Salmos.
114.
Israel-dulemar Egipto-yargi nosmargua, Judá-yar Babse-goled-negga gunonikid. 
Jacob-wagan dule-baigan-yargi-bukwa nosmargua, Israel-yar-naid bela Bab-Dummadgadga gunonikid. 
Demar-naid Israel-dulemar-dakdegua, Israel-dulemar-abin argaded. Jordán-diwar-ariomaid e-abin gales megisad, bar aryossulid. 
Sibad-wawaad-macheredyob yar-dummagan ichomakded, sibad-wawaad-mimmiganyob yar-senigana ichomakdemalad. 
Demar, ¿ibiga be argade? Jordán-diwar, ¿ibiga be gales-megismoga? 
Bemar yar-bukwamaladi, ¿ibiga bemar sibad-wawaad-macheredyob ichomakdemala? Bemar yar-senigana, ¿ibiga bemar sibad-wawaad-mimmiganyob ichomakdemarmoga? 
Napneg-naid, Bab-Jehová-asabin be giglimake, Jacob-e-Bab-Dummad-asabin be giglimake. 
Ar Bab-Jehová akwasaila dii-siedga imaksad, akwasailagi dii-aryomai imaksad.