﻿भजन संग्रह.
148.
परमप्रभु यावे कली ठेयब सेलीन। परमप्रभु यावे कली सरीङ रे ठेयब सेलीन। इर रे मेको कली ठेयब सेलीन। भजन संग्रह १०३:२०-२२ 
आ स्‍वर्ग ङा गेय पाइबपुकी, मेको कली ठेयब सेलीन। आ स्‍वर्गम बाक्‍ब नेल्‍लेमी मेको कली ठेयब सेलीन। 
नां नु तास्‍ला मेको कली ठेयब सेलीस। छेङछेङ पाइश्‍शो सोरुल नेल्‍लेमी मेको कली ठेयब सेलीन। उत्‍पत्ती १:१-२७ 
नेल्‍ल क्‍येङा इर सरीङ नु मेको आ तार बाक्‍ब ब्‍वाक्‍कु नेल्‍लेमी मेको कली ठेयब सेलीन। 
मेकोपुकीमी परमप्रभु यावे कली ठेयब सेल्‍मेक्‍ल। मारदे हना मेकोमी लोव़ पवानु, मेको दुम्‍तेक्‍म। भजन संग्रह ३३:९ 
मेकोमी मेको आन कली गेना हना यो बाक्‍मल, दे वोइक्‍तु। मिनु मेकोमी मेको आन कली अरेवानु, आन बाक्‍तीकेम बाक्‍शा टिम्‍तेक्‍म। 
रागी रे पा ब्‍वाक्‍कुम बाक्‍ब ठेयब जन्‍तु नु शुश लुक्‍च लशो ब्‍वाक्‍कु, परमप्रभु यावे कली ठेयब सेलीन। 
मी नु मुप्‍स, फुं नु फुरश नु फश गिवारमी आ देंशो टीनीम। 
पहाड नु डांडा, फल फुल सिप्‍ब रवा नु लाइश्‍शो रवा नेल्‍ले, 
ब्‍वाकी ङा जन्‍तु नु बी ब्‍यफ नेल्‍ले, आइक्‍च खपीम ग्रे‍शा गाक्‍ब जन्‍तु नु बेरब चिक्‍ब नेल्‍ले 
रागी ङा पिपपुकी नु जात जात ङा मुर नेल्‍ले, रागी ङा सासन नु हुकुम पाइब नेल्‍ले, 
वोंइश आल नु मीश आल, खाल्‍पा खाल्‍पी नु आल नेल्‍लेमी परमप्रभु यावे कली ठेयब सेलीन। 
मेको नेल्‍लेमी परमप्रभु यावे आ नें ठेयब सेल्‍मेक्‍ल। मारदे हना मेको आ नें ला ठेयब बाक्‍ब। मेको आ मान ततीक ङा छेङछेङ रागी नु सरीङ तार बाक्‍ब। 
मेकोमी आ मुर आन कली सक्ति पाइश्‍शो नु ठेयब सेल्‍तु। आ कली थमा सुइक्‍ब नेल्‍ले नु आ नेक्‍था बाक्‍ब इस्राएलीपुकीमी परमप्रभु यावे कली ठेयब सेलीन। ब्‍यवस्‍था ४:७-८ 
