﻿भजन संग्रह.
77.
कुम्‍सो पपाइक्‍ब शें‍ब येदुथून कली आसाफ आ कुम्‍सो। गो परमप्रभु कली “वारच पाइय्‍यीनी। आं लोव़ नेनीन” दे ठेयब सेंदा पा ब्रेत्‍ती। 
गो श्‍येत जङानु, परमप्रभु कली माल्‍ता। गो नाक्‍दो यो मदथु, परमप्रभु कली पुंइता। आं थुं खाइक्‍स ङा खाइक्‍स बाक्‍त। 
गो परमप्रभु कली मिम्‍ताक्‍ङ, गो रोंका पाता। गो आं श्‍येत मिम्‍ना मिम्‍न बाक्‍ती। मिनु आं थुं लुक्‍च लत। ठेयब सेंदा पा। 
“गे आं कली निन्‍द्रा पचा यो मगेनीनी। मिनु गो शुश श्‍येत जशा, ब्‍वाक्‍ने यो मचबु। 
गो ङोंइती ङा नाक्‍त नु साइ ङा बर्सपुकी मिम्‍ताक्‍ङ। भजन संग्रह १४३:५ 
गो नाक्‍दो आं थुंमी रिम्‍शो बाक्‍बा देय मरिम्‍शो बाक्‍बा” दे मिम्‍स ङा मिम्‍स बाक्‍ती। 
मार, परमप्रभुमी गेनायो आं कली मब्राइबा? मिनु मेकोमी गेनायो शिशी मपाइबा? 
मेको आ गेना हना यो दाक्‍तीक जाम्‍शो बाक्‍बा? मेको आ थोक्‍शा पशो लोव़ शोर गाक्‍शो दुम्‍शो बाक्‍बा? 
मार, परमप्रभुमी शिशी पचा प्रेंशो बाक्‍बा? मेको गाइश्‍शा, आ शिशी पतीके तेक्‍शो बाक्‍बा? ठेयब सेंदा पा। 
मिनु गो “नेल्‍ल क्‍येङा ठेयबमी आ थुं फाइक्‍तीके आं कली श्‍येत दुम्‍त” दे मिम्‍ताक्‍ङ। 
मिनु “परमप्रभु यावे, गो इन पशो मिम्‍नुङ। गो इन साइ ङोंइती ङा पशो छक लाक्‍चा ङा गेय मप्रेंनुङ। 
गो इन पशो नेल्‍ल मिम्‍स ङा मिम्‍स बाक्‍नुङ। साइ ङोंइती ङा इन छक लाक्‍चा ङा गेय आ पर्बम मिम्‍नुङ। 
परमप्रभु, इन लां ठीक बाक्‍ब। आंइ परमप्रभु खोदेंशो ठेयब अरु तेको देवता बाक्‍बा ङा? प्रस्‍थान १५:११ 
गे छक लाक्‍चा ङा गेय पाइब परमप्रभु बाक्‍नीनी। गे जात जात ङा मुर आन दातेमी इन सक्ति कोंइताक्‍नी। 
गे इन सक्तिमी इन मुर आन कली प्रोंइतीनी। गे याकूब, योसेफ नु आ चच युइ आन कली प्रोंइतीनी। ठेयब सेंदा पा। 
परमप्रभु, समुन्‍द्र ङा ब्‍वाक्‍कु इन कली तशा हिंतेक्‍म। शुश लुक्‍च लशो समुन्‍द्र ख्रिंख्रि पाप्‍तु। 
मिनु गोस्‍सुमी रेउ यिपाइक्‍तेक्‍म। सरीङ रे ठेयब बुंबु पाप्‍तु। इन चिला तेइ तेइ ब्रत। 
फश गिवारम इन बुंबु पशो नेंसाक्‍व। इन चिलामी रागी नेल्‍ल छेङछेङ दुम्‍त। रागी ख्रिंख्रि पा हिम्‍साक्‍व। 
इन लां समुन्‍द्र रे पा लशो बाक्‍त। इन गाक्‍शो लां ठेयब समुन्‍द्र आ दातेमी बाक्‍त। मो हना यो इन खोइलीम दिम्‍शो मारेइ मतांइसे। प्रस्‍थान १४:२१-३१ 
मोसा नु हारून आस गुइ रे पा, गे इन मुर आन कली भेडा आन हुल खुल्‍शो खोदेंशो पा गाक्‍पाइक्‍तीनी” दे परमप्रभु कली लोव़ पता। 
