Génesis.
9.
Bab-Dummad Noéʼgi, degi, e-masmalagi ise-nued binsasad. Weyob ega sogsad: “Mimmigan-bukidar be nikumar, we-napneggi dula be omelomar, bela we-napneg-ugakaase ambikumar. 
Bela we-napneggi ibmar-dula-gudidimalad be-dobedba bemar-asabin gwakidmaloed: Bela ibmar-durgan-gukumalad, bela ibmar-durgan-napaginmalad, bela ibmar-durgan-napagi-garmakdimalad, bela ibmar-durgan demarginmalad. Bela-a-ibmar-durgangi be obine gumaloed. 
”Bela ibmar-dulamalad, degi, gagan-araragana-sunna-gullemalad sunna bemar gunmaloed. Ani an bela bega uknaid. 
”San-abebiid, melle be gunmalo. Ar abegi burba-dulagued danikid. 
Ar ibmar-durgan be-oburgwisale, an we-ibdurgan oburgwemogoed. Dule, dule-oburgwismogale, amba oburgwilemogoed. 
Ar Bab-Dummad dule e-sunnague-obinnissoggu, dule-gwensak dule-oburgwisale, dule-baid a-dule-oburgwemogoed. 
”Bemardi mimmigan-bukidar nikumar. Be-mimmigan we-napneggi mergumai gusun.” 
Bab-Dummad Noéʼga, degi, e-masmalaga sogdebalid: 
“Nabir, ani an bemarbo, degi, be-waganmarbo an igar mesoed. 
Degine, bela ibmar-dulamalad bemarba ur-dummadyagi-bukwa-ainisad: Nuumar, ibmar-durgan-sunna-akwilemalad, ibmar-durgan-sapurbarmalad. ”Bela we-ibmar-durgan-we-napneggi-bukmaladbo an igar mesoed. 
An-bemar-ebo-igar-mesoedi gwen gwagosulid: Bela dulemar, degine, bela ibmar-durgan muusailagi bar an ogilogosulid. We-napneg obelogega bar muusaila murosulid. 
”An bemar-ebo, degine, an bela ibmar-durganbo-igar-mesnaidi, degisadegu maiguoed. A-e-wilubgan weyob maiguoed: Sue maiguoed. 
Mogir-imbaba an sue-mesoedi, we-napnegbo an igar-mesoed-e-wilubga guoed. 
We-napneggi mogirmar-gutumakalile, an-sue mogir-imbaba megnonikoed. 
Geb an nue-ebinsaoed, an bemarbo, degi, bela ibmar-durganbo igar mesisad. Bela ibmar-dulamalad-ogilogega, baid-muusaila-weyobid bar murosulid. 
Mogir-imbaba sue megnonikile, an dakoed. Agi, ani, Bab-Dummad, bela dulemarbo, degine, bela ibmar-durgan-we-napneggi-bukmaladbo degisadegu-igar-mesisad an ebinsaoed. 
”We-napneggi bela dulemarbo, degi, ibmar-durganbo an igar-mesisadi, sue, e-wilubga guoed.” Deyob Bab-Dummad Noéʼga ibmar sogsad. 
Noé-machimala ur-dummadyaba-nosmaladi, wemardo: Sem, Cam, Jafet. Camʼde, Canaán-e-babad. 
Wemar-warbaagwad Noé-masmala gumalad. We-napneggi dulemar-bukmalad, belagwapa wemargi danimalad. 
Noé napagi arbadgua, uva digsad. 
Ibagwengi, Noé vino gobsagu, mumgusad. Noé e-dordonegyaba uka-swiri meremai gusad. 
Canaán-e-bab-Cam, e-bab-Noé uka-swiri-mai-daksagu, nodegusad. E-iamar-warbogwad-magaba-gwichidga sogdapid. 
Geb degi, Sem, Jafet-ebo e-bab-edugega mor-dummad amismalad. Geb gukinba mor-dummad-gani sorsik-sorsik nadegusmalad. Baidsik ataknadapi gusmalad, adi, mer e-bab uka-swiri-maid dakegar. Geb a-mor-dummadgi e-bab-edusmalad. 
Noé nue-wibamasgu, atakalid. E-machi-bipigwad igi e-imaksa deyob, wisgusgu sogded: 
“¡Canaán, be iwigusun! Be-iamar-e-mai-mesagwaledga be gusun.” 
Geb degi, Noé sogdebalid: “Sem-e-Bab-Dummad-Jehová, a-e-nug odummolesun. Sem-maiga Canaán gudii gusun. 
Bab-Dummad, Jafet-neg gatik nasgumai imakena gadin. Jafet, Sem-e-dordoneggi gudii gusun, degine, Canaán Jafet-maiga gusun.” 
Muusaila-mulusad-sorba, Noé amba birga-dulataled-ilapaa gaka dulabo-gakambe (350) dula-gudii gusad. 
Degisoggu, Noé, birga-dulataled-ilabakebak gaka dulabo-gakambe-nikadgi (950) burgwenonikid.