﻿عَلَ شَ مَسٍنيِ عَننَبِ يٌوٍلِ بّ.
1.
مَسٍنيِ نَن يِ كِ عَلَتَلَ نَشَن مَسٍن ثٍتُوٍلِ شَ دِ يٌوٍلِ بّ؛ 
قٌرِيٍ، وٌ يِ قٍ رَ مّ، بْشِكَيٍ، وٌ وٌ تُلِ مَتِ. يِ قٍ مْولِ بَرَ رَبَ نُ وٌ شَ وَشَتِ، شَ نَ مُ وٌ بٍنبَيٍ شَ وَشَتِ؟ 
وٌ يِ يَ مَشَرَن وٌ شَ دِيٍ بّ، وٌ شَ دِيٍ قَن شَ عَ يَ مَشَرَن عٍ فبٍ دِيٍ بّ، عٍ فبٍ دِيٍ قَن شَ عَ يَ مَشَرَن عٍ فبٍ دِيٍ بّ عٍ قَمَ نَشٍيٍ بَرِدٍ. 
كُلِيٍ نَشَن لُ، كَتٌي شُنشُرِيٍ بَرَ نَ دٌن. كَتٌي شُنشُرِيٍ نَشَن لُ، كَتٌي شُنفبٍيٍ بَرَ نَ دٌن. كَتٌي شُنفبٍيٍ نَشَن لُ، كَتٌي مْولِ فبّتّيٍ قَن بَرَ نَ دٌن. 
وٌ تَن سِيسِلَيٍ، وٌ شُنُ، وٌ شَ وَ. بٍيرٍ مِنيِيٍ، وٌ شَ وٌ شُي عِتٍ، بَرِ مَ وٌ مُ قَمَ وّنِ نّينّ سْتْدٍ سْنْن. 
حَمَنّ سّنبّمَ ندٍ نَشَن شَ مِشِ كْنتِ مُ كٌلٌن، نَ بَرَ دِن ﭑ مَ بْشِ رَ. عَ حِنيِيٍ لُشِ نّ عَلْ يّتّ حِنيِ، عَ بَنفَنيِيٍ لُشِ نّ عَلْ يّتّ فِنّ بَنفَنيِيٍ. 
عَ بَرَ ﭑ مَ وّنِ شّيٍ كَنَ، عَ ﭑ مَ شْرّ بِلِيٍ عِبٌلٌن. عَ بَرَ عٍ كٌبٌلٍ بَ هَن عٍ سَلٌنيِ بَرَ قِيشّ قْين. 
وٌ شَ وَ عَلْ سُنفبُتُنيِ نَشَن شَ شّمّ بَرَ قَشَ. 
عَلَتَلَ شَ سّرّشّدُبّيٍ سُننُنشِ، بَرِ مَ هَدِيَ دٌنسٍ مُ نَ عَلَتَلَ شَ بَنشِ كُي سْنْن. 
شّيٍ بَرَ كَنَ، بْشِ قَن نَ سُننُنيِ كُي، بَرِ مَ دٌنسٍ شُن بَرَ رَكَنَ، وّنِ نُن تُرٍ مُ نَ. 
شّ سَيٍ وَ مَ نّ، وّنِ سَنسِ سِيٍ سُننُنمَ نّ، بَرِ مَ نَشَن بِرِن بٌفِشِ شّيٍ مَ، نَ بِرِن بَرَ كَسَرَ. 
وّنِ بِلِيٍ بَرَ شَرَ، شْرّ بِلِيٍ بَرَ لْشْسِن. وّنِ بِلِيٍ، تُفِ بِلِيٍ، مَنفٌي بِلِيٍ، نٍيٍ بِرِن بَرَ شَرَ. مِشِيٍ شَ حّلّشِنيِ بَرَ حْن. 
نَ كُي عَ لَنمَ وٌ تَن سّرّشّدُبّيٍ، وٌ شَ سُننُنيِ دُفِ رَفٌرٌ وٌ مَ. وٌ تَن نَشٍيٍ سّرّشّ فَنمَ سّرّشّبَدٍ قَرِ، وٌ شَ وَ. وٌ شَ كْي رَدَنفِ نِمِسّ كُي، وٌ تَن نَشٍيٍ وَلِمَ ﭑ مَرِفِ عَلَ بّ، بَرِ مَ هَدِيَ دٌنسٍ بَرَ حْن عَلَ شَ بَنشِ كُي. 
وٌ شَ سُنيِ سُشُ، وٌ شَ سَلِ رَبَ. وٌ شَ قٌرِيٍ نُن حَمَ مَلَن وٌ مَرِفِ عَلَتَلَ شَ بَنشِ كُي، وٌ قَ عَ مَشَندِ وٌ بْحّ بِرِن نَ. 
عَلَتَلَ شَ لْشْي شْرْشْي بَرَ مَكْرّ. عَ قَمَ نّ كَنَرِ بٍلٍبٍلٍ تِدٍ عَلَ سّنبّمَ شِلِ رَ. 
وٌ مُ عَ تٌشِ وٌن مَ دٌنسٍ بَرَ حْن، سّيوّ نُن حّلّشِنيِ مُ نَ عَلَ شَ بَنشِ يِرٍ سْنْن؟ 
سَنسِ شْرِيٍ بَرَ شَرَ بّندّ بُن مَ. سَنسِ شْرِيٍ رَفَتَدٍيٍ بَرَ بِرَ، دٌنسٍ بَرَ حْن. 
شُرُ سٍيٍ وَ مَ دٌنسٍ قٍ رَ. يّشّي تْورْ مَ بَرِ مَ حٌوفٍ مُ نَ. 
عَلَتَلَ، ﭑ عِ تَن نَن مَشَندِ مَ، بَرِ مَ تّ بَرَ قِيلِيٍ نُن بُرُنيِ فَن. 
هَلِ بُرُنيِ سُبٍيٍ يَ تِشِ عِ رَ، بَرِ مَ شُرٍيٍ بَرَ شْرِ، تّ بَرَ قِيلِيٍ فَن. 
