﻿एज्रा.
10.
एज्रा परमप्रभु आ खिं आ ङोंइती गु बाप्‍शा, आन मरिम्‍शो पशो नेल्‍ल शोव़शा, ङाक्‍ना ङाक्‍न बाक्‍शो बाक्‍त। मिनु ठेयब हुल का इस्राएली वोंइश मुर, मीश मुर नु आलपुकी एज्रा आ एर ओंथ बुक्‍तेक्‍म। मिनु मेको यो शुश ङाक्‍तेक्‍म। 
मिनु एलाम आ चच युइ ङा येहीएल आ तौ शेकन्‍याहमी एज्रा कली “गो आंइ परमप्रभु कली मटिथु, एको रागी ङा अर्को जात ङा मीश आल ग्‍युंबे पा चाक्‍तक। मोदेंशो पाइतक हना यो, इस्राएली आन कली आस पतीके बाक्‍ब। 
मोपतीके मुल आंइ परमप्रभु नु कबल का पय। आ प्रभु नु परमप्रभु आ शेंतीक मान पा हिंशा टी‍ब आन देंशो खोदेंशो पा एको मीश मुर नु आन आल नेल्‍ल आन कली प्रोंइशा सोइक्‍चा कली लोव़ थोक्‍तय। मिनु परमप्रभु आ अरेशो लोव़म देंशो खोदेंशो पय। 
मिनु मुल बोक्‍कीन। एको गेय नेल्‍ल इन के बाक्‍ब। गो इन कली वारच पाइनीकी। मोपतीके थुं बारपाइश्‍शा गेय पने” देंत। 
मोपतीके एज्रा बोक्‍शा, ठेयब चढ़ेबपुकी, लेवीपुकी नु नेल्‍ल इस्राएली आन कली “ङोंइती देंशो लोव़ पाइनीक” दे कसम जपाइक्‍तीमी। मिनु मेकोपुकीमी कसम जाम्‍तेक्‍म। 
मिनु नोले एज्रा परमप्रभु आ खिं आ ङोंइती रे बोक्‍शा, एल्‍याशीब आ तौ येहो-हानान आ कोठाम लत। मिनु मेकोमी शोब्‍ले मजव ब्‍वाक्‍कु यो मतूङ। मारदे हना ग्‍याइश्‍शा लाइक्‍चा पुंइसीब आन मटितीके आ पर्बम सुर्ता पना पन बाक्‍त। 
मिनु यहूदा नु यरूसलेमम बाक्‍ब लेश्‍शा जाक्‍शो ग्‍याइश्‍शा लाइक्‍चा पुंइसीब नेल्‍ल यरूसलेमम बुक्‍मल, दे नेंपाइक्‍तेक्‍म। 
मिनु हुकुम पाइब नु खाल्‍पापुकीमी “सुइ मुर नाक्‍त सां सम्‍ममी मजाक्‍त हना, मेको आ शोंप नेल्‍ल रोइक्‍चा पुंइसीब। मिनु लेश्‍शा जाक्‍शो ग्‍याइश्‍शा लाइक्‍चा पुंइसीब आन दाते रे तिल्‍चा पुंइसीब” दे यहूदा नु यरूसलेम ङा तेइ तेइ लोव़ सोइक्‍ताक्‍म। 
मिनु यहूदा नु बेन्‍यामीन ङा मुर नेल्‍ल नाक्‍त सां यरूसलेममी बुक्‍तेक्‍म। मेको ९ महिना ङा २० नाक्‍तीम बाक्‍त। मुर नेल्‍ल परमप्रभु आ खिं ङा लाङगाम निस्‍साक्‍म। मेको नेल्‍ल लोव़ नु ठेयब ठेयब रेउ आ पर्बम ख्रिंख्रि पाम्‍तेक्‍म। 
मिनु चढ़ेब एज्रा बोक्‍शा मेको आन कली “गेपुकीमी अर्को जात ङा मीश आल ग्‍युंबे पा चाक्‍तीनी। इस्राएली आन दोस तेम्‍ताक्‍नी। 
मुल गे परमप्रभु यावे, इन किकी पिपी आन परमप्रभु आ ङोंइती इन मरिम्‍शो पशो शोव़ङीन। मिनु आ दाक्‍शो पने। गे मेको रागी ङा मुर नु अर्को जात ङा मीश रे ब्राङीन” दे मेको आन कली माइक्‍तीमी। 
मिनु मेकेर बुक्‍शो मुर नेल्‍लेमी ठेयब सेंदामी “इन देंशो थमा बाक्‍ब। गोपुकीमी इन देंशो खोदेंशो पचा माल्‍नीकी। 
तन्‍न गो एकेर शुश मुर बाक्‍नीकी। रेउ यिना यिन बाक्‍ब। मिनु गो हाक्‍सीतीकेमी राप्‍शा बाक्‍ने मचाप्‍नीकी। एको गेय काबु निक्‍बुम मथुम्‍सीब। मारदे हना आंइ दातेमी शुश मुरुम मोदेंशो मरिम्‍शो पाम्‍तेक्‍म। 
गे आंइ ठेयब मुरपुकीमी यरूसलेमम मेको लोव़ नेंपतीन। मिनु सु सुमी आंइ सहरम अर्को जात ङा मीश चाक्‍गमे, मेको सहर ङा खाल्‍पा नु निसाफ पाइब आन ङोंइती देंशो ना जाक्‍चा माल्‍नीम। आंइ परमप्रभु आ थाम्‍पा गाइश्‍शो मनांइसे सम्‍म मोदेंशो पने” दे ठेयब सेंदामी लोव़ लेत्‍ताक्‍म। 
मिनु आसाहेल आ तौ योनाथन नु तिकवाह आ तौ याहजैयाह मबि‍स्‍सस। मेशुल्‍लाम नु शब्‍बेथाइ लेवी निक्‍शीमी मेको आस कली वारच पाइक्‍ताक्‍स। 
मिनु नोले लेश्‍शा जाक्‍शो ग्याइश्‍शा लाइक्‍चा पुंइसीबपुकीमी मार पाम्‍तेक्‍म देंशा हना, चढ़ेब एज्रा कली खिं खिं ङा ठेयब मुर आन कली मेको गेय पपाइक्‍चा कली नें ब्रेक्‍शा योव़पाइक्‍तेक्‍म। मिनु मेकोपुकीमी १० महिना ङा ङोंइती ङा नाक्‍त रे मेको गेय पचा गोम्‍तेक्‍म। 
मिनु ङोंइती ङा महिना ङा ङोंइती ङा नाक्‍ती अर्को जात ङा मीश नु ग्‍युंबे पाइब नेल्‍ल सु सु बाक्‍मा तुइक्‍ने थुम्‍तेक्‍म। 
मिनु अर्को जात ङा मीश ग्‍युंबे पाइबपुकीमी, चढ़ेबपुकीमी योसादाक आ तौ येशुआ आ चच युइ रे नु आ लोक्‍ब रे मासेयाह एलीएजर, यारीब नु गेदाल्‍याह बाक्‍तेक्‍म। एज्रा ३:२ 
मेकोपुकी आन मीश रे ब्रातेक्‍म। मिनु आन दोस क्‍याम्‍चा कली आन बगाल रे सांड का का चढ़ेचा कली चाक्‍तेक्‍म। 
इम्‍मेर आ चच युइ रे हनानी नु जेबदीयाह, 
हारीम आ चच युइ रे मासेयाह, एलीया, शेमायाह, येहीएल, नु उज्‍जीयाह बाक्‍तेक्‍म 
पश्‍हुर आ चच युइ रे एली-ओ-एनाइ, मासेयाह, इश्‍माएल, नेथनेल, योजाबाद नु ए‍लासाह बाक्‍तेक्‍म। 
लेवीपुकी रे योजाबाद, शिमेइ, केलीता माइश्‍शो केलायाह, पेथायाह, यहूदा नु एलीएजर बाक्‍तेक्‍म। नेहेम्‍याह ८:७; नेहेम्‍याह १०:११ 
कुम्‍सो पाइबपुकी रे एल्‍याशीब, लाप्‍चो खाल पाइबपुकीमी शाल्‍लुम, तेयलेम नु ऊरी बाक्‍तेक्‍म। 
मिनु इस्राएल ङा पारोश आ चच युइ रे राम्‍याह, इज्‍जीयाह, माल्‍कीयाह मियामीन, एलाजर, हशाब्‍याह नु बेनायाह बाक्‍तेक्‍म। 
एलाम आ चच युइ रे मत्तन्‍याह, जकरिया, येहीएल, अब्‍दी, येरेमोथ, नु एलीया बाक्‍तेक्‍म। 
जत्‍तु आ चच युइ रे एली-ओ-एनाइ, एल्‍याशीब, मत्तन्‍याह, येरेमोथ, जाबाद नु अजीजा बाक्‍तेक्‍म। 
बेबाइ आ चच युइ रे येहो-हानान, हनान्‍याह, जब्‍बै नु आथ्‍लै बाक्‍तेक्‍म। 
बानी आ चच युइ रे मेशुल्‍लाम, माल्‍लुक, अदायाह, याशुब, शेआल नु येरेमोथ बाक्‍तेक्‍म। 
पहाथ-मोआब आ चच युइ रे अदना, केलाल, बेनायाह, मासेयाह, मत्तन्‍याह, बेचालेल, बिन्‍नुइ नु मनस्‍से बाक्‍तेक्‍म। 
हारीम आ चच युइ रे एलीएजर, इस्‍शीयाह, माल्‍कीयाह, शेमायाह, शिमेओन, 
बेन्‍यामीन, माल्‍लुक नु शेमारयाह बाक्‍तेक्‍म। 
हाशुम आ चच युइ रे मत्तत्ताह मतेनाइ, जाबाद, एली-फेलेत, येरेमाइ, मनस्‍से नु शिमेइ बाक्‍तेक्‍म। 
बानी आ चच युइ रे मा-अदाइ, अम्राम नु ऊएल, 
बेनायाह, बेदैयाह, केलुही, 
वान्‍याह, मेरेमोथ, एल्‍याशीब, 
मत्तन्‍याह, मतेनाइ नु यासु बाक्‍तेक्‍म। 
बिन्‍नुइ आ चच युइ रे 
शिमेइ, शेलेम्‍याह, नाथान नु अदायाह, 
माक-नादेबाइ, शाशाइ, शाराइ, 
अजारेल, शेलेम्‍याह, शेमारयाह, 
शाल्‍लुम, अमारयाह नु योसेफ बाक्‍तेक्‍म। 
नेबो आ चच युइ रे यिएल, मत्तीथ्‍याह, जाबाद, जेबीना, यददाइ, योएल नु बेनायाह बाक्‍तेक्‍म। 
मेको नेल्‍लेमी अर्को जात ङा मीश ग्‍युंबे पशो बाक्‍तेक्‍म। मिनु मेकोपुकीमी आन मीश नु आन आल प्रोंइशा सोइक्‍ताक्‍म।
