Job.
16.
Job Elifaz-abin weyob sogded: 
“We-ibmar bukidargus an weyob itodanikid, bemar-ibmar-soged gwen an-bendaksulid. 
¿Ar bemar-yogasaar-sunmaked geg bergumarsi? ¿Ar ibiga geg bemar an-ies imakmala? 
Ar bemar an-gunaiyob be gunanaimogana, an bemarga deyob sunmaksamogaled. An bemargi-yolelega, gaya-nueganbi bemarga sunmaksamogaled. Bemar-wiledakeyob an bemarga nono-ege-ege imaksabaliled. 
An-sunmakedgi an bemar-ogannosmalaled. Bemar ibmar-nunmak-itodimaladi, an-sunmakedbali gadi-gadi be itosmalaled. 
”Ar an sunmaknaid gwen an-bendaksulid, ar gwen anga ibmar-nunmak-itonaidi osulosulid, ar an sunmaksurbalile, gwen anga surgusurbalid. 
Bab-Dummad napiragwadba an-obelosad, an-neguyaginmaladse-bakale bela obelosad. 
Bab-Dummadse nue an galesgunaid, nue angi yolesgunaid. An-uka-dunnumakega an-ibe imaksad, degisoggu, garagus an dakleged. 
”Bab-Dummad nue anse urwed, an ese balegillenaid, nue-ibitos itoleged. Achu-angi-nugar-oyonaiyob gunaid, e-isdaradga an-imaksad. 
An-isdarmalad angi dododmalad, an-wagar ogotemalad. We-dule-isdarmalad buladik angi yoledmalad. 
Bab-Dummad dule-isganamarse-ibitogega an-imaksad, dule-gakansamaladse ibitogega an-imaksad. 
Iduardina, an bogidik gudiinad, emisgindi, Bab-Dummad nue an-wiosad, dukar-walaba an-ganonikid, saga-saga an-imaksad. Bela-bela angi yolenonikid. 
E-sigu-mimalad nue an-ebirisad, e-sigumar, an-sabangi sabe-sabe-yolenonisulid, bela an-samurmar, napase yaarmakded. 
Bia an naibigusa, agi gannar angi yolenonidaed, bila-onoged-duleyob angi gwisgunonikid. 
”An-naibi-itodiid-oyogegala, an wile-itoged-mor-yonai gualid. Napayala an gudii gualid. 
An boedba an-wagar ginnitibigusad, an-ibyamar-dakleged guduregus dakleged. 
Degi-inigwele, an dule-emar-sabsur-imakedsulid, Bab-Dummadse innikigwadgi an gordiid. 
”Ar an burgwenonisundibe, napnega, an-ibmar-oakalossulid-barsognai gusana gadin. 
Ar dule-an-barsogoedi nibneggi maid. Nibneggine, dule-an-ular-sunmakoedi maid. 
Ar an-ai an-irwa-goledid, an an-ai-asabin ise-boar an gunaid, 
adi, an-ai an-ular Bab-Dummadse golegar. Ar igi dule na e-ai-bendakega sunmake, deyobi, an-ular sunmakegar. 
Bar an birga-suitii naosulid, an-burgwed-ibagande, bato mosad. Gwen an bar aibirosulid.”