﻿مَتِيُ.
28.
مَلَبُ لْشْي كُيٍ عِبَ، سَندٍ لْشْي سُبَشّ مَ، مَرِيَمَ مَفِدَلَكَ نُن بٌورٍ مَرِيَمَ، عٍ نَشَ سِفَ فَبُرِ مَتٌدٍ. 
نَ تّمُي، بْشِ نَشَ سّرّن سّنبّ رَ، بَرِ مَ مَرِفِ شَ مَلٍكّ ندٍ نُ بَرَ فٌرٌ كٍلِ كٌورٍ، عَ فّمّ مَحِندِفِلِن، عَ عَ بَ فَبُرِ دّ مَ، عَ قَ دْشْ عَ قَرِ. 
مَلٍكّ نُ يَنبَمَ عَلْ سٍيَمَكْنيِ، عَ شَ سٌسٍيٍ نُ قِيشّ قْين. 
سْورِ نَشٍيٍ نُ نَ كَنتَقٍ، عٍ نَشَ فَاشُ هَن عٍ سّرّن، عٍ لُ عَلْ قَشَمِشِيٍ. 
كْنْ مَلٍكّ نَشَ عَ مَسٍن فِنّيٍ بّ، «وٌ نَشَ فَاشُ، بَرِ مَ ﭑ عَ كٌلٌن وٌ نَ عِسَ نَن قٍنقٍ، عٍ نَشَن بَنبَن وُرِ مَفَلَنبُشِ مَ. 
عَ مُ بٍ، عَ بَرَ كٍلِ قَشّ مَ، عَلْ عَ عَ قَلَ كِ نَشّ. وٌ قَ، وٌ عَ مَتٌ عَ نُ سَشِ دّننَشّ. 
وٌ مَن شَ سِفَ مَقُرٍن، وٌ سَ عَ مَسٍن عَ قْشِرَبِرّيٍ بّ، ‹عَ بَرَ كٍلِ قَشّ مَ. عَ نَ سِفَقٍ وٌ يَ رَ فَلِلٍ. وٌ عَ تٌمَ مّننِ نّ.› عَ تَن نَن نَ كِ، ﭑ بَرَ عَ رَفبِلٍن وٌ مَ.» 
فِنّيٍ نَشَ عٍ شُلُن، عٍ كٍلِ فَبُرِ يِرٍ، فَاشُي نُن سّيوّ فبٍفبٍ رَ، عٍ سِفَ عٍ فِ رَ نَ شِبَارُ مَسٍندٍ عِسَ قْشِرَبِرّيٍ بّ. 
كْنْ عِسَ نَشَ عٍ رَلَن، عَ عٍ شّيبُ، «وٌ مَمَ.» عٍ تٌ عٍ مَسٌ عَ رَ، عٍ نَشَ سُيِدِ عَ بّ، عٍ عَ سَنيِيٍ سُشُ. 
عِسَ نَشَ عَ مَسٍن عٍ بّ، «وٌ نَشَ فَاشُ. وٌ سَ عَ قَلَ ﭑ نفَشَكٍرٍنيِيٍ بّ عٍ شَ سِفَ فَلِلٍ. عٍ ﭑ تٌمَ مّننِ نّ.» 
فِنّيٍ نُ سِفَقٍ تّمُي نَشّ، سْورِ ندٍ نَشٍيٍ نُ فَبُرِ كَنتَقٍ، عٍ نَشَ سٌ تَا كُي. قٍ نَشَن بِرِن نَبَ، عٍ نَشَ سَ عَ دّنتّفّ سّرّشّدُبّ كُنتِفِيٍ بّ. 
نٍيٍ نُن قٌرِيٍ قَن تٌ عٍ مَلَن يِرٍ كٍرٍن، عٍ نَشَ نَتّ تٌنفٌ، عٍ كْبِرِ فبٍفبٍ قِ سْورِيٍ مَ 
يِ يَامَرِ رَ، «وٌ شَ يِ نَن قَلَ، ‹عِسَ قْشِرَبِرّيٍ نَن قَ كْي رَ، عٍ عَ قُرٍ مُحَ مُشُ نُ نَ شِقٍ تّمُي نَشّ.› 
شَ عَ سَ لِ فٌمِنَ نَشَ يِ قٍ مّ، مُشُ سَ وْيّنمَ عَ بّ عَلَكٌ سٍسٍ نَشَ وٌ تٌ.» 
نَ كُي، سْورِيٍ نَشَ كْبِرِ رَ سُشُ، عٍ قٍ بِرِن نَبَ عَلْ عَ قَلَشِ عٍ بّ كِ نَشّ. نَ مَسٍنيِ نَشَ يٍنسٍن يّ يُوِقِيٍ تَفِ. هَن تٌ نَ قٍ مّمَ. 
عِسَ قْشِرَبِرّ قُ نُن كٍرٍنيِيٍ نَشَ سِفَ فَلِلٍ بْشِ مَ، عٍ تٍ فٍيَ قَرِ عِسَ دّننَشَن مَسٍن عٍ بّ. 
عٍ تٌ عَ تٌ، عٍ نَشَ سُيِدِ عَ بّ، كْنْ عٍ مَن نُ سِيكّشِ. 
عِسَ نَشَ عَ مَسٌ عٍ رَ، عَ عَ مَسٍن عٍ بّ، «سّنبّ بِرِن بَرَ سٌ ﭑ يِ رَ كٌورٍ نُن دُنِحَ مَ. 
نَ كُي، وٌ شَ سِفَ، وٌ سَ سِ بِرِن قِندِ ﭑ قْشِرَبِرّيٍ رَ. وٌ شَ عٍ شُنشَ يٍ شْورَ بَبَ عَلَ، عَ شَ دِ، نُن عَ شَشِلِ سّنِيّنشِ شِلِ رَ. 
وٌ شَ عٍ تِنكَن ﭑ مَ يَامَرِ بِرِن نَبَتُدٍ. وٌ عَ مَتٌ، ﭑ نَ وٌ قّ مَ تّمُي بِرِن، هَن دُنِحَ رَحْنيِ.»
