﻿لُكِ.
13.
نَ تّمُي، مِشِ ندٍيٍ نَشَ دّنتّفّ سَ عِسَ بّ عَ مَنفّ ثِلَتِ بَرَ فَلِلٍكَ ندٍيٍ قَشَ، عَ عٍ وُلِ مَسُنبُ عٍ شَ سّرّشّ رَ. 
عِسَ نَشَ عٍ يَابِ، «وٌ عَ مَحْشُنشِ نّ عَ نَ مِشِيٍ تْورْشِ نّ نَ كِ بَرِ مَ عٍ شَ يُنُبِ دَنفِ فَلِلٍكَ بٌورٍيٍ رَ؟ 
ﭑ شَ عَ قَلَ وٌ بّ نَ مُ عَ رَ قٍوٌ! كْنْ شَ وٌ مُ تُوبِ، وٌ بِرِن هَلَكِمَ نّ عَلْ عٍ تَن. 
نَ دَرِ سَلَمُكَ قُ نُن سٌلٌمَسَشَنيِ فٌ، سِلْمُ كٌورٍ بَنشِ بِرَ نَشٍيٍ مَ؟ وٌ حْشْ عَ مَ عَ نَ تْورّ عٍ لِشِ نّ يُنُبِتْييٍ نَن تٌ عٍ رَ دَنفِ دَرِ سَلَمُكَ بٌورٍ بِرِن نَ؟ 
ﭑ شَ عَ قَلَ وٌ بّ نَ مُ عَ رَ قٍوٌ! كْنْ شَ وٌ مُ تُوبِ، وٌ بِرِن سْنتْمَ نّ عَلْ عٍ تَن.» 
عِسَ مَن نَشَ يِ تَالِ مَسٍن عٍ بّ. «شْرّ بِلِ تٌ نُ سِشِ شّمّ ندٍ شَ بْشِ مَ، عَ نَشَ سِفَ عَ شَ سَ عَ بٌفِ بَ، كْنْ عَ مُ سٍسٍ تٌ عَ كْن نَ. 
نَ كُي، عَ نَشَ عَ قَلَ عَ شَ وَلِكّ بّ، ‹عَ مَتٌ، عَ حّ سَشَن نَن يِ كِ ﭑ قَمَ شْرّ بٌفِ قٍندٍ يِ شْرّ بِلِ كْن نَ، ﭑ مُ سٍ تٌ. عَ سِدٍ بَرَ قِندِ بْشِ مَكَنَشِ نَن نَ! عَ سّفّ!› 
وَلِكّ نَشَ عَ يَابِ، ‹مَرِفِ، عِ مَن شَ دِحّ تٌوقَرٍ شَ دَنفِ، عَلَكٌ ﭑ شَ عَ رَبِلِنيِ بُشَ، ﭑ حَحّ سَ عَ مَ. 
شَ عَ بٌفِ تَمُنَ، عَوَ. شَ عَ مُ بٌفِ، عِ عَ سّفّ.›» 
مَلَبُ لْشْ ندٍ مَ، عِسَ نُ نَ كَوَندِ تِقٍ سَلِدٍ ندٍ كُي. 
عَ نَشَ فِنّ ندٍ لِ نَا حِننّ نُ بَرَ نَشَن كُنتِن عَ رَ. كَبِ حّ قُ نُن سٌلٌمَسَشَن عَ مُ نُ نْمَ عَ رَكٍلِدٍ قٍوٌ! 
عِسَ تٌ عَ تٌ، عَ نَشَ عَ شِلِ، عَ عَ قَلَ عَ بّ، «ﭑ نفَ، عِ بَرَ قُلُن يِ قُرٍ مَ تٌ.» 
عِسَ تٌ عَ بّلّشّ سَ عَ مَ، فِنّ نَشَ عَ رَكٍلِ كٍرٍن نَ، عَ سٌ عَلَ مَتْشْقٍ. 
كْنْ عِسَ تٌ عَ رَيَلَنشِ مَلَبُ لْشْي نّ، سَلِدٍ شُنمَتِ نَشَ شْنْ عَ مَ، عَ عَ قَلَ حَمَ بّ، «شِ سٍننِ نَن نَ عَ دَشَ مِشِ شَ وَلِ نَشَن كُي. وٌ شَ قَ مَرَيَلَنيِ قٍندٍ نَ لْشْييٍ نّ، كْنْ وٌ نَشَ قَ مَلَبُ لْشْي تَن مَ.» 
مَرِفِ نَشَ عَ يَابِ، «وٌ تَن قِلَنكَقُييٍ! مَلَبُ لْشْي مَ، وٌ بِرِن مُ وٌ شَ نِنفٍ شَ نَ مُ وٌ شَ سٌقَلٍ قُلُنمَ شّ عَ شِرِدٍ، وٌ عَ شَنِن يٍ مِندٍ؟ 
عِبُرَهِمَ شَ دِ نَن يِ فِنّ رَ، كْنْ سٍنتَنّ بَرَ عَ شِرِ كَبِ حّ قُ نُن سٌلٌمَسَشَن. عَ مُ لَنمَ ﭑ شَ عَ قَن قُلُن مَلَبُ لْشْي مَ؟» 
عَ تٌ نَ قَلَ، عَ يَشُي بِرِن نَشَ يَافِ، كْنْ حَمَ تَن نَشَ سّيوَ عَ شَ كَابَنَكٌ قٍ بِرِن نَ. 
عِسَ مَن نَشَ عَ مَسٍن عٍ بّ، «عَلَ شَ مَنفّيَ مَنِيَشِ مُنسٍ رَ؟ ﭑ نْمَ عَ مِسَالِدٍ تَلِ وْيّنيِ مُندُن نَ؟ 
عَ لُشِ نّ عَلْ كٌندٍ شْرِ شُرُدِ شّمّ نَشَن سِ عَ شَ بْشِ مَ. عَ نَشَ تٍ، عَ قِندِ وُرِ بِلِ رَ، شْنِيٍ قَ عٍ تّي سَ عَ كْن نَ.» 
عَ مَن نَشَ عَ مَسٍن، «ﭑ شَ عَلَ شَ مَنفّيَ مِسَالِ مُنسٍ رَ؟ 
عَ لُشِ نّ عَلْ لّبِنِ، فِنّ نَشَن سَ قَرِن بُسَلِ تَفِ شُن مَ، نَ قَ قَرِن بِرِن نَتٍ.» 
عِسَ نُ سِفَمَ كَوَندِ تِ رَ تَايٍ بِرِن كُي، عَ شُنفبٍ نُن عَ شُرِ. نَ بِرِن، عَ نُ نَ دَرِ سَلَمُ كِرَ نَن شْن. 
مِشِ ندٍ نَشَ عَ مَشْرِن، «مَرِفِ، نْندِ نَن عَ رَ، عَ مِشِ فبٍفبٍ مُ كِسِمَ؟» عَ نَشَ عَ يَابِ، 
«وٌ كَتَ وٌ شَ سٌ نَادّ عِشُتُشِ نَن نَ، بَرِ مَ ﭑ شَ عَ قَلَ وٌ بّ، مِشِ وُيَشِ كَتَمَ نّ سٌدٍ نَا، كْنْ عٍ مُ نْمَ. 
عَ وَشَتِ عَ لِمَ بَنشِ كَنيِ كٍلِمَ نّ عَ نَادّ بَلَن. وٌ تَن قَمَ نّ تِدٍ تَندٍ وٌ نُ نَادّ كْنكْن نَ، وٌ عَ قَلَ، ‹مَرِفِ، نَادّ رَبِ مُشُ بّ.› نَ تّمُي، عَ وٌ يَابِمَ نّ، ‹ﭑ مُ وٌ كٌلٌن، ﭑ مُ وٌ كٍلِدٍ كٌلٌن.› 
وٌ مَن عَ قَلَمَ نّ عَ بّ، ‹عِ مِشِيٍ شَرَنشِ مُشُ شْنيِ نّ، وٌن بِرِن نَن وٌن دّفٍشِ، وٌن بِرِن نَن وٌن مِن.› 
كْنْ عَ وٌ يَابِمَ نّ، ‹ﭑ شَ عَ قَلَ وٌ بّ، ﭑ مُ وٌ كٌلٌن، ﭑ مُ وٌ كٍلِدٍ كٌلٌن. وٌ كٍلِ ﭑ يَ عِ، وٌ تَن قٍ كٌبِ رَبَيٍ!› 
عِبُرَهِمَ، عِسِيَفَ، يَشُبَ، نُن نَمِحْنمّ بِرِن، وٌ عٍ تٌمَ نّ عَلَ شْنيِ عَرِيَننَ، كْنْ وٌ تَن نَمِنِمَ تَندٍ، وَ نُن حِنيِ رَشِنيِ نَ دّننَشّ. 
مِشِيٍ كٍلِمَ سٌفٍتٍدٍ نُن سٌفٍفٌرٌدٍ، عٍ كٍلِ كْولَ نُن يِرٍقَنيِ بِرِ، عٍ عٍ دّفٍ عَلَ شَ مَنفّيَ نِينِ بُن مَ. 
نَ كُي، شَنبِرَتِيٍ قِندِ مَ نّ يَرٍرَتِيٍ رَ، يَرٍرَتِيٍ قَن قِندِ شَنبِرَتِيٍ رَ.» 
نَ وَشَتِ مَ، قَرِ سّنِ ندٍيٍ نَشَ قَ عِسَ شْن، عٍ عَ قَلَ عَ بّ، «عِ شَ كٍلِ بٍ. سِفَ يِرٍ فبّتّ، بَرِ مَ هٍرٌدٍ وَ مَ عِ قَشَقٍ.» 
عَ نَشَ عٍ يَابِ، «وٌ سِفَ، وٌ سَ عَ قَلَ نَ شُلُمَسٍ كْوتَشِ بّ، ﭑ نَ حِننّيٍ كٍرِقٍ مِشِيٍ قْشْ رَ، ﭑ نَ مِشِيٍ رَيَلَنقٍ، تٌ عَ نُن تِنَ. شِ سَشَن ندٍ مَ، ﭑ فّمَ نّ ﭑ مَ وَلِ رَ. 
كْنْ قٌ ﭑ شَ ﭑ حّرّ تٌ، تِنَ نُن تِنَ بٌرَ، بَرِ مَ عَ مُ لَنمَ تَن نَمِحْنمّ شَ قَشَ قٌ دَرِ سَلَمُ.» 
«دَرِ سَلَمُ، دَرِ سَلَمُ، تَا نَشَن نَمِحْنمّيٍ قَشَمَ، نَشَن عَلَ شَ شّيرَيٍ مَفْنْمَ. سَنمَيَ وُيَشِ ﭑ بَرَ وَ عِ شَ دِيٍ مَلَنقٍ ﭑ يِرٍ، عَلْ تْشْي عَ شَ دِيٍ رَ سٌمَ عَ فَبُتٍنيِ بُن مَ كِ نَشّ، كْنْ وٌ نَشَ تٌندِ! 
نَ كُي، عَلَ بَرَ كٍلِ وٌ شَ بَنشِ شُن مَ. ﭑ شَ عَ قَلَ وٌ بّ، وٌ مُ ﭑ تٌمَ سْنْن، هَن وٌ عَ قَلَمَ تّمُي نَشّ، ‹بَرَكَ نَ عَ بّ نَشَن قَقٍ مَرِفِ شِلِ رَ!›» 
