﻿उपदेसक.
10.
मिनु दोपा बेक्‍शो चुरमुमी ब्रोव़शो रिना पाइश्‍शो ख्रेक्‍तीक कली राक्‍पाइक्‍बा, मोपा इच्‍का खोइ मूर्ख दुम्‍तीकेमी जोक्‍तीक तुइक्‍तीक नु मान ततीक नेल्‍ल खतम पोक्‍ब। 
जोक्‍ब तुइक्‍ब मुर ठीक लांमी गाक्‍शो बाक्‍ब। तन्‍न मूर्ख मुर दूली लांम गाक्‍शो बाक्‍ब। 
मूर्ख मुर लांम गाक्‍मेनु, मारेइ ममिम्‍ब। मिनु नेल्‍ल आन कली आ मूर्ख दुम्‍तीके कोंइब। 
इ ठेयब मुर इ तशा गाइक्‍ताक्‍व हना यो, इ गेय प‍चा मप्रोनो। सिक्‍सी पा बाक्‍शोनु, ठेयब मरिम्‍शो प‍शो यो जाम्‍शा लाइब। 
गो रागीमी मरिम्‍शो का तशो बाक्‍नुङ। मेको ठेयब दूली गेय सासन पाइबम ला पने चाप्‍ब। 
मूर्ख आन कली ठेयब मुर सेल्‍नीम। तन्‍न शोंप पाइश्‍शोपुकी आइक्‍च दुम्‍शा बाक्‍नी‍म। 
गो वाइलपुकी चहिं शारा ङोइश्‍शा नु सासन पाइब आ तौ चहिं वाइल खोदेंशो पा खोइलीम गाक्‍शो त‍शो बाक्‍नुङ। 
बिक्‍तीक दोइब मुर मेको आंमान बिक्‍ने चाप्‍ब। मिनु गारो प्रेप्‍ब कली बुस्‍सुमी कोक्‍ने चाप्‍ब। हितोपदेस २६:२७ 
फुल्‍लु ख्रोइक्‍‍ब मुर गार दुम्‍ने चाक्‍ब। मिनु शी ख्रोइक्‍ब मुर आ गेय रे श्‍येत जने चाप्‍‍ब। 
खा महेश्‍शो बाक्‍त हना, मेको कली शुश बोल माल्‍ब। तन्‍न जोक्‍तीक तुइक्‍तीकेम मेको कली रिम्‍शो सेल्‍ब। 
बुस्‍स कली लाटा सेल्‍चा क्‍येङा ङोंइती कोक्‍तु हना, बुस्‍स चलेब कली मारेइ रिम्‍शो मदुम्‍ब। बजन संग्रह ५८:५-६ 
जोक्‍ब तुइक्‍ब मुर ब्‍वाक्‍मेनु, मान ताइब। तन्‍न मूर्ख चहिं आ लोव़मीन खतम दुम्‍ब। 
मेकोमी ङोंइती मूर्ख लोव़ पाइब। मिनु नोले बौला नु निप्‍स ग्‍यशो लोव़ पाइब। 
मूर्ख मुर ब्‍वाक्‍स ङा ब्‍वाक्‍स पाइब। मार दुम्‍बा, सुइम मतुइक्‍नीम। मेको आ नोले मार दुम्‍बा, मेको सुम देंने चाप्‍बा ङा? उपदेसक ५:२; उपदेसक ८:७ 
मूर्ख आ श्‍येत पा पशो गेयमी दाइब। मेकोमी सहर लतीक लां यो मतुइक्‍ब। 
आबी, तेको रागी ङा पिप आल का बाक्‍‍बा, तेको रागी ङा सासन पाइबपुकीमी सुनी कना भोज जा‍इनीमी, मेको रागी खतम दुम्‍शा लाइ‍ब। यसैया ३:४; यसैया ५:११ 
तेको रागीमी रिम्‍शो खिं ङा मुर पिप दुम्‍‍बा, मेको रागी ग्‍येरसीशो बाक्‍ब। मेको रागी ङा सासन पाइब भोज जची ना जाइनीम। मेकोपुकी दुक्‍चा कली ममाइ बोल तचा कली जाइ‍नी‍म। 
सुइ मुर अल्‍से बाक्‍त हना मेको आ खिं ब्रेप्‍ब। मेको फिम्‍ला पा बाक्‍त हना, मेको आ खिं याप्‍ब। 
ग्‍येरसीचा कली भोज सेल्‍नीम। मिनु अङगुर शांबुमी मुर कली ग्‍येरपाइक्‍ब। तन्‍न मेको नेल्‍ल पचा कली क्‍येट माल्‍ब। बजन संग्रह १०४:१५ 
इ मिम्‍तीकेमी यो पिप कली सराप मपावो। शोंप पाइश्‍शो मुर कली इ कोठाम सराप मपावो। मारदे हना सरीङ ङा चिक्‍बीम इ लोव़ लद। मिनु बेरशो चिक्‍बीम इ लोव़ शेंद। 
