﻿उपदेसक.
4.
मिनु गो रागीम कोव़ङुनु, मेकेर थम मरिम्‍शो पशो ताता। गो दिप्‍चा पुंइसीशो आन ङाक्‍शो ताता। मेको आन कली लेम्‍ब सुइ मबाक्‍म। मेको मरिम्‍शो पाइब सक्ति पाइश्‍शो बाक्‍तेक्‍म। दिप्‍चा पुंइसीब आन कली चहिं लेम्‍ब सुइ मबाक्‍म। 
बेक्‍शो मुर, ब्रोंइशो आन क्‍येङा ग्‍येरसीशो बाक्‍नीम, दे तुइक्‍ताक्‍ङ। 
तन्‍न मेको निम्‍फा आस क्‍येङा मुल मजरमेशो मुर ग्‍येरसीशो बाक्‍ब। मारदे हना मेकोमी रागीम मरिम्‍शो दुम्‍शो मतशो बाक्‍ब। उपदेसक ६:३ 
मिनु गो मार ताता देंशा हना, मुरपुकी श्‍येत पा अरु आन कली गेहे पतीके रे जोक्‍ब दुम्‍नीम। मेको यो जाम्‍शा लाइब नु फश कली खेदा पशो खोदेंशो ला बाक्‍ब। 
मूर्ख मुर फिम्‍ला पा बाक्‍ब। मिनु आ खतम दुम्‍तीक आंमान चाक्‍ब। 
फश कली खेदा पशो खोदेंशो पा, शुश श्‍येत पा शुश चेम्‍चा क्‍येङा, थुं नाइश्‍शा इच्‍का खोइ चेम्‍चा रिम्‍शो बाक्‍ब। हितोपदेस १५:१६ 
मिनु गो लेंशा रागीम अरु जाम्‍शा लाइब थोव़क तातामी। 
मेको मार ताता देंशा हना तमी तौ नु सुइ लोक्‍ब मपाइश्‍शो मुर का बाक्‍त। तन्‍न मेकोमी शुश श्‍येत पा गेय पाइबाक्‍त। आ गेय गेनायो मथुम्‍थु, आ शोंपोम थुं मनुइबाक्‍त। मिनु काबु मेकोमी आंम कली “गो मारदे मोदेंशो श्‍येत ङा गेय पना पन बाक्‍नुङ? गो मारदे आंम कली मारेइ रिम्‍शो मपाइनुङा?” देंत। मेको यो जाम्‍शा लाइब नु श्‍येत जतीक ला बाक्‍ब। 
मिनु का क्‍येङा निक्‍शी दुम्‍शो रिम्‍शो बाक्‍ब। मारदे हना मेकोपुकीमी आंम श्‍येत पा पशो गेय रे पा रिम्‍शो ततीक ताइनीम। उत्‍पत्ती २:१८ 
दोकका पा का थिस्‍साक्‍व हना, मेको आ वारचमी मेको कली पोक्‍ब। तन्‍न आबी, का ला दुम्‍शा थिश्‍शोनु, पोक्‍शा वारच पाइब मबाक्‍त हना, मरिम्‍शो दुम्‍ब। 
मोदेंशो पा मुर निक्‍शी काथा इप्‍ताक्‍स हना, मेको निक्‍शी जे‍नीस। तन्‍न का ला इप्‍शोनु, दोपा जे‍चा ङा? 
का कली अरुमी फ्रुइ‍नीम। तन्‍न निक्‍शी दुम्‍ताक्‍स हना, आंम कली प्रोंइने चाप्‍नीस। थमा पा पोया सांमी किरशो डोरी रीब पा मब्रोइक्‍‍ब। 
अर्ती मनेंब खूशो मूर्ख पिप क्‍येङा जोक्‍ब तुइक्‍ब प्रुङग ठिटा का दुम्‍चा रिम्‍शो बाक्‍ब। 
मेको जेल्‍खान रे ग्रूशा पिप दुम्‍शो बाक्‍म कों? मेको प्रुङग बाक्‍त हना यो पिप दुम्‍ने चाप्‍ब। 
गो रागी ङा मुर नेल्‍ल मेको पिप आ गेय पाइब ठिटा आ नोले खोइश्‍शो तातामी। 
मेकोमी शुश मुर आन कली वारच पाप्‍तु। तन्‍न मेको क्‍येङा नोले जाक्‍बपुकी मेको तशा मग्‍येरसम। मेको थमा पा जाम्‍शा लाइब नु फश कली खेदा पशो खोदेंशो बाक्‍ब। 
