Salmos.
75.
Asaf, namakmalad-e-iduedga we-namaked narmaksad. We-namakedi, “Mer neg-obergued” namaklegeyobi namaklegergebed. Bab-Dummad, anmar doggus-nuedye bega soged, anmar bese goled. Dulemar be-ibmar-gegerdaklemalad-imaksadgi sunmakmalad. 
Bab-Dummadye, be soged: “An igar-nabogoye-sokalile, innikigwadgi an igar nabogoed. 
Napaneg-giglimakdele, bela egi-bukwamalad giglimakdele, ar ani an napneg-e-sailamar-ganikid ogannoged.” 
Nug-dummarba-imakdimaladga an soged: “¡Mer be na nug-dummarba imakmar!” Dule-isganamarga an soged: “¡Mer be na san-dummarba imakmar! 
¡Mer be na gangued-nikadba yamo san-gannarba imakmar! ¡Mer be na bule-bule sunmakmar!” 
Ar nug-dummarba-guedi, dad-nakwedsik danikosulid, dad-argwanedsik danikosulid, nega-dulesulidganba danikosulid. 
Ar unnila Bab-Dummadbi igar-nabogedid. Bab-Dummad belallaa dulemar-nug odummosulid. Abala e-nug-bipii imaked, abala e-nug-dummarba imaked. 
Bab-Jehová sabsur-dule-isganamar-odurdakega e-argangi nog-enamakar vino-gagbid-ibmar-baiganba-oburaled siid. A-vino-gagbid-eodele, bela dule-isganamar-we-napneggi-gudidiid, vino-gagbid-e-asase-bakale, gobmaloed. 
Ar andi, Jacob-e-Bab-Dummadgi degisadegu sunmakdii guoed, Jacob-e-Bab-Dummadga an namakdii guoed. 
Ar Bab-Dummad, dule-isganamar-e-gangued bela obelogoed, dule-nued-e-gangueddi, ogannogoed.