﻿हितोपदेस.
18.
सु मुर रे ब्राशा बाक्‍बा, मेकोमी आंम कली ला रिम्‍शो पचा दाक्‍ब। मेकोमी रुप्‍तीक थुं पाइश्‍शो मुर आन लोव़ काइ मनेंब। 
मूर्खमी मारेइ लोव़ रुप्‍चा थुं मपाइब। तन्‍न “गो जोक्‍नुङ” दे आ मिम्‍शो लोव़ ला पाइब। 
परमप्रभु यावे आ अरेशो मटितीक नु महिक्‍मुतीके यो जाक्‍ब। मिनु मुने दोक्‍तीक नु मान मततीके यो जाक्‍ब। 
मुर आन लोव़ शुश लुक्‍च लशो ब्‍वाक्‍कु खोदेंशो बाक्‍ब। तुइक्‍तीके शुश ब्‍वाक्‍कु बुक्‍शा ग्रूशो खोदेंशो बाक्‍ब। 
दोस ताइब आ कुल कोव़शा, दोस मताइब कली दूली सेल्‍चा, ठीक निसाफ ममाइ। ब्‍यवस्‍था १:१७ 
मूर्ख आ लोव़मी जिचा पोक्‍ब। मिनु मेको तुप्‍चा पुंइसीब। 
मूर्ख आ लोव़ पतीकेमी आंमान खतम दुम्‍ब। आ लोव़मी मेको कली साइक्‍ब। 
नोफा मुइक्‍ब आन लोव़ शुश ब्रोव़शो जचा थोव़क खोदेंशो बाक्‍ब। मेको मुर आन थुं सम्‍म जाक्‍दीप्‍ब। हितोपदेस २६:२२ 
अल्‍सी पाइब मुर हेंथे पाइब आ लोक्‍ब बाक्‍ब। हितोपदेस १०:४ 
परमप्रभु यावे आ नें बोल्‍यो लाइश्‍शो खिं खोदेंशो बाक्‍ब। ठीक पाइबपुकी मेकेर दोरशा लशा, ब्रोंइशा बाक्‍नीम। हितोपदेस १४:२६; भजन संग्रह ६१:४ 
थीब मुर आन शोंप मेको आन कली बोल्‍यो सहर खोदेंशो बाक्‍ब। मेकोपुकीमी आन शोंप कली ठेयब गारो खोदेंशो मिम्‍नीम। हितोपदेस १०:१५ 
खतम दुम्‍चा क्‍येङा ङोंइती मुर ठेयब लेत्‍नीम। मान तचा क्‍येङा ङोंइती मुर ब्रेम्‍शो दुम्‍‍नीम। हितोपदेस १६:१८ 
सुमी लोव़ नेंचा क्‍येङा ङोंइती लोव़ लेप्‍बा, मेको मूर्ख दुम्‍तीके मुने दोक्‍ब मुर बाक्‍ब। 
मुर आ थुंमी रां ङा रोइ फाल्‍ने चाप्‍ब। तन्‍न आ थुं लुक्‍च लत हना, सुम फाल्‍ने चाप्‍‍बा ङा? 
निप्‍स पाइश्‍शो मुर आ जोक्‍तीके बारना बारन लाइब। जोक्‍ब तुइक्‍ब मुरुमी मेको क्‍येङा जोक्‍चा कली नोफा दाइक्‍ब। 
सुमी कोसेली गेबा, मेकोमी ठेयब मुर नु लोव़ पचा यो ताइब। उत्‍पत्ती ४३:११ 
सुमी जितीकेमी ङोंइती ब्‍वाक्‍बा, मेको कली नोले ङा मुर मब्‍वाक्‍म सम्‍म नेल्‍लेमी ठीक मिम्‍शा थमा सुइक्‍नीम। 
फेन्‍टे आप्‍शोनु, जिचा खेचा देक्‍ब। मिनु ठेयब मुर आन जिचा नाइक्‍‍पाइक्‍ब। 
थुं खाइक्‍पाइश्‍शो लोक्‍ब कली लेम्‍चा गारो हिरशो सहर ग्राचा क्‍येङा श्‍येत बाक्‍ब। मुर आन जितीक खेतीके बोल्‍यो खिं ङा आग्‍लो खोदेंशो बाक्‍ब। 
मुर आन लोव़मी ब्रोंइनीम। मेको आन रिम्‍शो लोव़ पशोमी जचा ताइनीम। हितोपदेस १२:१४ 
मुर आन लोव़मी बेक्‍तीक नु ब्रोंइतीक बाक्‍ब। तेको कली दाक्‍नीनी, मेको आ ततीक ताइनीनी। 
सुमी मीश ताइबा, मेको कली रिम्‍शो दुम्‍ब। मेको मुर परमप्रभु यावे आ दाक्‍शो मुर दुम्‍ब। हितोपदेस १९:१४; हितोपदेस ३१:१० 
प्रुङग मुरुमी ब्रेम्‍शो लोव़ पा पुंइनीम। तन्‍न शुश शोंप पाइश्‍शो मुरुमी ठेयब लेश्‍शो लोव़ ले‍त्‍नीम। 
का निक्‍शी मुरुमी “वारच नङ” देंखु पाइनीम। तन्‍न आंम लोक्‍ब क्‍येङा थमा पा दाक्‍ब वारच गेना हना यो आ वारच नु काथा बाक्‍ब। हितोपदेस १७:१७ 
