﻿गन्‍ती.
29.
गेपुकी ७ महिना ङा ङोंइती ङा नाक्‍ती ग्रुम्‍तीके का सेल्‍चा माल्‍नीनी। मेको नाक्‍ती गे काइ गेय मपने। मेको नाक्‍ती गे तुराही ताप्‍चा माल्‍नीनी। गन्‍ती १०:१०; लेवी २३:२४-२५ 
गे परमप्रभु यावे कली चोशा चढ़ेतीके चढ़ेचा माल्‍नीनी। मेको परमप्रभु यावे कली आ दाक्‍शो ब्रोव़शो रिना पाइश्‍शो चढ़ेतीके बाक्‍ब। गेपुकीमी ब्‍यफ का, सांड का नु बर्स का का गाप्‍शो ७ ओटा पाठा चढ़ेचा माल्‍नीनी। मेको मारेइ मदुम्‍शो थम रिम्‍शो दुम्‍चा माल्‍नीम। 
मिनु मेको ब्‍यफ नु अन्‍न चढ़ेतीके, तेल ब्‍वाइश्‍शो रिम्‍शो फस एफाह का १० भाग ङा भाग सां नु सांड नु १० भाग ङा भाग निक्‍शी चढ़ेचा माल्‍नीनी। एफाह का २२ लिटर पुक्‍तीके का बाक्‍ब। भाग सां ६ नु आधा लिटर खोदेंशो बाक्‍ब। भाग निक्‍शी ४ नु आधा लिटर खोदेंशो बाक्‍ब। 
मिनु मेको ७ ओटा पाठा नु का का पा भाग का चढ़ेचा माल्‍नीनी। 
मिनु इन पाप आ पर्बम पाप क्‍याम्‍तीक गेय पचा कली बोका का चढ़ेचा माल्‍नीनी। 
मेको नेल्‍ले औंसी नाक्‍त ङा चोशा चढ़ेतीक नु मेको नु अन्‍न चढ़ेतीके, नाक्‍त किंत किंत ङा चोशा चढ़ेतीक नु मेको नु अन्‍न चढ़ेतीके, मेको नेल्‍ल नु तूचा थोव़क चढ़ेतीके यो चढ़ेचा माल्‍नीनी। मेको नेल्‍ले परमप्रभु यावेमी देंशो खोदेंशो पा आ दाक्‍शो ब्रोव़शो रिना पाइश्‍शो मीम चोशा चढ़ेतीक बाक्‍नीम। 
मेको ७ महिना ङा १० नाक्‍त परमप्रभु यावे नु ग्रुम्‍तीके का दुम्‍चा माल्‍ब। मेको नाक्‍ती गे माइजा बाक्‍शा, काइ गेय मपने। लेवी २३:२७-३२ 
गे परमप्रभु यावे कली चोशा चढ़ेतीके चढ़ेचा माल्‍नीनी। मेको आ दाक्‍शो ब्रोव़शो रिना पाइश्‍शो चढ़ेतीके बाक्‍ब। मिनु गे ब्‍यफ का, सांड का नु बर्स का का गाप्‍शो ७ ओटा पाठा चढ़ेचा माल्‍नीनी। मेको थम रिम्‍शो मारेइ मदुम्‍शो दुम्‍चा माल्‍नीम। 
मिनु मेको ब्‍यफ नु अन्‍न चढ़ेतीके, तेल ब्‍वाइश्‍शो रिम्‍शो फस एफाह का ङा १० भाग ङा भाग सां नु सांड नु १० भाग ङा भाग निक्‍शी चढ़ेचा माल्‍नीनी। एफाह का २२ लिटर खोदेंशो बाक्‍ब 
मिनु मेको ७ ओटा पाठा नु का का पा भाग का का पा चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। लेवी १६:११-२८ 
गे ७ महिना ङा १५ नाक्‍ती परमप्रभु यावे नु ग्रुम्‍तीके का सेल्‍चा माल्‍नीनी। मेको नाक्‍ती गे काइ गेय मपने। गे परमप्रभु यावे कली ७ नाक्‍त सम्‍म चाड मानेचा माल्‍नीनी। लेवी २३: ३४-४३ 
गेपुकीमी परमप्रभु यावे कली चोशा चढ़ेतीके चढ़ेचा माल्‍नीनी। मेको आ दाक्‍शो ब्रोव़शो रिना पाइश्‍शो मीम चोशा चढ़ेतीके बाक्‍ब। मेको चोशा चढ़ेतीके मार बाक्‍चा माल्‍नीम देंशा हना, १३ ओटा ब्‍यफ, सांड निक्‍शी नु बर्स का गाप्‍शो १४ ओटा पाठा बाक्‍चा माल्‍नीम। मेको नेल्‍ल थम रिम्‍शो मारेइ मदुम्‍शो बाक्‍चा माल्‍नीम। 
मिनु मेको नु अन्‍न चढ़ेतीके तेल ब्‍वाइश्‍शो रिम्‍शो फस बाक्‍चा माल्‍ब। मेको १३ ओटा ब्‍यफ आन कली का का पा एफाह का ङा १० भाग ङा भाग सां चढ़ेचा माल्‍नीम। मेको सांड निक्‍शी नु एफाह का ङा १० भाग ङा भाग निक्‍शी रिम्‍शो तेल ब्‍वाइश्‍शो फस चढ़ेचा माल्‍नीम। एफाह का २२ लिटर खोदेंशो बाक्‍ब। 
मिनु मेको १४ ओटा पाठा नु का का पा भाग का का रिम्‍शो फस चढ़ेचा माल्‍नीनी। भाग ला ब्रेक्‍शो बाक्‍त हना, एफाह ङा १० भाग ङा भाग का मिम्‍सीब। मेको २ लिटर २०० सी सी बाक्‍ब। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीम। 
मिनु मेको आ दीसा गे १२ ओटा ब्‍यफ, सांड निक्‍शी १४ ओटा बर्स का गाप्‍शो पाठा चढ़ेचा माल्‍नीनी। मेको नेल्‍ल थम रिम्‍शो मारेइ मदुम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। 
मिनु मेको आ दीसा गे ११ ओटा ब्‍यफ, सांड निक्‍शी १४ ओटा बर्स का गाप्‍शो पाठा चढ़ेचा माल्‍नीनी। मेको नेल्‍ल मारेइ मदुम्‍शो थम रिम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। 
मिनु मेको आ दीसा गे १० ओटा ब्‍यफ, सांड निक्‍शी १४ ओटा बर्स का गाप्‍शो पाठा चढ़ेचा माल्‍नीनी। मेको नेल्‍ल मारेइ मदुम्‍शो थम रिम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। 
मिनु मेको आ दीसा गे ९ ओटा ब्‍यफ, सांड निक्‍शी, १४ ओटा बर्स का गाप्‍शो पाठा चढ़ेचा माल्‍नीनी। मेको नेल्‍ल थम रिम्‍शो मारेइ मदुम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। 
मिनु मेको आ दीसा गे ८ ओटा ब्‍यफ, सांड निक्‍शी १४ ओटा बर्स का गाप्‍शो पाठा चढ़ेचा माल्‍नीनी। मेको नेल्‍ल मारेइ मदुम्‍शो थम रिम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीम। 
मिनु मेको आ दीसा गे ७ ओटा ब्‍यफ, सांड निक्‍शी १४ ओटा बर्स का गाप्‍शो पाठा चढ़ेचा माल्‍नीनी। मेको मारेइ मदुम्‍शो थम रिम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। 
मिनु मेको आ नोले ङा नाक्‍त गे परमप्रभु यावे नु ग्रुम्‍तीके का सेल्‍चा माल्‍नीनी। मेको नाक्‍त गे काइ गेय मपने। 
गे परमप्रभु यावे कली चोशा चढ़ेतीके चढ़ेचा माल्‍नीनी। मेको आ दाक्‍शो ब्रोव़शो रिना पाइश्‍शो चढ़ेतीके बाक्‍ब। मिनु गे ब्‍यफ का, सांड का नु बर्स का का गाप्‍शो ७ ओटा पाठा चढ़ेचा माल्‍नीनी। मेको नेल्‍ल मारेइ मदुम्‍शो थम रिम्‍शो बाक्‍चा माल्‍नीम। 
मेको नु अन्‍न चढ़ेतीके नु तूचा थोव़क चढ़ेतीके ङोंइती ङा खोदेंशो पा ब्‍यफ, सांड नु पाठा आन कली हिक्‍शा, चढ़ेचा माल्‍नीनी। 
मिनु मेको नु पाप पशो आ पर्बम बोका का चढ़ेचा माल्‍नीनी। मेको पाप पशो क्‍याम्‍तीक गेय पचा कली चढ़ेशा यो नाक्‍त किंत किंत ङा चोशा चढ़ेतीके, मेको नु अन्‍न चढ़ेतीके नु तूचा थोव़क चढ़ेतीके चढ़ेचा माल्‍नीनी। 
मिनु गे मेको चढ़ेतीके नेल्‍ले इन कली ङोंइती देंशो नाक्‍तीम परमप्रभु यावे कली चढ़ेचा माल्‍नीनी। मेको नु इन नाक्‍त किंत किंत ङा चढ़ेतीके, इन ग्‍येरशा चढ़ेतीके, चोशा चढ़ेतीके, इन अन्‍न चढ़ेतीके, इन तूचा थोव़क चढ़ेतीके नु इन दुशा बाक्‍चा आ पर्बम चढ़ेतीके चढ़ेशा यो मेको चढ़ेचा माल्‍नीनी’ देनो” देंत। 
मिनु परमप्रभु यावेमी मोसा कली अरेशो खोदेंशो पा मोसाम लोव़ नेल्‍ल इस्राएली आन कली शेंताक्‍मी। 
