburge. 
Ka emetu dararsirda gair tonar kep a kurup lewer wabim arwem; 
a gair gesep eburem a mi eburem ka sogi a lamlam luneg dararsirda yabim lewerem” - a ege akaida. 
Agudide gair lu darasmerda ge e dararsirda, ege abra au serer barki. Ki a idim ga 6 gerger irdireder. 
