﻿भजन संग्रह.
20.
कुम्‍सो पपाइक्‍ब कली दाऊद आ कुम्‍सो। गे श्‍येत जनीनु, परमप्रभु यावेमी इन लोव़ लेत्‍तल। याकूब आ परमप्रभु आ नें आ पर्बम इन जोरी सत्रुम थिन्‍ने मचाप्‍मेक्‍ल। हितोपदेस १८:१० 
मेकोमी आ बाक्‍तीक रे इन कली वारच पाइब सोइक्‍तल। सियोन रे इन कली वारच पवल। 
मेकोमी इन चढ़ेशो नु चोशा चढ़ेशो नेल्‍ल मिम्‍शा ब्रवल। ठेयब सेंदा पा। 
मेकोमी इन दाक्‍शो नेल्‍ल गेवल। इन मिम्‍शो नेल्‍ल खबल। भजन संग्रह २१:३ 
गो इन ग्राशो तशा, ग्‍येरशा ग्रीशा आंइ परमप्रभु आ नेंमी छेदर पोक्‍नीकी। परमप्रभु यावेमी इन पुंइशो नेल्‍ल गेवल। 
परमप्रभु यावेमी आ तेल लुक्‍शो पिप कली प्रोंइब, दे मुल तुइक्‍ताक्‍ङ। आ स्‍वर्ग ङा बाक्‍तीकेमी यो इन लोव़ नेंशा, आ सक्ति पाइश्‍शो ग्‍युरा गुइमी वारच पाइब। प्रस्‍थान १५:६ 
कोइ मुरपुकीमी शारा, बग्‍गी तशा, ग्रानीकी, दे मिम्‍नीम। तन्‍न गोपुकी परमप्रभु यावे, आंइ परमप्रभु आ नें मिम्‍शा, ग्रानीकी। भजन संग्रह ३३:१७; ब्‍यवस्‍था २०:१; यसैया ३१:१ 
मेकोपुकी गोल्‍नीम। तन्‍न गोपुकी राप्‍स ङा राप्‍स बाक्‍नीकी। 
परमप्रभु यावे, आंइ पिप कली ग्रापतीन। गो पुंइकानु, आंइ लोव़ लेत्‍तीन। 
