﻿قْلّ.
49.
يَشُبَ نَشَ عَ شَ دِيٍ شِلِ، عَ نَشَ عَ قَلَ عٍ بّ، «وٌ شَ وٌ مَلَن، ﭑ شَ قٍ قَلَ نَشَن قَمَ رَبَدٍ وٌ بّ.» 
«يَشُبَ شَ دِيٍ، وٌ قَ بٍ، وٌ شَ وٌ تُلِ مَتِ وٌ بَبَ عِسِرَيِلَ رَ. 
رُبٍن، عِ تَن، ﭑ مَ دِ سِنفٍ، عِ تَن نَن نَ ﭑ مَ قٌنِكٍ دِ رَ. عِ بَرَ قِندِ قِسَمَنتٍ رَ لَسِرِيَ كُي. عِ سّنبّ دَنفِ بِرِن نَ. 
كْنْ عِ تٌ قِندِ شُرُتَرٍ نَن نَ، عَلْ يٍ نَشَن سُسُمَ، عِ مُ قِسَمَنتٍيَ سْتْمَ سْنْن، بَرِ مَ عِ بَرَ عِ سَ عِ بَبَ شَ سَدٍ مَ عَ نُن عِ نَندٍن. نَ بَرَ قِندِ سّنِيّنتَرٍحَ رَ. 
سِمٍيْن نُن لٍوِ قِندِشِ نفَشَكٍرٍنمَيٍ نَن نَ. سَنتِدّفّمَ نَن نَ عٍ شَ فٍرٍ سٌسٍ رَ. 
ﭑ مُ سٌمَ عٍ شَ قٍقٍ يَ مَ، ﭑ مُ تِنمَ دْشْدٍ عٍ شَ مَلَنيِ، بَرِ مَ عٍ شَ بْحّتٍ كُي عٍ بَرَ شّمّيٍ قَشَ، عٍ شَ كَلَبَنتٍحَ كُي عٍ بَرَ تُورَيٍ مَشْنْ قُقَقُ. 
ﭑ بَرَ عٍ شَ بْحّتٍ دَنكَ، بَرِ مَ فٍرٍفِرِيٍ نَن عٍ رَ. عٍ نَشَن نَبَمَ، ﭑ بَرَ نَ دَنكَ، بَرِ مَ عٍ يَ عِشَرَ. عٍ بْنسْي مُ لُمَ يِرٍ كٍرٍن يَشُبَ شْنيِ، ﭑ عٍ رَيٍنسٍنمَ نّ عِسِرَيِلَ بْشِ مَ. 
يُدَ، عِ شُنيَيٍ عِ تَن نَن تَنتُمَ. عِ قَمَ نّ شُتُ سْتْدٍ عِ يَشُييٍ مَ. عِ بَبَ شَ دِ شّمّيٍ مَفٌرٌ مَ نّ عِ بّ. 
يُدَ، يّتّ يْرّ نَن لَنشِ عِ مَ. ﭑ مَ دِ، عِ بَلٌمَ سُبٍ نَن شُن نَ. عِ شِنبِيٍ كُنتَنمَ نّ عَلْ يّتّ. ندٍ نْمَ سُو سَدٍ عَ شَ عِ رَكٍلِ. 
مَنفّ سَوُرِ قَمَ لُدٍ يُدَ بْنسْي نَن يِ. مِشِ يٌ مُ مَنفّ سَوُرِ بَمَ عَ يِ، بٍيمَنُ تْنشُمَ كَنيِ قَمَ تّمُي نَشّ، سِيٍ سُيِدِ مَ نَشَن بّ. 
عَ شَ سٌقَلٍ شِرِ مَ وّنِ بِلِ نَن نَ، عَ شَ سٌقَلٍ يْرّ شِرِ مَ وّنِ بِلِ قَنيِ نَن نَ. عَ شَ دٌنمَ نُن عَ شَ شِنبٍلِ دٌنمَ شَمَ وّنِ يٍ نَن نَ. 
عَ يَ مَحِنفِشِ عَلْ وّنِ، عَ حِنيِ قِيشّ عَلْ شِحّ. 
سَبُلٌن قَمَ سَبَتِدٍ بَا دّ نّ. عَ قِندِ مَ وَقُ دّ نَن نَ كُنكُييٍ بّ. عَ شَ نَانِنيِ لُمَ نّ سِدْن نَن سّيتِ مَ. 
عِسَكَرِ سّنبّ فبٌ عَلْ سٌقَلٍ، نَشَن عَ سَمَ فْورّ قِرِنيِيٍ تَفِ. 
عَ سَشِ بْشِ نَشَن مَ، يِرٍ قَنيِ نَن عَ رَ. عَ تُنكِ قٍلٍنمَ نّ كٌتٍ بُن مَ، عَ لُمَ يَامَرِ نَن بُن مَ. 
دَنَ عَ شَ حَمَ يَمَرِ مَ نّ، عَلْ عِسِرَيِلَ بْنسْي ندٍ. 
عَ لُمَ نّ عَلْ بْشِمَسٍ كِرَ شْن مَ، عَلْ تَنبَلُنبٍ سَنكِرَ رَ. عَ نَ سٌي تِنفِلِنيِ شِن، سٌي رَفِ بِرَ مَ نّ عَ قَرِ مَ. 
عَلَتَلَ، ﭑ شَشِلِ تِشِ عِ شَ كِسِ رَ. 
فَدِ، فٍرٍ سٌي عَ فٍرٍ مَ نّ، كْنْ عَ تَن نَن عٍ رَبٌرٌنمَ عَ تِنفِلِنيِ رَ. 
عَسٍرِ شَ بْشِ قِندِ مَ دَشَمُي قَنيِ يِرٍ نَن نَ، نَشَن قِندِ مَ مَنفّ دَشَمُدٍ رَ. 
نَقَتَلِ لُمَ نّ عَلْ شٍلِ فِنّ نَشَن نَ عَ فِقٍ، عَ وْيّن قَنيِيٍ قَلَمَ نّ. 
يُسُقُ لُمَ نّ عَلْ سَنسِ بُرّشّ نّينّ، نَشَن بٌفِمَ عَ قَنيِ رَ شُرٍ سّيتِ مَ. عَ سَلٌنيِيٍ تِمَ تّتّ نَن شُن. 
مِشِيٍ نَشَ فٍرٍ فِرِ عَ مَ، عٍ نَشَ شَلِ وٌلِ عَ مَ فٍرٍ رَ. 
كْنْ عَ شَ شَلِ سّنبّ فبٌ، عَ بّلّشّ قَن شْرْشْ يَشُبَ مَرِفِ عَلَ سّنبّ كَنيِ سَابُي رَ، نَشَن قِندِشِ عِسِرَيِلَ كَنتَمَ رَ، نَشَن لُشِ عَلْ قَنيٍ. 
عِ بَبَ مَرِفِ عَلَ قَمَ عِ مَلِدٍ. عَلَ سّنبّ كَنيِ بَرَكّ سَمَ نّ عِ شَ قٍ. عَ كٌورٍ بَرَكّ قِمَ نّ عِ مَ، عَ بْشِ بَرَكّ قِ عِ مَ، عَ دِبَرِ بَرَكّ رَفِرِ عِ مَ. 
عِ بَبَ شَ دُبّ دَنفِ بَلٌي نُن سٍ قَنيِ بِرِن نَ، نَشَن كٍلِمَ فٍيَ قَرِ، فٍيَ نَشَن تِشِ كَقِ دُنِحَ قْلّ. نَ بَرَكّ بِرِن شَ لُ يُسُقُ مَ، نَشَن قِندِ عَ نفَشَكٍرٍنيِيٍ شَ مَنفّ رَ. 
بُنيَمِن لُمَ نّ عَلْ وُلَءِ بَرٍ شَاحّ. عَ سُبٍ قَشَمَ فّيسّفّ، عَ عَ دْنشْي دٌن نُنمَرٍ.» 
عِسِرَيِلَ بْنسْي قُ نُن قِرِنيِيٍ نَن نَ كِ، عَ نُن دُبّ عٍ بَبَ نَشَن نَبَشِ كَنكَن بّ. 
نَ دُبّ دَنفِ شَنبِ، يَشُبَ نَشَ عَ حُنفُ عَ شَ دِيٍ مَ، عَ قَلَقٍ رَ، «ﭑ قَ سِفَقٍ ﭑ بٍنبَ قَشَشِيٍ نَن يِرٍ. ﭑ نَ قَشَ، وٌ ﭑ نَفَتَ ﭑ بٍنبَيٍ رَفَتَدٍ، فَبُرِ نَشَن نَ عٍقٍرٌن شِتِكَ شَ شّ يِرٍ، 
مَكِثٍلَ شّ قْنمّ رَ، مَمِرٍ قّ مَ، كَنَان بْشِ مَ. عِبُرَهِمَ نَ شّ سَرَشِ عٍقٍرٌن شِتِكَ نَن مَ، عَلَكٌ نَ شَ قِندِ عَ شَ مِشِ رَفَتَدٍ رَ. 
عِبُرَهِمَ رَفَتَشِ مّننِ نّ، عَ نُن عَ شَ فِنّ سَرَ. عِسِيَفَ قَن نَفَتَشِ مّننِ نّ عَ نُن عَ شَ فِنّ رٍبٍكَ. ﭑ تَن قَن لٍيَ رَفَتَشِ مّننِ نّ. 
نَ شّ نُن نَ قْنمّ نَشَن نَ نَا، عٍ سَرَشِ شِتِكَيٍ نَن مَ.» 
يَشُبَ تٌ بَرَ فّ عَ شَ وْيّنيِ مَسٍندٍ عَ شَ دِيٍ بّ، عَ نَشَ عَ سَ سَدٍ مَ، عَ قَ لَاشِرَ، عَ عَ بٍنبَيٍ لِ عَلِفِيَمَ. 
