﻿عَننَبِ يٍرٍ مِ.
41.
كِكٍ سٌلٌقٍرٍ ندٍ، نٍتَنِيَ شَ دِ سُمَيِلَ، عٍلِسَمَ شَ مَمَدِ، مَنفّ شَ كُنتِفِ ندٍ نَشَن قَتَنشِ مَنفّ بْنسْي رَ، عَ نَشَ سِفَ عَشِكَمَ شَ دِ فّدَلَيَ يِرٍ مِسِثَ، عَ نُن كُنتِفِ قُ. عٍ تٌ فّ عٍ دّفٍدٍ يِرٍ كٍرٍن، 
نٍتَنِيَ شَ دِ سُمَيِلَ نُن عَ شَ مِشِ قُ، عٍ نَشَ عَشِكَمَ شَ دِ فّدَلَيَ قَشَ سَنتِدّفّمَ رَ. سَقَن شَ مَمَدِ فّدَلَيَ، بَبِلْن مَنفّ نُ بَرَ نَشَن دْشْ مَنفّ رَ، عَ قَشَ نَ كِ نّ. 
سُمَيِلَ نَشَ يُوِقِيٍ نُن كَلِدِ سْورِيٍ بِرِن قَشَ نَشٍيٍ نُ نَ فّدَلَيَ قّ مَ. 
نَ وَشَتِ مِشِ يٌ مُ عَ كٌلٌن فّدَلَيَ نُ بَرَ قَشَ. نَ كُيٍ عِبَ، 
مِشِ تٌنفٌ سٌلٌمَسَشَن نَشَ قَ كٍلِقٍ سِكٍمِ، سِلٌ، نُن سَمَرِ. عٍ دّ شَبٍ نُ بِشِ، عٍ شَ دُفِيٍ عِبْوشِ، عٍ قَتٍ نُ مَشَبَشِ. عٍ قَ سّرّشّيٍ نُن سُرَيِ نَن نَ عَلَتَلَ شَ بَنشِ يِرٍ. 
نٍتَنِيَ شَ دِ سُمَيِلَ نَشَ مِنِ مِسِثَ عٍ رَلَندٍ. عٍ نُ نَ وَقٍ. عَ نَشَ عَ قَلَ عٍ بّ، «وٌ قَ عَشِكَمَ شَ دِ فّدَلَيَ يِرٍ.» 
عٍ تٌ تَا تَفِ لِ، نٍتَنِيَ شَ دِ سُمَيِلَ نُن عَ شَ مِشِيٍ نَشَ عٍ كْن نَشَبَ، عٍ قَ عٍ وٌلِ كْلْنيِ كُي. 
كْنْ مِشِ قُ نَشَ سُمَيِلَ مَيَندِ، «عِ نَشَ مُشُ قَشَ، بَرِ مَ دٌنسٍ فبٍفبٍ نَ مُشُ يِ رَ، عَ رَفَتَشِ وُلَ عِ، عَلْ قُندٍنيِ مَنِيّ، تُرٍ، نُن كُمِ.» نَ كُي عَ مُ تِن عٍ نُن عٍ نفَشَكٍرٍنيِيٍ قَشَدٍ. 
سُمَيِلَ فّدَلَيَ شَ مِشِيٍ قُرٍيٍ رَفٌرٌ كْلْنيِ نَشَن كُي، مَنفّ عَسَ نُ بَرَ نَ فٍ عِسِرَيِلَ مَنفّ بَاسَ شَ قٍ رَ. 
سُمَيِلَ نَشَ حَمَ دْنشْي سُشُ مِسِثَ، مَنفّ شَ دِ فِنّيٍ نُن مِشِ فبّتّيٍ، بَبِلْن سْورِ مَنفّ نٍبُسَرَدَن نُ بَرَ نَشٍيٍ تَشُ عَشِكَمَ شَ دِ فّدَلَيَ رَ. سُمَيِلَ نَشَ عٍ شَنِن عَمٌنِكَيٍ شْن. 
كَرٍيَ شَ دِ يٌشَنَن نُن سْورِ يَرٍرَتِيٍ نَشٍيٍ نُ نَ عَ قّ مَ، عٍ نَشَ نٍتَنِيَ شَ دِ سُمَيِلَ شَ كّوَلِ حَاشِ كٌلٌن. 
عٍ نَشَ مِشِيٍ مَلَن عَلَكٌ عٍ شَ نٍتَنِيَ شَ دِ سُمَيِلَ فٍرٍ. عٍ نَشَ عَ لِ فَبَيٌن شُرٍ شُنفبٍ يِرٍ. 
سُمَيِلَ نُ مِشِ نَشٍيٍ سُشُشِ مِسِثَ، عٍ تٌ كَرٍيَ شَ دِ يٌشَنَن نُن سْورِ يَرٍرَتِيٍ تٌ، عٍ نَشَ سّيوَ، 
عٍ نَشَ كٍلِ سُمَيِلَ شُن مَ، عٍ بِرَ كَرٍيَ شَ دِ يٌشَنَن قْشْ رَ. 
نٍتَنِيَ شَ دِ سُمَيِلَ نُن عَ شَ مِشِ سٌلٌمَسَشَن نَشَ عٍ فِ يٌشَنَن يَ رَ، عٍ سِفَ عَمٌنِكَيٍ يِرٍ. 
كَرٍيَ شَ دِ يٌشَنَن نُن سْورِ يَرٍرَتِيٍ نَشَ مِسِثَ حَمَ دْنشْي شَنِن فَبَيٌن، نٍتَنِيَ شَ دِ سُمَيِلَ نُ بَرَ نَشٍيٍ سُشُ. فٍرٍ سٌي، فِنّيٍ، نُن مَنفّ شَ مِشِيٍ نُ نَ عٍ يَ مَ. سُمَيِلَ نُ بَرَ عَشِكَمَ شَ دِ فّدَلَيَ قَشَ. 
عٍ نَشَ حّرّ هَن كِمٍهَمِ بّتّلّيمُ سّيتِ مَ. عٍ نُ نَ سِفَقٍ مِسِرَ بْشِ مَ، 
عَلَكٌ عٍ شَ عٍ مَكُيَ كَلِدِكَيٍ رَ. عٍ نُ بَرَ فَاشُ عٍ يَ رَ، بَرِ مَ نٍتَنِيَ شَ دِ سُمَيِلَ نُ بَرَ عَشِكَمَ شَ دِ فّدَلَيَ قَشَ، بَبِلْن مَنفّ نُ بَرَ نَشَن تِ مَنفّ رَ. 
